Read bassa JON 7 Bible Online

JON 7 - bassa bible

JON 7

¹Na aba inɛ gɛ, ge Jisus tenenji ofwo elele nu Galili, ama bi jeri shi maa tonongo Judia o, iwɛnɛ te Eju a jala bụ tụkwụna.

²Na aka ga ibɛ Isene Shidulo ye Eju gwumwonu.

³Ibɛ po ohongwu Jisus hiɛŋ bụ, Ishijɛ maa zhe Judia, iwɛ maa eseshi-iyi bu kwụbɛ du ugondu na aba nda.

⁴I zasa bụtụ be elele na zhɛ na nda iyi ne tusweci tu baa jala maa atwa kpaaŋ mepi bu o. Ama gana na aba ndangana ijɛ kpaaŋ, asha meme mbiseni atwa unyizo.

⁵Okwo ohongwu ata ubwa tɛtanɛ shɛ bụ du rishe o.

⁶Ge Jisus jishijɛ aŋ, bɛɛ hiɛŋ, Aka mi te ci shi o, ama aka hiŋ ihi namanɛ tutu.

⁷Atwa unyizo eri shi ma hi ta ni i'ime o, ama Gamba oo to ni i'ime, iwɛnɛ ti Ngee le tiseyida ta aba maa ugondu wa aba ụ shɛ ugondu ụwɛ.

⁸No hwulo ma Isene gɛ ahiɛba hiɛba, N ta zha shɛ[25] Isene gɛ o, iwɛnɛ ta aka mi te ci shi.

⁹Aka na ti bee mbishi aŋ iwɛ gɛ, Baa jɛjɛ waa nu Galili.

¹⁰Ama aka na to ohongwu Jisus hwuri ee zhe Isene ɛtɛ, ubwa du zhe Isene ɛtɛ, bi zhe shi tuba caakwụ o, ama ne tusweci.

¹¹Eju jelekeci bu ni Isene ɛtɛ, ɛɛ hiɛŋ, Cee baa namɛɛ?

¹²Atwamwa o ngwulongongo duwa iwɛ ubwa. Atwa oko hiɛŋ, Bɛ shɛ bụtụ bi biye. Ama atwa oko hiɛŋ, Awo, ba inzhanga atwa ofwugwo.

¹³Okwo ti yaa shɛ gana ata, i zasa bụtụ na jɛmɛ iwɛ ubwa caakwụ nu ukpogwu o, iwɛnɛ ta a nda inyɛsɛ ye Eju.

¹⁴Aka na ti Isene ɛtɛ ci ashashɛ, nazhɛ ge Jisus zhe bee teni nu Umwono wa Agwatana bee kwuni atwa iyi timbisogono.

¹⁵Iwɛ ubwa dama Eju tebiye, ɛɛ hiɛŋ, Gana naa bụtụ ga njɛ bee mepi iyi gana ga, ti bee seshi shi kaaa?

¹⁶Ge Jisus jishijɛ aŋ, bɛɛ hiɛŋ, Shɛ Gamba n 'yajɛ imbisegeni gɛ Ama nda o, ama bụtụ ata n tumwanɛ ubwa 'yajɛ iŋ.

¹⁷Bụtụ be elele na ba jala maa nda ukwulana wa Agwatana, ubwa zhɛ ba mapa iwɛ imbisegeni gɛ okwo inɛ ya Agwatana yaa shɛ kwo kaa nụ ụhwada mu Ama duma iwɛ gɛ.

¹⁸Bụtụ na ba duma iwɛ nụ ụhwada ubwa, asha ba jala ụjɛrụma uhiuhiu ubwa. Ama bụtụ na ba jala ụjɛrụma bụtụ na tumwanɛ bụ, ubwa shɛ bụtụ tɛkana, orugwusu zasaba na amɛ ubwa o.

¹⁹Go Moses ihi peni shi la Undwa suu? I zasa kaa bụtụ be elele ba nda Undwa ata na ashashɛ hiŋ o. Iwembe po ahi ma jala tụkwụnaa?

