Read bassa UNDWA TUKWABILANA 29 Bible Online

UNDWA TUKWABILANA 29 - bassa bible

UNDWA TUKWABILANA 29

¹N-ndumwa mu ga kpaaŋ muba AGWANGWAMA peni Moses unu maa twa-unu na atwa Isrɛl na cɛnjɛ tu Moab, medenji unu na ba twawa la na aba ni Ishɛmɛ Horɛb.

²Go Moses suyanɛ atwa Isrɛl kpaaŋ, bɛɛ hiɛŋ aŋ, Hiɛ kwụbɛ iyi nɛ AGWANGWAMA njɛ la Faro, ta anjɛ-ugondu ubwa keeni cɛnjɛ tu bwa kpaaŋ, ni Ijipti ne eshe hiŋ.

³Ibɛ shɛ tumanga tu 'wụtụ tu na abụ kwụbɛ ne eshe bu, te eseyida keeni arụhwajɛ a'wụtụ na baa njɛ.

⁴Ama AGWANGWAMA te bi peni shi ahaŋsa taa hwayɛ maa eshiciji, okwo eshe na maa kwụbɛ, kwo kaa acɛbɛ na maa hwụjɛ iŋ o.

⁵N hi 'yagajɛ shiywa buhanda nụ ụshɛka; tugwuno ti hiŋ tɛ injɛ shɛ o, shɛbɛda shi hiŋ kaa shɛ injɛ shɛ o.

⁶Hi zasa iyimɛyɛ maa hiɛ yɛ, hi zasa kaa meni mụ tụ'walụ ta afwafwa kwo kaa meni na ma ima bụtụ maa hi swe o. N hi ndanɛ inɛ gɛ maa hi mepi maa Gamba n shɛ AGWANGWAMA na shɛ Agwatana hiŋ.

⁷Aka na te ehi ci epe, ge Sihon agwuma Hɛshbon keeni Og agwuma Bashan a banɛ aa tu sukakanɛ nu ujasa, ama tu lasụ aŋ.

⁸Eti leshiji cɛnjɛ ta aba, eti peni atwa Rubɛn, na atwa Gad, keeni ashashɛ ụlamụ Manasɛ maa tɛ shɛ iyi-yo-ogwu aba.

⁹Iwɛ ecilo ata no shiyono ma eshe maa hiɛ njɛ gana na tu n-ndumwa mu unu-tutwa ga mɛ shɛ, iwɛ maa ihiɛ zhɛmanɛ[35] ni iyi elele nɛ ahia nda.

¹⁰Hi shikeni nu umbe AGWANGWAMA na shɛ Agwatana hiŋ hwayɛ ga kpaaŋ hiŋ, ibɛ shɛ ehiu alamụ hiŋ, nu n-nyarɛ mi hiŋ, keeni atwa hiŋ shihwolu, aba shɛ etwenyi Isrɛl kpaaŋ,

¹¹ta miaụŋ mi hiŋ mi ticwɛŋ cwɛŋ te eyikwo hiŋ, keeni alashɛ a na namɛ nu ugba bụ, ta atwa na ma bụ bagagana i'wɛ'wɛ keeni atwa na ma bụ ciganɛ meni.

¹²Bụ namɛ epe hwayɛ ga iwɛ maa teni unu na AGWANGWAMA na shɛ Agwatana bụ twa na bụ;

¹³iwɛ maa mo bu shikicingo hwayɛ ga, maa shɛ atwa bwa, maa kaa du sha Agwatana bụ, nu gana na bee bi shileni la unu, keeni gana na bee shileni la eshi bu, ga Abraham, na Azik, keeni Jekob unu.

¹⁴Shɛ ahiɛba kiri boo shilono-unu iwɛ unu ga tutwa o,

¹⁵ama ta bụtụ na ta zasaba epe no tu hwayɛ ga, medenji du bụtụ na shikeni no tu epe nu umbe AGWANGWAMA na shɛ Agwatana tu hwayɛ ga.

¹⁶Hi mepi gana na atɛ jɛjɛ la na cɛnjɛ ti Ijipti, keeni gana na etu duleji na ashashɛ edenji nazhɛ atu banɛ. Aba shɛ anaa na ahiɛ kashacɛ.

¹⁷Hiɛ kwụbɛ iyi ya aba i tupwaŋ, nɛ shɛ ntatanuwaŋ mi i'wɛ'wɛ, keeni mu na ma atayɛ, na azụrụfa keeni azhɛnarɛya, nɛ namɛ na ashashɛ aba.

