Read bassa UNDWA TUKWABILANA 30 Bible Online

UNDWA TUKWABILANA 30 - bassa bible

UNDWA TUKWABILANA 30

¹Aka na ti ijɛ ibu vwutengeni kpaaŋ, ibɛ shɛ ewebiye-tupana keeni onu-tukalana, na Ngee bi tileneni hwayɛ ga. Bi zhɛ bi ne teyinje iŋ kaa na ahaŋsa bụ, na ashashɛ edenji elele na AGWANGWAMA na shɛ Agwatana bụ zhɛ mo bu unzo maa zhe.

²Yaa shɛ ebu gwure kaa pa AGWANGWAMA na shɛ Agwatana bụ, ta miaụŋ mụ bụ, maa hwụjɛ-unu ubwa ni iyi elele nɛ Ngee bi peni-unu ibɛ hwayɛ ga, na amɛ bụ oko keeni ohwulu bu oko hwɛɛ,

³nazhɛ AGWANGWAMA na shɛ Agwatana bụ zhɛ me bu gwuricingeni tɛzhɛmana tụ bụ,[36] bɛɛ zhɛ kaa bo hioko inyɛmɛnyɛmɛ bụ, bɛɛ zhɛ kaa ma bụ zanganjɛ no olugwo atwa elele na bee ge bi gereteji la no ofwo aba.

⁴Okwo yaa shɛ ee ge gereteji la atwa bụ oko tutu ukwunanga unyizo, AGWANGWAMA na shɛ Agwatana bụ zhɛ ma bụ zanganjɛ taa apata, apata bɛɛ zhɛ mɛ bi bɛcinjɛ maa gwure.

⁵AGWANGWAMA na shɛ Agwatana bụ kaa zhɛ ma bụ shapa maa zhe na cɛnjɛ tu na eshi bu leshiji la, maa 'yaga tụ. Bi zhɛ kaa ba nda maa ibi keeni tɛzhɛmana keeni ufwugwo tugombo uhwuri eshi bu.

⁶AGWANGWAMA na shɛ Agwatana bụ kaa zhɛ ma bụ pana amɛ na zhɛ na hwuga-unu ubwa; ta ajalalo bu hwɛɛ, iwɛ maa no lubo AGWANGWAMA na shɛ Agwatana bụ na amɛ bụ oko, to ohwulu bu oko hwɛɛ, iwɛ maa yɛ uraiŋ.

⁷AGWANGWAMA na shɛ Agwatana bụ kaa zhɛ a patana atwa i'ime bu keeni atwa na ma bụ shɛka onu-tukalangana ga kpaaŋ nu uhiuhiu wa aba.

⁸Nazhɛ ɛbi zhɛ ba hwuga sasana unu wa AGWANGWAMA, maa untangana kaa onu ubwa tụpana a na Ngee bi peni hwayɛ ga kpaaŋ.

⁹Yaa shɛ ɛbi zhɛ ba hwuga-unu wa AGWANGWAMA na shɛ Agwatana bụ, maa na untangana unu ubwa tụpana keeni andwa ubwa a na 'nyeci nu utakada ga undwa, yaa shɛ kaa ebi gwure pa AGWANGWAMA na shɛ Agwatana bụ na amɛ oko keeni ohwulu bu oko hwɛɛ;

¹⁰nazhɛ AGWANGWAMA na shɛ Agwatana bụ zhɛ a nda maa tɛzhɛmana tụ bụ ti keeni ugombo duwa, nu ugondu we elele na aba nda ni i'ɛlɛ bụ. Nazhɛ ɛbi zhɛ kaa ba mata miaụŋ mu ufwugwo, ti iyimabiga bụ, keeni tụ'walụ ta cɛnjɛ tụ bụ. Iwɛnɛ po AGWANGWAMA zhɛ a nda unyasa maa i bụ zhɛmanɛ sasana, gana na tu baa njɛ la unyasa ne eshi bu.

¹¹Iwɛnɛ po unu-tupana na Ngee bi peni hwayɛ ga, ubu hwuri shi ikɛnyi, okwo ụdụlụ, ụ dụlụmɛ shɛ o.

¹²Shɛ na azuba waa namɛ, iwɛ maa bɛ hiɛŋ, Gaaba zhɛ mo tu mungono azuba, maa ma tɛ shapɛrɛganɛ ụŋ, iwɛ maa ta hwuga maa ta nda ụụŋ?

¹³Shɛ hileniye itekwu du kaa waa namɛ, iwɛ maa bɛ hiɛŋ, Gaaba zhɛ ma ti kashaga itekwu, maa ma tɛ shapɛrɛganɛ ụŋ, maa ta hwuga maa kaa ta nda ụụŋ?

¹⁴Ama n-ndumwa ma ata mu gwumwongonu na bụ ciiŋ ciiŋ; mu namɛ kaa nu unu bu, maa namɛ du kaa na amɛ bụ, iwɛ maa eri mu tɛnda.

¹⁵Kwụba, M bi tileneni hwayɛ ga uraiŋ no tu'wo, tɛzhɛmana keeni tuwumana.

¹⁶Yaa shɛ aba hwuga-unu wa andwa AGWANGWAMA na shɛ Agwatana bụ a na Ngee bi peni hwayɛ ga,[37] maa no lubo bu, maa na untangana onu ubwa tụpana, na andwa ubwa keeni shikpogo shɛ bwa, nazhɛ ɛbi zhɛ ba ya uraiŋ, maa na kaana ufwugwo tugombo. AGWANGWAMA na shɛ Agwatana bụ kaa zhɛ ma bụ pana-uwebiye na cɛnjɛ ta ata ɛbi zhɛ bo tono maa leshiji.

¹⁷Ama yaa shɛ ahaŋsa bụ jɛshɛrɛgwa, maa lacɛ unu ubwa tuhwuga, aba kaana kaa ụdụlụ maa zhe na zhɛba tuwa,

¹⁸mo bi mbiso kpataa hwayɛ ga, maa hi zhɛ hia nda ufwu, hi zha shɛ hia ya uraiŋ te ilegeji na cɛnjɛ ta ata ɛbi zhɛ ba kasha Jodan bo tono maa leshiji o.

¹⁹N to azuba keeni cɛnjɛ tu unyizo maa u hiɛ sukakanɛ ne tiseyida tụ tuwumana hwayɛ ga, Ngee hi shileni kaa uraiŋ no tu'wo, nu uwebiye-tupana keeni unu-tukalana nu umbe bu. Iwɛ ecilo ata tala uraiŋ maa yɛ urugbo, ta ajalalo bu,

²⁰maa no lubo AGWANGWAMA na shɛ Agwatana bụ, tedure nu unu ubwa tuhwuga, maa shanɛ bụ atwa tɛcara. Iwɛnɛ po inɛ ɛtɛ zhɛ ma bụ shana uraiŋ keeni ti'ilogogo tu uraiŋ bụ tiya, iwɛ maa yɛ uraiŋ na cɛnjɛ ta ata AGWANGWAMA shileni la eshi bu, ga Abraham, na Azik, keeni Jekob unu maa bi zhɛ ba pana aŋ.