Read bassa UGONDU WA ATUMWA 10 Bible Online

UGONDU WA ATUMWA 10 - bassa bible

UGONDU WA ATUMWA 10

¹Bụtụ bu ko namba ni Sɛsɛria, ɛɛ hiɛŋ go Konilius, bɛ shɛ uhiu wa asaza dipi-yebi, na namɛ nu udungbe na ɛɛ hiɛŋ udungbe Italia.

²Bɛ shɛ bụtụ bɛ tɛcara, na ba sụma Agwatana inyɛsɛ, ta atwa ihwɛ ibwɛ hwɛɛ. Ba pana atwa apwaŋ tebiye, baa tabwa Agwatana ɛgbɛɛ.

³Jitoo ko baa kwụbɛ butumwa ba Agwatana ba azuba no ozobu na aka ogogo atatụ tu uwaŋna yinganɛ duwa,[35] tu baa zhajɛ pu bwa, bɛɛ hiɛŋ bụ, O-Konilius!

⁴Go Konilius ngbaracɛ bụ zenjizenji, inyɛsɛ kaa shɛ bụ, bɛɛ hiɛŋ, Agwangwama, Imbe nɛɛ? Butumwa ata ba azuba jishijɛ bụ, bɛɛ hiɛŋ, Adua bu keeni apwaŋ bu a na aba pana okofwo munji no ofwo Agwatana, ibɛ po bee bi teyinje.

⁵Tumwana atwa oko hwuwayɛ go maa e zhe Jopa maa a suyanɛ Saimon ata ɛɛ hiɛŋ du ga Pita.

⁶Bɛ jɛjɛ ba ni ihwɛ Saimon bụsụkwụcɛ-bi-i'wɛbɛ, na ihwɛ ibwɛ namɛ nu ụpalanụ itekwu.

⁷Aka na ta butumwa ata ba azuba na dumanjɛ iwɛ nu bwa hwuri, go Konilius suyanɛ miaụŋ-mu-ugondu ubwa mi yebi keeni busaza bɛ tɛcara bu ko na ashashɛ atwa na a ndana bu iyi aka elele.

⁸Aka na ti bee swegeni aŋ iwɛ ɛtɛ hwɛɛ, baa tumwanɛ aŋ maa ge zhe Jopa.

⁹Aka na ti iyi heri tɛ ɛ zhɛ tahaŋnụ ta aba, oo gwumwonu nụ ụshɛpwụ ata. Ga Pita tuba ge munji nu ukogo[36] uko na shɛ gana ikete, maa nda adua, gana tu uwaŋna tishikoko.

¹⁰Imunɛ kaa gwụmɛ bụ, baa jala maa ya iyimɛyɛ, o to bwo kaa tɛga na aka ata. Baa kwụbɛ iyi ike gana ozobu.

¹¹Ee kepishinji azuba, ee zucinje iyi ike nɛ shɛ gana tugwuno ti ilinɛn na cɛnjɛ, aa untanganɛ akakalụ tuba eneshi.

¹²Isundɛ ehilo ye elele nɛ 'yajɛ ivwunɛ ineshi, keeni iyi nɛ yo hombilo keeni shanụnụ shi zweni na tuba hwɛɛ.

¹³Nazhɛ rụhwụŋ ru ko ri hiɛŋ bụ, A-Pita, ishijɛ ụ kwụnɛ iŋ maa yɛ.

¹⁴Ama ga Pita jishijɛ, bɛɛ hiɛŋ, Agwangwama, shɛ gana ata kwukwuŋ. N ta yɛ shɛ la kwukwuŋ iyi elele nɛ eti jirimi tiya,[37] kwo kaa iyi nɛ zasa shɛshɛshɛ o.

¹⁵Ama rụhwụŋ ra ata ri hiɛŋ bụ sasana na aka yebi, Iyi elele nɛ Agwatana nduwa shɛshɛshɛ, tɛ hiɛŋ ya maa i ta shɛ iyi nɛ zasa shɛshɛshɛ o.

¹⁶Ijɛ ɛtɛ njɛ kpalụ tatụ, nazhɛ ee gwuricinji iŋ na azuba.