²⁰Ibɛ po unyama ata jishijɛ bụ, ɛɛ hiɛŋ, Butumwa-bi-ibiri namɛ na amɛ bụ. Gaaba ma bu jala tụkwụnaa?

²¹Ge Jisus jishijɛ aŋ, bɛɛ hiɛŋ, N nduwa ugondu uko na u hi dama kpaaŋ hiŋ.

²²Go Moses ihi eni maa hi na jaja teleyi ta miaụŋ mi hiŋ, (okwo ti yaa shɛ shɛ go Moses ihi eni iŋ, ama i banɛ taa no ogwunukwoshi hiŋ a na namba la cala) ahia jaja kaa teleyi ta miaụŋ mi hiŋ nụ Ụjita-ụhinjanụ.

²³Yaa shɛ teleyi tijaja nụ Ụjita-ụhinjanụ ti heshigeni shi Undwa Moses, asha iwembe po ahia nda ya isɛbwɛ ne mi iwɛnɛ tu Ngaa nɛnjɛ bụtụ nụ Ụjita-ụhinjanụụ?

²⁴Ta na duma ma ụshɛrɛya gana na ta ahiɛ kwụbɛ iyi no tupohondo, ama na duma ma ụshɛrɛya u tishiriri.

²⁵Nazhɛ atwa Jɛrusalɛm oko hiɛŋ, Shɛ bụtụ ganana hŋ aa jala tụkwụna?

²⁶Hioko ma ba duma kaa n-ndumwa caakwụ, a hiaŋ shɛ bụ kaa iwɛ ye elele o! Ehiu eshiciji suu maa ga Krast ata na?

²⁷Ti mepi olugwo na bụtụ ga banɛ, ama aka na ga Krast zhɛ ba zhajɛ, i zasa bụtụ zhɛ ba mapa olugwo na bɛɛ zhɛ ba banɛ o.

²⁸Nazhɛ ge Jisus uganɛ tu boo mbisogono aŋ iyi nu Umwono wa Agwatana, bɛɛ hiɛŋ, Hi m mepi, ehi mepi kaa du olugwo na Ngaa banɛ. Ama shɛ nu ukpahiŋ mu Ngaa zhajɛ o, ama bụtụ na n tumwanɛ ubwa shɛ bụtụ tɛkana; hi mepi shi bu kaa,

²⁹ama ɛɛ hiɛŋ Gamba M mepi bu, no olugwo ubwa Ngaa banɛ, ubwa du kaa n tumwanɛ utumwa.

³⁰Iwɛbɛ po Eju[26] a jala maa a 'imɛ Jisus, ama i zasa bụtụ na timengeni bu, iwɛnɛ ta aka ubwa te ci shi.

³¹Ama atwa ofwugwo na ashashɛ atwa ata tɛtanɛ Jisus rishe, ɛɛ hiɛŋ, Aka na ga Krast ata zhajɛ, bi zhɛ suu ba nda arụhwajɛ uhwuri a na ga bụtụ ga ba nda?

³²Afarisi hwụjɛ ta atwa ofwugwo o ngwulongongo iwɛ Jisus, ibɛ po ehiu onongbo keeni Afarisi tumwanɛ edegeri umwono tu'ulwa maa ɛ imɛ Jisus.

³³Ama ge Jisus hiɛŋ aŋ, N tɛ zhɛ ma nama ne hŋ tugwo na aka fwalaa, nazhɛ Mo hwulo no ofwo bụtụ ata n tumwanɛ.

³⁴Hi zhɛ hi na ma jalakaka, hi zha shɛ kaa hi ma n ta ugbe, hi eri shi kaa hio to ofwo na Ngɛɛ zhɛ ma nama.

³⁵Ibɛ po Eju momo hoŋtongonu, ɛɛ hiɛŋ, Cee bwa bɛɛ zhɛ ati zha shɛ ta ta bu ugbee? Bi zhaganɛ suu Eju ata ee gereteji a na zweni na ashashɛ Egrik maa mbisogono Egrik iyi?

