Read bassa JON 6 Bible Online

JON 6 - bassa bible

JON 6

¹Na aba inɛ gɛ, ge Jisus beni apata, bee zhe hileniye Itekwu Galili nɛ shɛ itekwu Taibirias.

²Atwa ofwugwo ụ'wụtụ 'wa bụ, iwɛnɛ ta a kwụbɛ arụhwajɛ na baa nda no ofwo agwumashɛ.

³Ge Jisus munji ne embi ishɛmɛ ike, baa jɛjɛ apata ne eseshi-iyi ubwa.

⁴Isene Tɛkashɛka ye Eju kaa gwumwonu na aka ata.

⁵Aka na ti ge Jisus hirinje, baa kwụbɛ unyama ụ'wụtụ tu wee ci pu bwa, bɛɛ hiɛŋ Filip, Cee ɛti zhɛ ti mɛ sɛ iyimɛyɛ nɛ maa atwa ga yɛɛ?

⁶Ama bɛ jɛmɛ iwɛ gɛ maa manga Filip, shibwonu bu mwopwo iyi nɛ bɛɛ zhɛ ba nda.

⁷Ge Filip jishijɛ bụ, bɛɛ hiɛŋ, Iyimɛyɛ ya apamụ umpwa[23] kaa zha shɛ yo gombo aŋ maa bụtụ bụtụ ya okwo cwɛŋ o.

⁸Ibɛ po yɛu-bino Pita ga Andru na shɛ bụtụ bu ko na ashashɛ eseshi-iyi ubwa hiɛŋ bụ,

⁹Yɛu-ye-eyi ike namba nɛ 'waŋnɛ mbrad mu bali mu ta keeni ijɛnɛ iyebi, imbe kaa inɛ ɛtɛ eri ya nda na ashashɛ unyama gaa?

¹⁰Ge Jisus hiɛŋ aŋ, Hiɛŋ ma atwa maa ga a gɛgaga. Ambɛ olom kaa namba apata duwa. Ibɛ etwenyi gɛgajɛ, ofwugwo wa aba namɛ gana igbɛɛ-iyebi-na-akpakwụ-a-ta (5,000).

¹¹Ge Jisus suji mbrad ma ata baa njɛ ugwoje na Agwatana, gobwonu du baa njɛ ni ijɛnɛ ɛtɛ, nazhɛ bee peni atwa ata gɛgajɛ gana na eri o gombo aŋ.

¹²Aka na ta atwa ata shigeji, ge Jisus hiɛŋ eseshi-iyi ubwa, Sutono ma owunzu mbrad ma ata mụ vwɛ urubwo uko, maa kede a na elele njɛ ufwu o.

¹³Ee suteni aŋ ga urubwo uko, owunzu na vwanɛ atwa ata yɛ mbrad ma ata mu bali mu ta, e shidinji shɛrɛgada umpwa-na-shɛba-shi-yebi.

¹⁴Aka na ta atwamwa kwụbɛ ụrụhwajɛ ata ge Jisus njɛ, ɛɛ hiɛŋ, Iwɛ-tɛkana ubwa ga shɛ bigesere ata be ci nu unyizo.

¹⁵Ama ti ge Jisus mepi maa ɛ zhɛ a ima bụ maa a njɛ bụ agwuma ni iji, bee beni apata bee gwuri ne embi ishɛmɛ bwooko.

¹⁶Aka na tụ ụrụmɛ shɛ, eseshi-iyi Jisus zwe nụ ụpalanụ itekwu,

¹⁷ee teni nụ ụhaŋtụ, maa e keshi hileniye itekwu ɛtɛ maa e zhe Kapanaum. Aka ata ụjita kaa shiwo cebe, ge Jisus kaa te zhe shi no ofwo aba o.

¹⁸Uvwugo ụ'wụtụ ta kaa layɛ ni itekwu ɛtɛ, itekwu ya nda adanga.

¹⁹Gana na te eseshi-iyi heŋteni ụhaŋtụ ata gana imɛle itɛtu kwo kaa ineshi, aa kwụbɛ ti ge Jisus be ci tahaŋnụ ni itekwu ɛtɛ, bɛɛ zhɛ bo dongonu ụhaŋtụ wa aba, ibɛ po inyɛsɛ shɛ aŋ.

²⁰Ama ge Jisus hiɛŋ aŋ, Gamba na, ta nda ma inyɛshɛ o.

