Read bassa UNDWA TUKWABILANA 33 Bible Online

UNDWA TUKWABILANA 33 - bassa bible

UNDWA TUKWABILANA 33

¹Inɛ gɛ ibɛ shɛ uwebiye nɛ go Moses bụtụ ata ba Agwatana peni miaụŋ mi Isrɛl nazhɛ bee 'wi.

²Bɛɛ hiɛŋ, AGWANGWAMA banɛ ni Ishɛmɛ Sainai, bɛɛ ishijɛ baa banɛ gana uwaŋna ni Sei, bee tu ubi; baa ta, tu baa banɛ ni Ishɛmɛ Paran, atumwa-azuba igbɛɛ-itɛ (10,000) banɛ no olugwo atwa tijilo aa namɛ nu bwa, bụratụ bu ulwa bo gorogo nu u'ala ubwa ubiye

³Iiŋ, AGWANGWAMA lubi atwa ubwa; atwa elele na meme shiri swooŋ pu bwa a namɛ ni i'ɛlɛ ibwɛ; ibɛ po ata hwuga-unu wa andwa ubwa, ata lashɛga kaa tusokokono no olugwo ubwa.

⁴Aka na go Moses iti peni undwa, iwɛ maa ga tu'ulwa ti Jekob ti 'yaga.

⁵AGWANGWAMA ubwa kaa shɛ agwuma atwa ubwa Isrɛl,[43] na aka na te ehiu keeni alamụ Isrɛl kpaaŋ ụlwatagwụ urubwo uko.

⁶Ga gɛ Rubɛn nama, maa kede 'wo, kede atwa ubwa kaa gwumwa ufwugwo.

⁷Iyi nɛ kaa baa jɛmɛ iwɛ Juda na: bɛɛ hiɛŋ, Oo AGWANGWAMA, hwuga rụhwụŋ ru n'ungwa mụ ụlamụ Juda, maa twagwụ bụ ifelu, maa mbiyeni bu na atwa na a sukakana bụ.

⁸Baa jɛmɛ inɛ Livai, bɛɛ hiɛŋ: Kapɛshɛngana bụtụ bụ ukwulana bụ tedure nu Tumim keeni Urim,[44] ubwa shɛ bụtụ na ebi menji nu Masa, ubwa kaa shɛ bụtụ ata abụ twa ifelu nu bwa no ofwo meni mu Mɛriba.

⁹Ubwa hiɛŋ, Iwɛ bishi bwa no bino bwa tatụlanụ sụ bụ o. Bi peni shi kaa abashɛ iwɛ miaụŋ-mo-bino bwa o; baa ngbaraka kaa du miaụŋ mu bwa cwɛŋ. Iwɛnɛ po o shiyono n-ndumwa mụ bụ eshe, aa untanganɛ kaa unu bu tụpana.

¹⁰Ɛ zhɛ no mbisogono Jekob shikpogo shɛ bụ, maa o no mbisogono Isrɛl undwa bụ. Ɛ zhɛ na bụ pana arụpɛ nu utukwu-ụrụpɛ bụ, ɛɛ zhɛ kaa a patana ụrụpɛ tuhwoŋzhingo hwɛ hwɛɛ nu utukwu-ụrụpɛ bụ.

¹¹Oo AGWANGWAMA, pana iyi nɛ baa 'yajɛ uwebiye duwa, maa kaa amɛ bụ lemi nu ugondu i'ɛlɛ ibwɛ we elele na baa nda. Hinyanga shimbi sha atwa ubwa ifelu, ta atwa na a ta bụ ni i'ime, iwɛ maa kede ɛ ishijɛ ya kwukwuŋ.

¹²Baa jɛmɛ iwɛ ụlamụ Bɛnjamin, bɛɛ hiɛŋ: AGWANGWAMA o lubo bu, baa jɛjɛ nu bwa lapiya; baa kapa bụ iyi uuwa bo rungwutwonu tutu ụrụmɛ, bi zhɛ ba nda kaa ofwo ubwa tɛgɛga na ashashɛ shitutu shɛ bwa.

¹³Baa jɛmɛ iwɛ ụlamụ Josɛf, bɛɛ hiɛŋ: Ga AGWANGWAMA peni cɛnjɛ tu bwa uwebiye, ne cime ta azuba tu na tụ pɛlanụ; medenji meni mu na mi iri taa tuta ta cɛnjɛ;

¹⁴medenji tụ'walụ ti biye tu na uwaŋna nɛcɛnjɛ, keeni uduciya tụ'walụ ta aba ti biye tu na upiana bɛcinjɛ.

¹⁵Ga tụ'walụ ti biye tu bala nu nshama mụ ngwụshɛ, keeni tụ'walụ tụ 'wụtụ tu unyizo-nom, te tikpekwu ta aba.

¹⁶Ga apwaŋ ebiye elele shini na cɛnjɛ ta aba. Ga AGWANGWAMA na jɛmɛ la iwɛ nu ukokoto na wo gorogo peni aŋ uwebiye nɛ zhɛmɛ tebiye. Gɛ ijɛ kpaaŋ zhaganɛ ụlamụ Josɛf; iwɛnɛ tu baa shɛ buhwuri-bu-umbe[45] na ashashɛ miaụŋ-mo-bino mu bwa.