³⁶Shibwonu asha imbe shɛ ecilo iwɛ ɛtɛ baa jɛmɛ maa, Hi zhɛ hi ma jalakaka, hi zha shɛ kaa hi ma n ta ugbee, hi eri shi kaa du hio to ofwo na Ngɛɛ zhɛ ma namaa?

³⁷Ge Jisus ishijɛ nụ ụjita na shɛ ụjita umɛwɛɛ Isene na kaa shɛ ụjita ụ'wụtụ, baa uganɛ, bɛɛ hiɛŋ, Yaa shɛ i'uyɛ gwụmɛ bụtụ be elele, ga zhajɛ pi mi maa swa meni.[27]

³⁸Gana na ti Iwɛ ya Agwatana jɛmɛ, yɛɛ hiɛŋ, Bụtụ na n tɛtanɛ-rishe, meni me erefu uraiŋ mi zhɛ mu na banɛ na amɛ ubwa mɛɛ zhɛ mu na fwunga.

³⁹Ama ba duma iwɛ Mpiala mu na atwa na tɛtanɛ bụ rishe zhɛ a la, iwɛnɛ po e ge te peni shi aŋ Mpiala mi Tijilo, iwɛnɛ ee ge te peni shi Jisus ụjɛrụma.[28]

⁴⁰Aka na ta atwa oko na ashashɛ ufwugwo ata hwụjɛ iwɛ gɛ, ɛɛ hiɛŋ, Iwɛ-tɛkana, Bụtụ ga ubwa ga shɛ bigesere ata!

⁴¹Atwa oko hiɛŋ, Bụtụ ga ubwa shɛ ga Krast ata. Ama atwa oko hiɛŋ, Ga Krast suu zhɛ ba banɛ nu Galili?

⁴²Iwɛ ya Agwatana ta jɛmɛ shɛ la suu maa ga Krast zhɛ ba banɛ nu umwamwa Devid,[29] nụ ụshɛpwụ ata ɛɛ hiɛŋ, Betlɛhɛm na shɛ ụshɛpwụ ata ge Devid jɛjɛ la?

⁴³Ibɛ po tubogwu tu zhaganɛ atwa ata iwɛ Jisus.

⁴⁴Nazhɛ atwa oko na ashashɛ aba a jala maa a 'imɛ Jisus, ama i zasa kaa bụtụ timengeni bu o.

⁴⁵Aka na te edegeri umwono tụ'ụlwatagwụ gwure no ofwo ehiu onongbo keeni Afarisi, ibɛ ehiu ata onongbo na Afarisi[30] heŋteni aŋ, ɛɛ hiɛŋ, Imbe po ehi shepi shi buu?

⁴⁶Nazhɛ edegeri ata umwono tụ'ụlwatagwụ jishijɛ aŋ, ɛɛ hiɛŋ, I ta zasa kwukwuŋ bụtụ na dumwa iwɛ gana na bụtụ ga ba duma o.

⁴⁷Afarisi heŋteni aŋ, ɛɛ hiɛŋ, E hi holokwokwo du suu?

⁴⁸I 'yajɛ suu bụtụ be elele na ashashɛ ehiu keeni Afarisi na tɛtanawaŋ bụ rishe?

⁴⁹Ama unu-tukalana wa Agwatana patanɛ atwa ga ofwugwo a na mepi shi Undwa Moses.

⁵⁰Nazhɛ ge Nikodimos na shɛ du Bufarisi, na du zhe la pi Jisus nụ ụjita, bee heŋteni aŋ, bɛɛ hiɛŋ:

⁵¹Undwa tu suu wa pana bụtụ n-ndumwa-tụwụma tobwolo a ta hwụjɛ shɛ unu ubwa maa e mepi iyi nɛ baa njɛ?

⁵²Ɛɛ jishijɛ bụ, ɛɛ hiɛŋ, Nu Galili du suu abu banɛ? Yalaga, bi zhɛ ba kwụba maa, i zasa bigesere be elele na zhɛ ba banɛ nu Galili o.

⁵³[Nazhɛ aa garatagwụ jita ata, bụtụ bụtụ ji ni ihwɛ ibwɛ.