Read bassa JON 11 Bible Online

JON 11 - bassa bible

JON 11

¹Bụtụ bu ko namba la ba gwuma, ɛɛ hiɛŋ izeci ibwɛ ga Lazaros, bɛ shɛ bụtụ bu Bɛtani na shɛ ụshɛpwụ Meri buhongwu Mata.

²Ge Meri ata ubwa la 'waŋnɛ manɛbɛ mụ ụhiụŋ ubiye bee dudugeni Agwangwama nu uhiuhiu, harɛ boo wofwoji ɛvwɛvwɛjɛ ubwa ne tihiŋzhe tu bwa. Ikwenyi ibwɛ ga Lazaros ya gwuma.

³Nazhɛ angwụfwụ ubwa tumwanɛ butumwa pi Jisus, ɛɛ hiɛŋ, Agwangwama, bụtụ ata obo lubo ba gwuma.

⁴Aka na ti ge Jisus hwụjɛ iwɛ ɛtɛ, bɛɛ hiɛŋ, Shɛ tu'wo kaa ti zhɛ ta sha ukwunanga ụngwụ ga o, ama iwɛ ụjɛrụma wa Agwatana, iwɛ maa Yɛu ya Agwatana du 'yaga ụjɛrụma tedure nu bwa.

⁵Ge Jisus kaa lubi Mata to buhongwu bwa ge Meri keeni Lazaros.

⁶Okwo ti ge Jisus hwụjɛ maa ga Lazaros ba gwuma, bɛ jɛjɛ waa no ofwo ata baa namɛ ijitɛ iyebi.

⁷Na aba ibɛ, nazhɛ bɛɛ hiɛŋ eseshi-iyi ubwa, Hwure ti zhe ma Judia sasana.

⁸Nazhɛ eseshi-iyi ubwa jishijɛ bụ, ɛɛ hiɛŋ, E-Bimbisegeni, hwuwayɛ hwuwayɛ go Eju ga jala maa e bi tegeni atayɛ, ibɛ hŋ ɛbi zhaananɛ apata?

⁹Ge Jisus jishijɛ aŋ, bɛɛ hiɛŋ, Shɛ auwa umpwa-na-ba-eyebi suu i shɛ ụjita uko? Bụtụ be elele ba zha tahaŋnụ nu uwaŋna bi zha shɛ ba twa udukwutwa o, iwɛnɛ tu baa kwụbɛ uhioko-uhwaŋna unyizo ga.

¹⁰Ama bụtụ be elele na ba zha tahaŋnụ nụ ụjita, ubwa ba twa udukwutwa, iwɛnɛ tu baa zasa uhioko-uhwaŋna.

¹¹Aka na ti ge Jisus jɛmɛ iwɛ gɛ, nazhɛ boo to tuhwulo bɛɛ hiɛŋ aŋ, Biyejilo tu ga Lazaros leyi malabụ, N zhɛ maa mɛ zhingicinjɛ bụ.

¹²Eseshi-iyi ubwa hiɛŋ bụ, Agwangwama, yaa shɛ boo woto malabụ, asha bi zhɛ ba zhɛmanana.

¹³Ama ge Jisus mbishi aŋ ya caakwụ tu'wo tu bwa. E ge heŋshi yebe maa iwɛ malabụ mu ga bụtụ ba ta ụhinjanụ baa njɛ iwɛ muba.

¹⁴Nazhɛ ge Jisus mbishi aŋ ya caakwụ, bɛɛ hiɛŋ, Ga Lazaros 'wi.

¹⁵Ma nda unyasa iwe hŋ iwɛnɛ tu Ngaa zasaba apata, iwɛ maa hiɛ tɛtana-rishe. Hwure ti zhe ma pu bwa.

¹⁶Nazhɛ ga Tomas na shɛ ɛdɛngwurɛbɛ, hiɛŋ eseshi-iyi vwɛ, Hwure tu hwuri ma maa tu 'wi ma du ne Bimbisegeni.[38]

¹⁷Aka na ti ge Jisus ci apata, baa hwụjɛ maa o nuwoŋ Lazaros[39] taa jita neshi na hwayɛ.

¹⁸Ụshɛpwụ ata ɛɛ hiɛŋ Bɛtani kaa gwumwongonu nu Jɛrusalɛm, ụdụlụ ubwa namɛ gana ti imɛle iyebi gba.

¹⁹Eju ofwugwo zhajɛ no ofwo Mata keeni Meri maa a ingatanjɛ aŋ iwɛ ikwenyi ya aba.