¹⁷Gana na ti iwɛ ɛtɛ ya zuga Pita, baa haŋsa iwɛ ecilo ijɛ ɛtɛ baa kwụbɛ no ozobu, na aka ata ibɛ etwenyi ebe go Konilius tumwanɛ utumwa shikekeni no odubo, o hoŋtono iwɛ ihwɛ Saimon.

¹⁸Aa suyanɛ ụhiɛŋshɛ, ee heŋteni okwo ga Saimon ata ɛɛ hiɛŋ ga Pita namba epe.

¹⁹Aka na ti ga Pita ta haŋsa iwɛ ecilo ozobu ata baa kwụbɛ, nazhɛ Mpiala mi hiɛŋ bụ, Etwenyi oko eyebi[38] ye ma bu jalakaka.

²⁰Ishijɛ maa zwi maa zhagaga na aba, ta nda ahaŋsa eyeyebi o, Gamba n tumwanɛ aŋ utumwa ata.

²¹Ga Pita zwe bee zhe no ofwo atwa ata, bɛɛ hiɛŋ aŋ, Gamba ga ahia jalakaka na. Imbe shɛ ecilo tahaŋnụ ti hiiŋ?

²²Ɛɛ jishijɛ bụ, ɛɛ hiɛŋ, Go Konilius, ata shɛ uhiu wa asaza dipi-yebi, na shɛ bụtụ bi tiririri, na ba sụma Agwatana inyɛsɛ, ubwa na Eju elele a la tiseyida. Butumwa-ba-azuba bi tijilo eshicigeni bu maa ga a bu suyanɛ ni ihwɛ ibwɛ, maa u hwuga iwɛ nɛ ɛbi zhɛ ba duma.

²³Ga Pita hiɛŋ aŋ ge teni ni ihwɛ ɛtɛ maa o woto nụ ụrụmɛ ata. Aka na ti iyi heri, bɛɛ ishijɛ baa zhagajɛ na aba. Miaụŋ-mo-bino na amɛ Krast mu ko mi beni du nu Jopa mee she bu.

²⁴Aka na ti iyi heri sasana, ee teni Sɛsɛria, tobwolo go Konilius suywanua atwa ubwa keeni eyejilo ubwa tugom aa 'yakawa aŋ.

²⁵Aka na ti ga Pita bo tono ihwɛ ɛtɛ, go Konilius teji bu uhwaŋna, bee leyi nɛ ɛvwɛvwɛjɛ ubwa bee kwuzeni bu.

²⁶Ama ga Pita ishicinjɛ bụ, bɛɛ hiɛŋ bụ, Ishijɛ shikono, bụtụ kaa du Ngaa shɛɛ.

²⁷Gana na tu ga Pita ta dumanga n-ndumwa nu bwa, ee teni ni ihwɛ ɛtɛ, ga Pita kwụbɛ ta atwa ofwugwo ụlwatagwụ.

²⁸Ga Pita hiɛŋ aŋ, Hi mepi du ni ikɛnyi hiŋ, maa Undwa tu leni shi maa Biju togwu na atwa na shɛ shɛ Eju kwo kaa maa zha bu uhikwonuo. Ama Agwatana m mbiseni maa kede mɛ hiɛŋ bụtụ be elele maa bụtụ na hashɛganụ kwo kaa bụtụ na zasa shɛshɛshɛ o.

²⁹Aka na abu tumwanɛ atwa maa ga a n suyanɛ, N zhajɛ, N njɛ shɛ ashamanjɛ o. Mo hi hoŋtono hwuwayɛ go maa, Imbe shɛ ecilo no po ahiɛ n suyanɛɛ?

³⁰Go Konilius jishijɛ bụ, bɛɛ hiɛŋ, Jita neshi na hwayɛ, Ama nda adua[39] nu umwono mu geri bo ogogo atatụ tu uwaŋna yinganɛ duwa. Ngaa kwụbɛ butubwenyi bu ko na urigeni i'wɛŋnɛ icɛnjɛ, ti bee shikeni nu umbe mu.

³¹Bɛɛ hiɛŋ, O-Konilius, Agwatana hwụjɛ adua bụ, bee teyinje kaa du apwaŋ na aba pana okofwo.

