Read bassa UNDWA TUKWABILANA 8 Bible Online

UNDWA TUKWABILANA 8 - bassa bible

UNDWA TUKWABILANA 8

¹No shiyono ma unu we elele na Ngee hi peni hwayɛ ga eshe maa hi na nda, iwɛ maa hiɛ yɛ uraiŋ, maa hi keeni ufwugwo tugombo, maa hi zhe hi leshiji cɛnjɛ ta ata AGWANGWAMA shileni la eshi hiŋ unu maa bi zhɛ ba pana aŋ.

²Hiɛ shɛ hi ne teyinje gana na ta AGWANGWAMA na shɛ Agwatana hiŋ ihi 'yagajɛ na tahaŋnụ tu ga tụ ụdụlụ shiywa shɛ ga buhanda nụ ụshɛka, iwɛ maa me hi zucinje, maa ma hi manga, maa mapa iyi nɛ namɛ na shɛmɛ shi hiŋ, okwo hi zhɛ hia untangana onu ubwa tụpana, okwo hi zha shɛ.

³Baa njɛ maa gɛ imunɛ ihiɛ gwụmɛ, baa hiɛ bɛjɛ ni iyi nɛ ɛɛ hiɛŋ mana, na ehi ge te mepi shi la kwukwuŋ, te eshi hiŋ kaa e te mepi shi iŋ la du o. Bɛ njɛ maa hi mepi maa bụtụ yɛ shɛ uraiŋ tedure ni iyimɛyɛ kiri o, semi tedure nu n-ndumwa me elele na mu banɛ nu unu wa AGWANGWAMA.

⁴I'wɛŋnɛ hiŋ tu'urugono injɛ shɛ na tu'waba ti hiŋ o, shiɛvwɛvwɛjɛ shi hiŋ kaa shɛ shanjɛ shɛ, na shiywa shɛ ga buhanda o.

⁵Mapa ma ya na shɛmɛ shi hiŋ maa, gana na ta bụtụ bo vwulo yɛu ibwɛ, ibɛ du AGWANGWAMA na shɛ Agwatana hiŋ mo hi vwulo.

⁶Iwɛ ecilo ata na untangana ma onu-tupana AGWANGWAMA na shɛ Agwatana hiŋ, tedure na tahaŋnụ tizha ni ihwɛŋnɛ ibwɛ keeni inyɛsɛ ibwɛ tụsụma.

⁷Iwɛnɛ po AGWANGWAMA na shɛ Agwatana hiŋ zhɛ mo hi sugo maa hi zhe na cɛnjɛ ta ata ti biye, cɛnjɛ tu nsoso mu meni, mu na mbila keeni ɛmɛzhinjɛ muba a fwunga no olomu keeni nshama.

⁸Cɛnjɛ tu na ta zhɛma iyimɛyɛ wit, keeni iyimɛyɛ bali, ti ikpɛri ya afwafwa keeni owowo keeni apomɛgranɛti, cɛnjɛ tu na i'wɛ'wɛ buta ya zhɛma, meni mi iswɛ mu namɛ na tuba.

⁹Cɛnjɛ tu na iyimɛyɛ zha shɛ ya wvunga, tu na iyi elele zha shɛ ma hi 'nyanana. Aparatayɛ tuba 'yajɛ ashɛmbɛrɛ, tu na ehi eri hio hino bundala ne tikpekwu ta tuba.

¹⁰Aka na ehi teni na cɛnjɛ ta ata ahiɛ 'yajɛ iyi elele nɛ ukekeshi ibɛ ihi to, shɛtana ma AGWANGWAMA na shɛ Agwatana hiŋ iwɛ cɛnjɛ ti biye tu na bee hi peni.

¹¹Na nda ma pece shibwonu isɛbwɛ ya AGWANGWAMA na shɛ Agwatana hiŋ zhɛ mo hi 'wo, iwɛnɛ ahi zha shɛ hia untangana onu ubwa tụpana, to shikpogo shɛ bwa keeni andwa ubwa, anaa na Ama hi pana hwayɛ ga:

¹²Iwɛ aka na ahiɛ 'yajɛ hwuŋ iyimɛyɛ gana na ahia jala, ohi mo shimwono shi biye maa hi nama na shɛba,

¹³keeni aka na ti inɛ hiŋ, na agwụdụ hiŋ a kaana ugombo, na aka na azụrụfa, na azhɛnarɛya hiŋ a kaana ugombo, ti iyi elele nɛ ahiɛ 'yajɛ ya kaana ugombo.

¹⁴Nazhɛ hi na mama sata ya, isɛbwɛ ya AGWANGWAMA na shɛ Agwatana hiŋ na ihi bɛcinjɛ na tijama ta cɛnjɛ ti Ijipti, zhɛ mo hi 'wo ya.

¹⁵Ubwa na kaa ihi 'yagajɛ nụ ụshɛka ga ụ'wụtụ 'wụtụ na kaa wa sha bụtụ inyɛsɛ, unaa na 'yajɛ ahwa mazhanga, ta shɛna keeni cɛnjɛ tu na meni mu zasaba. Ubwa kaa ihi panɛ meni mu na mu banɛ nu utayɛ tubala.

¹⁶Ubwa kaa ihiɛ bɛjɛ nụ ụshɛka nu mana unaa na eshi hiŋ mepi shi, iwɛ maa me hi zucinje maa ma hi manga, maa kaa ma hi ndana iyi ibiye nu ukwunanga.

¹⁷Nda ma pece iwɛ aka na ɛhi zhɛ hiɛ hiɛŋ hwuŋ na shɛmɛ shi hiŋ maa, Ukpahiŋ tu keeni ikɛnyi i'ɛlɛ tu ibɛ iti peni uduciya ga kpaaŋ.

¹⁸Teyinje ma AGWANGWAMA na shɛ Agwatana hiŋ, maa ubwa ihi peni ukpahiŋ maa hi 'yaga uduciya ata; iwɛ maa shikicingo unu ubwa tutwa na bee shileni la eshi hiŋ unu.

¹⁹Ama yaa shɛ isɛbwɛ ya AGWANGWAMA na shɛ Agwatana hiŋ ihi 'wi, ahi 'wa tuwa, ahia zhɛba tụ. Asha Ma hi tɛtagana-unu tebiye tebiye hwayɛ ga maa, Hi zhɛ hia nda ufwu tilɛɛ.

²⁰Yaa shɛ ahiɛ hwụjɛ shɛ unu wa AGWANGWAMA na shɛ Agwatana hiŋ, asha hi zhɛ du hie ilono tilɛɛ gana na AGWANGWAMA iricinji edenji ata nu umbe hiŋ.