²⁰Aka na tu ga Mata hwụjɛ maa ge Jisus be ci ba, bee teji bu uhwaŋna, ama ge Meri tuba ta jɛjɛ nu umwono.

²¹Ga Mata hiɛŋ Jisus, Agwangwama, Yaa shɛ abu ga namba, ikwenyi mi ga zha shɛ yo 'wo yebe o.

²²Okwo hwuwayɛ go, M mepi maa iyi elele nɛ abụ lụpɛ Agwatana, Agwatana kaa zhɛ ma bu pana iŋ.

²³Ge Jisus jishijɛ bụ, bɛɛ hiɛŋ, Ikwenyi bu zhɛ yɛ hiɛ.

²⁴Ga Mata jishijɛ bụ, bɛɛ hiɛŋ, M mepi maa bi zhɛ bɛ hiɛ nɛ tihiɛ tụ ụjita umɛwɛɛ.

²⁵Ge Jisus hiɛŋ bụ, Gamba n shɛ tihiɛ keeni uraiŋ.[40] Bụtụ na n tɛtanɛ-rishe okwo bee 'wi, bi zhɛ ba nama waa;

²⁶atwa elele na kaa namɛ a na n tɛtanɛ-rishe, a zha shɛ o 'wo ya kwukwuŋ. Bu tɛtanɛ iwɛ ɛtɛ rishe suu?

²⁷Ga Mata hiɛŋ bụ, Iiŋ, Agwangwama, N tɛtanɛ-rishe maa gabụ bɛ shɛ ga Krast Yɛu ya Agwatana nɛ ye ci nu unyizo.

²⁸Na aba na tu ga Mata jɛmɛ iwɛ gɛ, bee gwuri baa suyanɛ buhongwu bwa ge Meri swɛɛ, bɛɛ hiɛŋ bụ, Bimbisegeni tuwo, ba bu suyana ba.

²⁹Aka na ti ge Meri hwụjɛ iwɛ ɛtɛ, bɛɛ ishijɛ kakayɛ, bee zhegeni Jisus.

³⁰Ge Jisus te teni shi nụ ụshɛpwụ na aka ata o, ama bu ta namɛ no ofwo ata ga Mata twa nu bwa.

³¹Aka na te Eju ata ga namɛ nu bwa nu umwono a ingatanga bụ kwụbɛ ti bɛɛ ishijɛ kakayɛ bee beni, aa 'wa bụ, ɛ gɛ hiɛŋ okwo nu u'uye bɛɛ zhɛ maa twa-u'wo.

³²Ti ge Meri ci ofwo ata ge Jisus namɛ, aka na tu baa kwụbɛ Jisus, bee leyi nɛ ɛvwɛvwɛjɛ ubwa, bɛɛ hiɛŋ bụ, Agwangwama, yaa shɛ abu ga namba, ikwenyi mi ga zha shɛ ye 'wo yebe o.

³³Aka na ti ge Jisus kwụbɛ ti ge Meri ba twa-u'wo, te Eju na zhagajɛ nu bwa a twa du u'wo. Ge Jisus ngwuleni na amɛ na amɛ ubwa baa mama tuka.

³⁴Bee heŋteni aŋ, bɛɛ hiɛŋ, Cee bwa ehi ni buu? Ɛɛ jishijɛ bụ, ɛɛ hiɛŋ, Iyɛri, zhajɛ kwụbɛ.

³⁵Ge Jisus cwɛ-u'wo.

³⁶Ibɛ po Eju ata hiɛŋ, Hioko ma, gana na tu bee lubi bu duwa.

³⁷Ama atwa oko na ashashɛ aba hiɛŋ, Bụtụ ga ubwa ushije eshe olubo, bi ge eri shi suu ba nda gana elele maa kede bụtụ ga du 'wi yebe?

³⁸Ge Jisus mama tuka sasana na amɛ na amɛ ubwa, bee zhe nu u'uye ata. Ụpangwụ kaa waa shɛ, utayɛ kaa ee kepi unu ubwa.

³⁹Ge Jisus hiɛŋ aŋ, Ushigo ma utayɛ ga. Ga Mata na shɛ bụngwụfwụ bụtụ ata, hiɛŋ bụ, Agwangwama, bi 'yajɛ ya ụhiụŋ, taa jita neshi na hwayɛ te e ni bu.

⁴⁰Ge Jisus jishijɛ bụ, bɛɛ hiɛŋ, M bu hiaŋ shɛ suu maa yaa shɛ abu tɛtanɛ-rishe, bi zhɛ ba kwụba ụjɛrụma wa Agwatana?

