Read bassa JON 14 Bible Online

JON 14 - bassa bible

JON 14

¹Ge Jisus hiɛŋ eseshi-iyi ubwa, Kede shihwulu shi hi horukono. Hiɛ tɛtanɛ Agwatana rishe,[46] n tɛtana ma du rishe.

²Ohwolu tuzwono barɛ ba ni ihwɛ Bishi mi. Yaa ga shɛ shɛ gana ata, N gɛ zhɛ mo hi mbiso, ama N zhɛ mo hi hwulono maa Ma hi imangana ohwolu.

³Yaa shɛ Ngee zhe Ngaa hi imanganɛ ofwo, N zhɛ ma zhajɛ sasana, maa Mo hi sugo pi mi, maa hi nama du no ofwo ata Ngaa namɛ.

⁴Hi mepi kaa uhwaŋna ofwo ata Ngɛɛ zhɛ.[47]

⁵Go Tomas hiɛŋ bụ, Agwangwama, ti mepi shi kaa ofwo ata ɛbi zhɛ, gana na ɛti zhɛ ta mapa ya uhwaŋna wa abaa?

⁶Ge Jisus jishijɛ bụ, bɛɛ hiɛŋ, Gamba n shɛ uhwaŋna, ti iwɛ-tɛkana, tu uraiŋ ata. I zasa bụtụ be elele na eri bo to pe Bishi mi ti yaa shɛ bee duri shi pi mi o.

⁷Yaa shɛ ehi m mwopwo,[48] asha hi mepi du Bishi mi. Te kwuni na aka ga hi mepi bu ya, ahi kwụbwa bụ du kaa.

⁸Ge Filip hiɛŋ bụ, Agwangwama, iti mbiseni Bishi, asha inɛ ɛtɛ iti gwumwa.

⁹Ge Jisus jishijɛ bụ, bɛɛ hiɛŋ, E-Filip, N namwawaŋ te ilegeji ne hiŋ, bi te me mepi shi waa hŋ? Bụtụ na n kwụbwa, asha bu kwụbwa du Bishi mi. Gana naa ebi te eri bɛ hiɛŋ yɛ maa, Iti mbiseni Bishii?

¹⁰Bu tɛtanɛ shɛ suu rishe maa N namɛ na amɛ Bishi, Bishi du namɛ na amɛ mi? N-ndumwa mu ga Omo hi mbiso, shɛ nu ukpahiŋ mu Ama duma mu o, ama Bishi ata namɛ na amɛ mi ubwa ba nda ugondu ata.

¹¹N tɛtana ma rishe maa N namɛ na amɛ Bishi, Bishi du kaa namɛ na amɛ mi; shibwonu asha n tɛtana ma rishe iwɛ ogondu ga Ama ndangana.

¹²Iwɛ-tɛkana Omo hi mbiso maa, bụtụ na n tɛtanɛ-rishe, bi zhɛ ba nda du ogondu ga Ama nda, bɛɛ zhɛ kaa ba nda du ogondu na hwuri a na ga, iwɛnɛ ti Ngɛɛ zhɛ pe Bishi mi.

¹³Iyi elele nɛ kaa ɛhi zhɛ hia lụpa ni izeci mi, N zhɛ ma hi ndana iŋ, iwɛ maa Bishi 'yaga ụjɛrụma tedure ni Yɛu.

¹⁴Yaa shɛ ɛhi zhɛ hia lụpa iyi elele ni izeci mi,[49] N zhɛ ma hi ndana iŋ.

¹⁵Yaa shɛ ehi n lubi, hi zhɛ hia hwuga-unu onu-tupana mi.

¹⁶Gamba n zhɛ ma lụpa Bishi nazhɛ bɛɛ zhɛ ma hi panɛ bụsụmɛ-bu-uno bi nya na zhɛ ba nama ne hi unyizo-nom.

¹⁷Ubwa shɛ Mpiala mu na mo mbisono atwa gana na Agwatana shɛ, mu na kaa unyizo eri shi wa lashɛga, iwɛnɛ tu unyizo hieci shi bu, unyizo kaa mepi shi bu o. Ama hi mepi bu, iwɛnɛ tu baa namɛ ne hiŋ, bɛɛ tɛ zhɛ kaa ba nama[50] na shɛmɛ shi hiŋ.