²¹I ga kwụlanɛ eseshi-iyi ubwa maa e shepi bu nụ ụhaŋtụ ata, gunu ata ụhaŋtụ ci ya ofwo na ɛɛ gɛ zhɛ.

²²Aka na ti iyi heri, ibɛ atwa ata ofwugwo a na ge shikekeni hileniye ukwoswo itekwu ɛtɛ kwụbɛ maa ụhaŋtụ uko ticwɛŋ kiri ga namɛ apata, ge Jisus kaa teni shi uŋ ne eseshi-iyi ubwa o, semi eseshi-iyi ubwa abaaba kiri ge teni uŋ.

²³Ama ihɛŋtu ike ticwɛŋ cwɛŋ banɛ ni Taibirias, yɛɛ zhɛ yo dongonu ofwo ata atwa ga yɛ mbrad na aba na ta Agwangwama njɛ ugwoje.

²⁴Gana na ta atwa ata kwụbɛ maa ge Jisus zasaba ya apata te eseshi-iyi ubwa o, ibɛ po atwa ata teni ụhaŋtụ abaaba ee zhe Kapanaum, aa jalakaka bụ.

²⁵Aka na ta atwa ata to Jisus ugbe hileniye itekwu ɛtɛ, ɛɛ hiɛŋ bụ, E-Bimbisegeni, aka naa abi zhajɛ epee?

²⁶Ge Jisus jishijɛ aŋ, bɛɛ hiɛŋ, Iwɛ-tɛkana Omo hi mbiso maa, shɛ iwɛ arụhwajɛ na ahiɛ kwụbɛ upo ahi ma n jalakaka o, ama iwɛnɛ ahi ga yɛ mbrad ma ata ehi shigeji.

²⁷Ta na nda ma ugondu iwɛ iyimɛyɛ nɛ zhɛ ya nda ufwu o, ama ga shɛ iwɛ iyimɛyɛ nɛ zhɛ ya nama tutu uraiŋ unyizo-nom, inɛɛ nɛ Yɛu Bụtụ zhɛ ma hi pana. Iwɛnɛ po ubwa Agwatana Bishi utegeni ụhwada maa bu na duma ụshɛrɛya, iwɛnɛ tu baa shɛ Yɛu Bụtụ.

²⁸Nazhɛ atwa ata heŋteni Jisus, ɛɛ hiɛŋ, Imbe ɛti zhɛ ta nda maa ta nda ugondu wa Agwatanaa?

²⁹Ge Jisus jishijɛ aŋ, bɛɛ hiɛŋ, Iyi nɛ shɛ ugondu wa Agwatana na, tɛtana ma bụtụ ata baa tumwanɛ rishe.

³⁰Ee heŋteni Jisus, ɛɛ hiɛŋ, Imbe shɛ ụrụhwajɛ na aba nda maa ta kwụba maa ta bu tɛtana-rishee? Ugondu imbe kwuŋ aba ndaa?

³¹Eshi tu yɛ la mana nụ ụshɛka, gana na te e 'nyeci, ɛɛ hiɛŋ, Ubwa peni aŋ iyimɛyɛ ɛtɛ banɛ na azuba aa yɛ.

³²Ge Jisus hiɛŋ aŋ, Iwɛ-tɛkana Omo hi mbiso maa, shɛ go Moses ihi peni la iyimɛyɛ ɛtɛ banɛ na azuba o, ama Bishi mi ubwa ma hi pana iyimɛyɛ i tugom nɛ banɛ na azuba.

³³Iwɛnɛ po iyimɛyɛ ya Agwatana nɛ banɛ na azuba, ibɛ ya pana atwa unyizo uraiŋ.

³⁴Ibɛ po atwa ata hiɛŋ Jisus, Asha na tu pana iyimɛyɛ ɛtɛ aka elele.

³⁵Ge Jisus hiɛŋ aŋ, Gamba n shɛ iyimɛyɛ ɛtɛ uraiŋ, bụtụ na zhajɛ pi mi, imunɛ zha shɛ ya gwuma bu ya kwukwuŋ, bụtụ na kaa du n tɛtanɛ-rishe, i'uyɛ zha shɛ yo ilo bu ya kwukwuŋ.

³⁶Ama N hi mbiswo, Ngɛɛ hiɛŋ, Hi n kwụbwa, hi n tɛtanɛ shɛ kaa rishe o.