⁴¹Nazhɛ ee ushiji ga utayɛ ata. Ge Jisus shepi eshe ubwa na azuba, bɛɛ hiɛŋ, Ada, N njɛ ugwoje bu ta aba hwuga iwe mi.

⁴²M mepi ni ikɛnyi mi maa ba hwuga iwe mi aka elele. Ama N jɛmɛ iwɛ gɛ iwɛ maa ofwugwo ga rungwutwonu epe tɛtana-rishe maa gabụ bu n tumwanɛ.

⁴³Aka na tu baa jɛmɛ iwɛ ɛtɛ, baa uganɛ duwa, bɛɛ hiɛŋ, Lazaros, banɛ!

⁴⁴Nazhɛ bụtụ ebe ge 'wi banɛ ga, apashɛ te umpenji i'ɛlɛ ibwɛ tɛ ɛvwɛvwɛjɛ ubwa. Ikerenu du te peri nu unu ubwa. Ge Jisus hiɛŋ aŋ, Tufwurungo bu ma maa hwulo.

⁴⁵Ibɛ po Eju ofwugwo a na zhe pi Meri, a na kaa kwụbɛ ijɛ ge Jisus njɛ, tɛtanɛ bụ rishe.

⁴⁶Ama atwa oko na ashashɛ aba zhe pa Afarisi, ee mbishi aŋ iyi nɛ ge Jisus njɛ.

⁴⁷Ibɛ po ehiu onongbo na Afarisi suyanɛ ajɛmɛ-ụshɛrɛya maa a ụlwatagwụ, ɛɛ hiɛŋ, Nanaa ɛti zhɛ ta nda maa? Bụtụ ga ba nda arụhwajɛ ofwugwo.

⁴⁸Yaa shɛ eti genji bu gana ga, atwa kpaaŋ zhɛ a tɛtana bụ rishe, nazhɛ Orom zhɛ a zhajɛ a lashɛga[41] Umwono ga tu wa Agwatana, tu udenji tu[42] hwɛɛ ni i'ɛlɛ tu.

⁴⁹Ama bụtụ bu ko na ashashɛ aba na ɛɛ hiɛŋ ga Kayafas, na shɛ du kaa Bunongbo bụ 'wụtụ nu uywa ata, jishijɛ aŋ, bɛɛ hiɛŋ, Hi mepi shi ga iyi elele kwukwuŋ!

⁵⁰Asha hi mepi shi ree maa i shɛ titeni ti hiŋ maa ga bụtụ bu ko 'wi iwɛ atwa, iwɛ maa kede udenji ileni hwɛ hwɛɛ o?

⁵¹Bɛ jɛmɛ shɛ iwɛ gɛ na tuhaŋsa ti ikɛnyi ibwɛ o, ama iwɛnɛ tu baa shɛ Bunongbo bụ 'wụtụ nu uywa ata, ibɛ po baa jɛmɛ tigesere maa ge Jisus zhɛ bo 'wo iwɛ udenji wa aba,

⁵²ama shɛ iwɛ udenji wa aba kiri o, ama iwɛ maa sotulonu du miaụŋ ma Agwatana mu na mu garatagwụ.

⁵³Te kwuni ya jita ata, Eju a haŋsagana Jisus gana na maa a kwụnɛ bụ.

⁵⁴Iwɛbɛ po ge Jisus rinji shi ya caakwụ na ashashɛ Eju, ama bu beni apata bee teni nụ ụshɛpwụ na ɛɛ hiɛŋ, Ifrem, ne shihilo shɛ na shi gwumwongonu nụ ụshɛka, apata baa namɛ ne eseshi-iyi ubwa.

⁵⁵Isene Tɛkashɛka ye Eju gwumwonu, ibɛ po atwa ofwugwo bananjɛ ne shihilo ee munji Jɛrusalɛm tobwolo ụjita Isene te ci shi o, iwɛ maa a mama njɛ shɛshɛshɛ gana na tu Undwa we Eju hiɛŋ.

⁵⁶Ee kwuni Jisus tijalakaka, ee shikekeni nu Umwono wa Agwatana, oo momo hoŋtongonu, ɛɛ hiɛŋ, Imbe ehi heŋshii? Asha bi zha shɛ ree ba zhajɛ Isene gɛ kwukwuŋ?

⁵⁷Nazhɛ ehiu onongbo keeni Afarisi peni atwa unu maa bụtụ be elele na mepi ofwo na baa namɛ, ga duma iwɛ maa ɛ imɛ bu.