¹⁸N zha shɛ ma hi ganga maa hiɛ shɛ gana miaụŋ-me-e'weteji o, N tɛ zhɛ ma zhajɛ pi hiŋ.

¹⁹I vwɛ cwɛŋ tu unyizo zha shɛ ma n kwụba ya, ama hi zhɛ hi na ma kwụba, iwɛnɛ tu Ngaa shɛ buumwa, hi zhɛ du kaa hia sha buumwa.

²⁰Ụjita ata ci hwuŋ, nazhɛ ɛhi zhɛ hia mapa maa N namɛ na amɛ Bishi mi, ahi namɛ du na amɛ mi, Ngaa namɛ du kaa na shɛmɛ shi hiŋ.

²¹Bụtụ na 'yajɛ onu-tupana mi, na kaa ba hwuga-unu wa aba, asha ubwa mo n lubo. Bụtụ na kaa mo n lubo, Bishi mi zhɛ bo lubo bu du, Ngɛɛ zhɛ du mo lubo bu, Ngɛɛ zhɛ kaa m momo mbisono bu caakwụ.

²²Ga Judas na shɛ shɛ una Iskariot heŋteni bu, bɛɛ hiɛŋ, Agwangwama, iwembe po yaa shɛ atuba ɛbi zhɛ bu momo mbisono caakwụ, yaa shɛ shɛ atwa unyizoo?

²³Ge Jisus jishijɛ bụ, bɛɛ hiɛŋ, Yaa shɛ bụtụ be elele mo n lubo, bi zhɛ na hwuga-unu imbisegeni mi, nazhɛ Bishi mi zhɛ bo lubo bu, nazhɛ ɛti zhɛ ta zhajɛ te Bishi mi maa ta nama na amɛ bụtụ ata.

²⁴Bụtụ na n lubi shi, bụ hwụjɛ shɛ du unu imbisegeni mi o. N-ndumwa mu ga kaa ahia hwuga mɛ shɛ shɛ mi nee mi o, ama mu na me Bishi mi na n tumwanɛ.

²⁵N hi mbishi ijɛ kpaaŋ tu Ngaa ta namɛ ne hiŋ.

²⁶Bụsụmɛ-bu-uno na shɛ Mpiala mi Tijilo, na Bishi zhɛ ba tumwanɛ ni izeci mi, ubwa zhɛ mo hi mbisogono iyi elele, bɛɛ zhɛ kaa du ne hi teyingeni iyi elele nɛ Ngee hi mbishi.

²⁷Amɛ-olom Ngɛɛ zhɛ ma hi gangana, amɛ-olom mi aba Ama hi pana. Shɛ gana na tu unyizo wa pana bụtụ Ama hi pana o. Kede shihwulu shi hi horukono, ta nda ma du kaa okwo inyɛsɛ o.

²⁸Hi hwugwa ti Ngee hi mbishi maa, N zhɛ mo hwulo, Ngɛɛ zhɛ kaa ma zhagananɛ pi hiŋ. Ehi ge me lubi, asha hi nduwa unyasa iwɛnɛ ti Ngɛɛ hiɛŋ, N zhɛ mo hwulo pe Bishi, iwɛnɛ te Bishi mi n hwuri.

²⁹N hi mbiswo ijɛ hwuwayɛ tobwolo aka te ci shi o, iwɛ maa aka na yee ci hwuŋ maa hiɛ.

³⁰N zha shɛ ma dumanga ya n-ndumwa te ilegeji ne hiŋ duwa o, iwɛnɛ tu uhiu unyizo ga we ci ba, ama bu zasa tuba ukpahiŋ bee n hwuri o.

³¹Ama iwɛ maa unyizo mepi maa Mo lubo Bishi, maa kaa gana na te Bishi m peni-unu, gana ata du Ama nda iyi. Ishijɛ ma ti genji ma epe.