³⁷Iyi elele keeni atwa elele na Bishi m peni, ɛ zhɛ a zhajɛ pi mi, bụtụ na kaa zhajɛ pi mi, N zha shɛ ma bacɛnga bụ o.

³⁸M beni shi na azuba, maa ma nda ukwulana mu o, semi maa ma nda ukwulana bụtụ na n tumwanɛ.

³⁹Ukwulana bụtụ ata n tumwanɛ ụ shɛ maa kede ma inzhɛnga iyi nɛ bee m peni okwo ike o, semi iwɛ maa mɛ hicinjɛ iŋ hwuŋ nụ ụjita umɛwɛɛ.

⁴⁰Ukwulana Bishi mi ụ shɛ maa, atwa elele na kwụbɛ Yɛu, a na kaa tɛtanɛ bu rishe, ɛ zhɛ a 'yaga uraiŋ unyizo-nom, N zhɛ mɛ hicinjɛ aŋ hwuŋ nụ ụjita ata umɛwɛɛ.

⁴¹Eju ngwulengenji iwɛ Jisus, iwɛnɛ bɛɛ hiɛŋ, Gamba n shɛ iyimɛyɛ ɛtɛ banɛ na azuba.

⁴²Ɛɛ hiɛŋ, Shɛ ubwa maa shɛ ge Jisus yɛu Josɛf ga? Ti mepi kaa bishi bwa, te bino bwa. Gana naa bɛɛ hiɛŋ ya maa na azuba baa banɛɛ?

⁴³Ge Jisus jishijɛ aŋ, bɛɛ hiɛŋ, to ngwulongongo ma ahiɛba hiɛba o.

⁴⁴I zasa bụtụ be elele na eri bɛ zhɛ pi mi o, semi bụtụ na Bishi na n tumwanɛ mbɛ, nazhɛ Ngɛɛ zhɛ mɛ hicinjɛ bụtụ ata nụ ụjita umɛwɛɛ.

⁴⁵Egesere 'nywotwo na atakada aba, ɛɛ hiɛŋ, Agwatana zhɛ o mbisogono aŋ iyi kpaaŋ aba. Atwa elele na kaa hwụjɛ iwɛ Bishi, yaa shɛ ee seshi, e ci pi mi.

⁴⁶I zasa kaa bụtụ be elele na kwụbwa Bishi o, semi ubwa ata na banɛ no olugwo Agwatana, ubwa kiri kwụbwa Bishi ata.

⁴⁷Iwɛ-tɛkana Omo hi mbiso maa, Bụtụ be elele na n tɛtanɛ-rishe, asha bi 'yajɛ uraiŋ ata unyizo-nom.

⁴⁸Gamba n shɛ Iyimɛyɛ ɛtɛ uraiŋ.

⁴⁹Okwo to ogwunukwoshi hiŋ yɛ la mana ata nụ ụshɛka, ama e 'wi kaa waa.

⁵⁰Ama iyimɛyɛ gɛ banɛ na azuba i shɛ iwɛ maa bụtụ be elele na yɛ iŋ maa kede 'wo.

⁵¹Gamba n shɛ iyimɛyɛ ɛtɛ uumwa, nɛ banɛ na azuba. Yaa shɛ bụtụ be elele yɛ iyimɛyɛ gɛ, bi zhɛ ba ya uraiŋ unyizo-nom. Iyimɛyɛ gɛ Ngɛɛ zhɛ ma pana atwa, ibɛ i shɛ usunda-tu'waba mu, N zhɛ kaa ma pana iŋ iwɛ uraiŋ wa atwa unyizo.

⁵²Eju kwuni ashamanjɛ abaaba, ɛɛ hiɛŋ, Gana naa bụtụ ga eri ma tu pana usunda-tu'waba ubwa maa ta yaa?

⁵³Ge Jisus hiɛŋ aŋ, Iwɛ-tɛkana Omo hi mbiso maa, yaa shɛ ahiɛ yɛ shɛ usunda-tu'waba ti Yɛu Bụtụ, ehi swe shi kaa du mehieŋ mu bwa, asha hi zha shɛ hia 'yaga uraiŋ o.

⁵⁴Bụtụ na ba ya usunda-tu'waba mu, na kaa ba swa du mehieŋ mi mi, asha bi 'yajɛ uraiŋ unyizo-nom, nazhɛ Ngɛɛ mɛ hicinjɛ bụ nụ ụjita umɛwɛɛ.