³²Iwɛ ecilo ata tumwana atwa maa e zhe Jopa, maa a bu suyananɛ Saimon ata ɛɛ hiɛŋ, ga Pita. Bu namba ni ihwɛ Saimon bụsụkwụcɛ-bi-i'wɛbɛ, ata namɛ nụ ụpalanụ itekwu.

³³Ibɛ po Ngaa tumwanɛ atumwa pụ bụ. Tizhajɛ tu ga abu zhajɛ tɛ zhɛmɛ. Hwuwayɛ go atuba na tu ulwa epe hwɛɛ tu na agba Agwatana, maa ta hwuga iyi elele nɛ Agwangwama ubu peni-unu ibɛ maa jɛmɛ.

³⁴Ga Pita kwuni n-ndumwa mu bwa, bɛɛ hiɛŋ, Iwɛ-tɛkana ahaŋsa mi leni maa Agwatana zenji shi atwa o.

³⁵Ama bụtụ be elele na ba sụma Agwatana inyɛsɛ, na kaa ba nda iyi tiririri, okwo baa shɛ udenji we elele, ubwa Agwatana zhɛ a la.

³⁶Utumwa ganana Agwatana tumwananɛ atwa Isrɛl, maa e enengeni aŋ Anabarɛ Ebiye amɛ-olom a na dure Jisus Krast, na shɛ Agwangwama iyi elele.

³⁷Hi mepi n-ndumwa ma ata mu kwuni nu Galili, mi zhe tutu Judia kpaaŋ, na aba na tu ga Jon enenji iwɛ ubaptizim.

³⁸Muba mɛ shɛ n-ndumwa mi Jisus bụtụ ata bu Nazarɛt, na Agwatana dudugeni Mpiala mi Tijilo keeni ukpahiŋ, bee rinji no ofwo elele, baa nɛnga kaa atwa elele na ukpahiŋ Ibiri wa pana ụbaụta, iwɛnɛ ta Agwatana namɛ nu bwa.

³⁹Atuba kaa tɛ shɛ eseyida iyi elele nɛ baa njɛ na cɛnjɛ te Eju keeni Jɛrusalɛm. Ubwa gatata oo to la nu ubatanɛ, aa kwụnɛ.

⁴⁰Ama Agwatana hicinjɛ bụ nụ ụjita ụtatụ, baa njɛ maa a kwụbɛ bụ caakwụ.

⁴¹Ama shɛ ne eshe atwa hwɛɛ o, semi ne eshe tu na Agwatana twolwo cebe. Atuba tɛ shɛ eseyida iwɛ ɛtɛ, atuba na tɛ yɛ la, tu swe du nu bwa na aba na ti bɛɛ hiɛ no tu'wo.

⁴²Ubwa kaa iti peni-unu maa ta anangana atwa Anabarɛ Ebiye, maa ta la du tiseyida maa ubwa shɛ bụtụ ata Agwatana teri maa sha bɛjɛmɛ-bụ-ụshɛrɛya ba atwa na a hwungwa keeni atwa na 'wi.

⁴³Ubwa egesere elele le tiseyida maa bụtụ be elele na tɛtanɛ izeci ibwɛ rishe, ɛ zhɛ a gangana bụ iwɛwɛ ibwɛ.

⁴⁴Aka na tu ga Pita ta duma iwɛ ɛtɛ, Mpiala mi Tijilo mu zwe no ofwo bụtụ be elele na hwụjɛ iwɛ ɛtɛ.

⁴⁵Ibɛ po yaa dama Eju na banɛ nu Jopa a na zhagajɛ na Pita, iwɛnɛ ta Agwatana dudugeni atwa na shɛ shɛ Eju upwaŋ Mpiala mi Tijilo du.

⁴⁶Iwɛnɛ po a hwụjɛ ta a pana Agwatana ụjɛrụma duwa tedure na rɛjɛmɛ ri nya ru tuswoswoswo.[40] Nazhɛ ga Pita hiɛŋ,

⁴⁷I 'yajɛ suu bụtụ be elele na eri ba lakana atwa ga leshiji Mpiala mi Tijilo gana tu maa kede a njɛ aŋ ubaptizim ne meni?

⁴⁸Ibɛ po ga Pita peni-unu maa ga njɛ aŋ ubaptizim ni izeci Jisus Krast. Nazhɛ aa lụpɛ Pita maa nama na aba i ci ijitɛ imbɛnɛ.