Read bassa UNDWA TUKWABILANA 6 Bible Online

UNDWA TUKWABILANA 6 - bassa bible

UNDWA TUKWABILANA 6

¹Onu-tupana, no shikpogo keeni andwa na AGWANGWAMA na shɛ Agwatana hiŋ m peni-unu wa aba maa Mo hi mbisogono na, iwɛ maa hi na nda aŋ na cɛnjɛ ta ata ɛhi zhɛ hia kasha maa hi 'yaga.

²Na sụma AGWANGWAMA na shɛ Agwatana bụ inyɛsɛ, tụ gabụ, ta miaụŋ mụ bụ, ta ajalụ bụ, tedure no shikpogo shɛ bwa keeni onu ubwa tụpana tu'untangana, anaa na Ngee bi peni tutu ukwunanga uraiŋ bụ kpaaŋ; iwɛ maa yɛ urugbo.

³Oo gabụ ge Isrɛl, na hwuga, maa no shiyono eshe, maa na nda iŋ; iwɛ maa ibu zhɛmanɛ, iwɛ maa na kaana ufwugwo tugombo duwa, na cɛnjɛ ta ata ti 'yajɛ ugwungwu, tu na kaa tuwebiye tu barɛ, gana na ta AGWANGWAMA na shɛ Agwatana eshi bu ibi shileni-unu, Undwa u Tulubo

⁴Oo gabụ ge Isrɛl, hwulaga; AGWANGWAMA na shɛ Agwatana tu, bɛ shɛ AGWANGWAMA.[11] oko.

⁵No lubo AGWANGWAMA na shɛ Agwatana bụ na amɛ bụ kpaaŋ, to ohwulu bu kpaaŋ, ti ikɛnyi bu kpaaŋ.

⁶Ga n-ndumwa mu ga Ama bụ pana-unu muba hwayɛ ga mu nama na amɛ bụ.

⁷No mbisogono mu miaụŋ mụ bụ ɛgbɛɛ, na dumanga ushaura muba aka na abɛ jɛjɛ nu umwono bu, ta aka na ɛbi zhɛ tahaŋnụ nu uhwaŋna, ta aka na ebu weci, keeni aka na ɛbi ishijɛ.

⁸Umpo mu nu u'ala bụ keeni itune bu, maa mɛ shɛ useyida.

⁹'Nyata mụ ni i'wɛ'wɛ yo odubo umwono bu keeni shidubo shɛ uba bụ.

¹⁰Aka na ta AGWANGWAMA na shɛ Agwatana bụ ibi shepi maa zhe na cɛnjɛ ta ata bee shileni la eshi bu, ga Abraham, na Azik, keeni Jekob unu, maa bi zhɛ ma bụ pana, medenji ashɛpwụ a'wụtụ a na kaa zhɛmanjɛ, anaa na ebi jwe shi,

¹¹to shimwono shɛ na iyi elele shinenji kpaaŋ, inɛɛ nɛ i shɛ shɛ maa gabụ bi shidenji iŋ, medenji a'ibwa meni, a na ebi hini shi, medenji ntuma ma shifwafwa keeni i'wɛ'wɛ buta nɛ abu bɛrɛ, abɛ yɛ kaa ebi shiji.

¹²Nda pece iwɛ aka na isɛbwɛ ya AGWANGWAMA na ubu bɛcinjɛ na tijama ta cɛnjɛ ti Ijipti zhɛ mo bu 'wo.

¹³Na sụma AGWANGWAMA na shɛ Agwatana bụ inyɛsɛ; maa na zhɛba bụ, maa na ta izeci ibwɛ.

¹⁴Ta zhɛba tuwa ta atwa na ubu rungwutwonu o.

¹⁵Iwɛnɛ po AGWANGWAMA na shɛ Agwatana na namɛ na ashashɛ bụ, bɛ shɛ Agwatana isɛbwɛngwɛ, iwɛ aka na isɛbwɛ ya AGWANGWAMA na shɛ Agwatana bụ zhɛ ya aŋpɛ nu uhiuhiu bu, yɛɛ zhɛ kaa mo bu hwoŋzhingo maa beni na cɛnjɛ tu unyizo.

¹⁶Ta manga ma AGWANGWAMA na shɛ Agwatana hiŋ, gana na ehi menji bu la nu Masa o.

¹⁷Untangana ma onu-tupana AGWANGWAMA na shɛ Agwatana hiŋ dimi dimi, keeni tiseyida tu bwa, keeni shikpogo shɛ bwa, shɛ na bee bi peni-unu shɛ ba.

¹⁸Na nda iyi nɛ teni cɛŋ keeni inɛɛ nɛ zhɛmɛ ne eshe AGWANGWAMA, iwɛ maa ibu zhɛmanɛ, iwɛ maa zhe maa leshiji cɛnjɛ ta ata ti biye tu na AGWANGWAMA shileni la eshi bu unu maa bi zhɛ ba pana aŋ,

¹⁹maa unzhi atwa i'ime bu a na namɛ apata kpaaŋ, nu gana na ta AGWANGWAMA shiri la unu.

²⁰Aka na yɛu bụ ye eyi ibi heŋteni hwuŋ maa, Imbe kwuŋ shɛ ecilo no po AGWANGWAMA na shɛ Agwatana tu ibi peni shikpogo, no onu-tɛtɛtagana keeni andwa ga kpaaaŋ?

²¹Mbiso yɛu ɛtɛ bụ ye eyi maa, Tɛ shɛ la ajama Faro ni Ijipti; nazhɛ AGWANGWAMA iti bɛcinjɛ ni Ijipti nu u'ala ubwa ukpahiŋ ụ'wụtụ.

²²Ne eshe tu kaa atụ kwụbɛ ta AGWANGWAMA njɛ eseyida keeni arụhwajɛ a'wụtụ 'wụtụ, a na sukakanɛ atwa Ijipti, tu ga Faro keeni atwa ihwɛ ibwɛ kpaaŋ.

²³Bɛɛ ti bɛcinjɛ apata, iwɛ maa mo tu sugo maa ma tu pana cɛnjɛ tu na bee shileni la eshi tu unu maa bi zhɛ ba pana aŋ.

²⁴Ibɛ po AGWANGWAMA iti peni-unu maa ga tu na nda gana ga kpaaŋ, maa tu na sụma AGWANGWAMA na shɛ Agwatana tu inyɛsɛ, iwɛ tɛzhɛmana tu tu aka elele, iwɛ maa bu na ngbaraka araiŋ tu, gana na ti yaa namɛ hwayɛ ga.

²⁵I zhɛ ma ti shana iyi tiririri, ti yaa shɛ oto shiyono eshe maa ta nda unu-tupana ga kpaaŋ ne eshe AGWANGWAMA na shɛ Agwatana tu, gana na bee ti peni-unu.