⁵⁵Usunda-tu'waba mu ụ shɛ iyimɛyɛ i tugom, mehieŋ mi mi kaa du mɛ shɛ iyi tuswa i tugom.

⁵⁶Bụtụ na ba ya usunda-tu'waba mu, na kaa du ba swa mehieŋ mi mi, asha bu namɛ na amɛ mi, Ngaa namɛ kaa du na amɛ ubwa.

⁵⁷Gana na te Bishi buumwa n tumwanɛ, Ngaa shɛ du buumwa tedure nu ukpahŋ Bishi, gobwonu du bụtụ na n yɛ zhɛ ba sha buumwa tedure nu ukpahiŋ mu.

⁵⁸Iyimɛyɛ nɛ banɛ na azuba na, shɛ gana na te eshi hiŋ yɛ la mana ee 'wi o, ama bụtụ na ba ya iyimɛyɛ gɛ, bi zhɛ ba nama unyizo-nom.

⁵⁹Ge Jisus jɛmɛ iwɛ gɛ na aka na tu boo mbisogono atwa iyi nu umwono tu'ulwa nu Kapanaum.

⁶⁰Aka na ta atwa ofwugwo na ashashɛ eseshi-iyi Jisus hwụjɛ iwɛ ɛtɛ, ɛɛ hiɛŋ, Iwɛ gɛ 'yajɛ ikɛnyi, gaaba eri ba hwuga iiŋ?

⁶¹Ama ti ge Jisus mepi na amɛ ubwa maa eseshi-iyi ubwa o ngwulongongo iwɛ n-ndumwa ma ata, bɛɛ hiɛŋ aŋ, Iwɛ gɛ hŋ ihi gwumanɛ?

⁶²Asha gana naa ɛhi zhɛ hia nda hwuŋ ta ahiɛ kwụbɛ ti Yɛu Bụtụ zhɛ umungwo na azuba no ofwo na baa banɛ laa?

⁶³Mpiala ma Agwatana muba ma pana atwa uraiŋ, ama usunda-tu'waba zasa ule o. N-ndumwa mu ga Ngaa jɛmɛ ne hiŋ mu banɛ na Mpiala ma Agwatana, n-ndumwa ma ata muba kaa ma pana bụtụ uraiŋ.

⁶⁴Ama atwa oko na ashashɛ hiŋ tɛtanɛ shɛ kaa rishe o. Ge Jisus mepi kaa taa nu umozhigo atwa na tɛtanɛ shɛ bụ rishe, bee mepi kaa du bụtụ na zhɛ ba sangana bu atwa ne tidere.

⁶⁵Nazhɛ ge Jisus hiɛŋ, Ibɛ po Ngee hi mbishi maa i zasa bụtụ na eri ba zhajɛ pi mi ti yaa shɛ shɛ Bishi kepishingeni bu uhwaŋna o.

⁶⁶Te kwuni na aka ata atwa ofwugwo na ashashɛ eseshi-iyi Jisus gwuri ne ekwunyi, a 'wa sụ bụ ya o.

⁶⁷Ge Jisus hiɛŋ eseshi-iyi ubwa umpwa-na-ba-eyebi, Hi zhɛ du hio gwulo ne ekwunyi suu?

⁶⁸Ga Saimon Pita jishijɛ bụ, bɛɛ hiɛŋ, Agwangwama, no ofwo aba ɛti zhɛ ta zha yaa? Gabụ kaa bi 'yajɛ n-ndumwa mu uraiŋ unyizo-nom.

⁶⁹Ati tɛtanɛ kaa rishe, eti mepi kaa maa gabụ bɛ shɛ Bụtụ bi Tijilo ba Agwatana.

⁷⁰Ge Jisus jishijɛ aŋ, bɛɛ hiɛŋ, Shɛ Gamba suu n hi teri ahiɛba eseshi-iyi ga umpwa-na-ba-eyebi? Ama bụtụ bu ko na ashashɛ hŋ kaa shɛ butumwa-bi-ibiri!

⁷¹Iwɛ Judas yɛu Saimon Iskariot[24] kaa baa njɛ, ubwa shɛ bụtụ ata zhɛ ba sanga bu ne tidere, ubwa kaa namɛ na ashashɛ atwa ata umpwa-na-ba-eyebi.