¹⁸Na nda ma pece iwɛ aka na butubwenyi bu ko, kwo kaa biyikwo bu ko, kwo kaa umwamwa uko, kwo kaa ụlamụ uko zhɛ wa nama na ashashɛ hiŋ, na ahaŋsa ubwa zhɛ a jɛshɛrɛgwa maa ganga AGWANGWAMA na shɛ Agwatana tu tu'wa hwayɛ ga. Bɛɛ zhɛ ba zha maa bu na zhɛba tuwa ta anya edenji, bụtụ ata zhɛ ba sha gana ucilo ti'ina, na zhɛ ba zarɛga hwuŋ du miaụŋ mu bwa na ti'ina,

¹⁹na shɛ maa, aka na baa hwụjɛ n-ndumwa mu unu-tishilo iwɛ unu ga tutwa, bɛɛ zhɛ mɛmɛ hiɛŋ, na amɛ ubwa, Okwo Ama nda tigezhe ti mi, N zhɛ ma nama waa kaa lapiya. Inɛ gɛ kaa zhɛ ma hi nda ufwu ta atwa ebiye ta atwa awɛ hwɛɛ.

²⁰AGWANGWAMA kaa zha shɛ a gangana bụ o, ama isɛbwɛ keeni amɛ-tụhaŋtụ AGWANGWAMA zhɛ a sukakana bụtụ ata, ibɛ po onu-tukalangana a na 'nyeci nu utakada ga kpaaŋ zhɛ a patana nu uhiuhiu ubwa, AGWANGWAMA kaa zhɛ o 'woricingo izeci ibwɛ nu unyizo ga hwɛɛ.

²¹AGWANGWAMA kaa zhɛ a bacɛnga bụ bwooko na alamụ Isrɛl kpaaŋ, maa shilono bu tiriri tɛnda, nu gana na to onu-tukalangana unu-tutwa na 'nyeci nu utakada ga kpaaŋ namɛ.

²²Nazhɛ uwaŋnɛ na tee ci, a na shɛ miaụŋ mi hiŋ me ekwunyi, keeni bugaiŋ na zhɛ ba banɛ na cɛnjɛ tu na tụ dụlụmɛ, aka na ta a kwụbɛ ụbaụta na sepi cɛnjɛ ta ata keeni ụngwụ na AGWANGWAMA leni maa ụ 'imɛ tụ,

²³gana na ta cɛnjɛ ta ata kpaaŋ tɛ shɛ tuwiŋ-tu-waŋna, keeni manɛ, keeni tukwundu tu ulwa, tu na ti cimi shi iyi tibila, tu na iyi eri shi ya waŋna na tuba, ofwo na ambɛ eri shi ɛ unshɛ, tu na tu hwuŋzwo gana Sụdụm, keeni Gụmụra, ta Adma, keeni Zɛboim, na AGWANGWAMA hwuŋzhi ni isɛbwɛ ibwɛ i'wɛtwɛ.

²⁴Iiŋ, edenji elele zhɛ no hoŋtono, ɛ hiɛŋ, Iwembe po AGWANGWAMA njɛ cɛnjɛ tu ga gana gaa? Imbe po baa njɛ isɛbwɛ i ci gana ga ugomboo?

²⁵Nazhɛ atwamwa zhɛ ɛ jishijɛ, ɛ hiɛŋ, Iwɛnɛ te e jineci unu na AGWANGWAMA na shɛ Agwatana eshi aba twa la na aba, na aka na ti bɛɛ bɛcinjɛ aŋ na cɛnjɛ ti Ijipti.

²⁶Ee zhe aa zhɛba tuwa tu na ee te mepi shi la kwukwuŋ, shɛ ubwa kaa peni aŋ maa ga a na nda tu o.

²⁷Iwɛbɛ po isɛbwɛ ya AGWANGWAMA yo gorogo na cɛnjɛ tu ga, unu-tukalangana na kaa 'nyeci nu utakada ga kpaaŋ ụ 'imɛ tụ.

²⁸Ibɛ po AGWANGWAMA njɛ isɛbwɛ, bee becinji aŋ na cɛnjɛ ta aba ni isɛbwɛ ibwɛ i'wɛtwɛ, baa 'wɛŋ aŋ na cɛnjɛ ti nya, gana na ti yaa namɛ tutu taa hwayɛ.

²⁹Iyi elele nɛ swacɛ, i shɛ inɛ ya AGWANGWAMA na shɛ Agwatana tu; ama iyi elele nɛ kapɛshɛngwa, ibɛ shɛ inee tu keeni miaụŋ mu tu unyizo-nom, iwɛ maa tu na hwuga-unu n-ndumwa mu undwa ga kpaaŋ.