¹⁷Igɛhi ibwɛ i shɛ gana inɛ buna be eyi na ee meci hiiŋ, bunaa na mahiuaŋ mu bwa mɛ shɛ gana mahiuaŋ me binemi. Na mahiuaŋ ma ata baa tagana edenji, boo shishongono aŋ tutu uce cɛnjɛ tu unyizo. A shɛ gana inɛ Ifrem igbɛɛ-itɛ (10,000). Aa shɛ gana inɛ Manasɛ igbɛɛ igbɛɛ.

¹⁸Baa jɛmɛ iwɛ ụlamụ Zɛbulon, bɛɛ hiɛŋ: Gabụ gɛ Zɛbulon, na bwada unyasa duwa na tubana tụ bụ, tu gabụ ge Isaka nu umwono bu.

¹⁹Ɛ zhɛ a suyagana atwamwa no ofwo ishɛmɛ ya aba: apata ɛɛ zhɛ a pana arụpɛ na teni cɛŋ; iwɛnɛ po ni itekwu aa 'yaga uduciya wa aba keeni uduciya na swacɛ na amɛ ahwayɛ Urefu.

²⁰Baa jɛmɛ iwɛ ụlamụ Gad, bɛɛ hiɛŋ: Ge zhemonjino AGWANGWAMA na njɛ maa go tugwungwu tu Gad ti gembi! Ga Gad ubeni gana bizeci, baa aŋsatanga uragbam keeni udara uhiuhiu.

²¹Bi meme teleji cɛnjɛ ti biye iwɛ ikɛnyi ibwɛ, iwɛnɛ ee shileni bu urobwo buhwuri-bu-umbe; baa zhajɛ no ofwo atwa na shɛ ehiu atwa, baa jɛmɛ iwɛ unu-tupana wa AGWANGWAMA keeni onu-tɛtɛtagana na namɛ ririri na atwa Isrɛl.

²²Baa jɛmɛ inɛ ụlamụ Dan, bɛɛ hiɛŋ: Ga Dan shɛ gana usemberi bizeci, na ba dwa angapa tu baa banɛ nu Bashan.

²³Baa jɛmɛ inɛ ụlamụ Naftali, bɛɛ hiɛŋ: Oo gabụ ga Naftali, tulubo-ti-biye tụ bụ gwumwa, ebi shiji kaa nu uwebiye-tupana ya AGWANGWAMA, bi zhɛ ba lashɛga ụzalụ bu uwaŋna-banụ tutu ụzalụ tuta.

²⁴Baa jɛmɛ inɛ ụlamụ Ashɛ, bɛɛ hiɛŋ: Ge uwebiye miaụŋ-me-eyi tumata, nɛ uhwuri inɛ vwɛ hwɛɛ i shɛ inɛ Ashɛ; gɛ iwɛ ubwa kwụlanɛ miaụŋ-mo-bino bwa. Ga manɛbɛ mɛ shɛ iyi nɛ bɛɛ zhɛ no shiyono uvwɛvwɛjɛ ubwa.

²⁵Ga ụ'wụ'wụ wo odubo bu tukapa ụ shɛ ụshɛmbɛrɛ keeni utumburɛ. Ikɛnyi bu ti'yaga zhɛ ya sha gana na tu uraiŋ bụ tiya namɛ.

²⁶Oo gabụ gɛ Jɛshurun, i zasa binya bụtụ ta namba na shɛ gana Agwatana bụ, na patanɛ na azuba tụla maa mo bu mbiyono; bu patanɛ na azuba odomu aa kwụbɛ kaa igɛhi ibwɛ.

²⁷Agwatana unyizo-nom baa shɛ, ubwa shɛ ijilɛni bụ, aragbam ubwa unyizo-nom aba kaa mo bi shikicingo. Ibɛ po bee shishingeni atwa bụ ifelu taa dụlụ maa e beni nu umbe bu, bɛɛ bi hiɛŋ, Iricingo aŋ hwɛɛ aba.

²⁸Ibɛ po atwa Isrɛl jɛjɛ ya no ofwo ulapiya, aa jɛjɛ ya suu na amɛ cɛnjɛ tu na iyimɛyɛ keeni meni mụ tụ'walụ ta afwafwa mu barɛ; no ofwo na cime te ngbenji na tụla.

²⁹Oo gabụ ge Isrɛl, bu gwoje! Gaaba ta shɛ gana bụ yaa? Gabụ kaa bɛ shɛ udenji na Agwatana bicinji. Ubwa kaa shɛ abula ujasa timbiyono tụ bụ, keeni utokwobi tụlasụ tụ bụ! Atwa i'ime bu zhɛ a zhajɛ maa a mama 'wɛŋ nu ukaka bụ na tɛzhɛgɛdaga. Gabụ kaa bi zhɛ bo rukoto aŋ.