Read bassa UGONDU WA ATUMWA 21 Bible Online

UGONDU WA ATUMWA 21 - bassa bible

UGONDU WA ATUMWA 21

¹Aka na te eti genji aŋ, eti teni ụhaŋtụ, eti hwuri mbwụụ tutu Kos, iyi heri nazhɛ eti zhe Rodes, eti beni apata eti zhe Patara.[79]

²Aka na ta atu kwụbɛ ụhaŋtụ na zhɛ Fonikia, eti teni, eti hwuri tahaŋnụ tu tu.

³Aka na atụ kwụbɛ; Saipros, eti genji uŋ nu u'ala ugwulwo, eti zhe Siria. Nazhɛ atu banɛ nụ ụhaŋtụ nu Taya, iwɛnɛ po apata aa bwajɛ i'wɛŋnɛ nụ ụhaŋtụ.

⁴Aka na atụ kwụbɛ eseshi-iyi, atu namɛ apata ijitɛ icenje. Apata Mpiala mi Tijilo mi mbishi atwa ata maa gɛ ɛ hiɛŋ Poul maa kede ba zha Jɛrusalɛm o.

⁵Ama ta atu namɛ na aba uuwa aka na ta aka tu ci, eti beni apata eti hwuri tahaŋnụ tu tu. Ee ti she hwɛɛ aba, te eyikwo, ta miaụŋ ma aba tutu adatụ ụshɛpwụ ata. Nazhɛ eti kwuzenji nụ ụpalanụ ata, atɛ njɛ adua.

⁶Aka na atu mama ndanụ ongbo, eti teni ụhaŋtụ, etu hwuri, ama atwa ata tuba gwuri nu nhwaŋ ma aba.

⁷Te eti beni nu Taya, atu uranjɛ tahaŋnụ tu tu, eti zhe Tolɛmais, apata atu 'walụ miaụŋ-mo-bino tu, atu namɛ na aba jitoo ko.

⁸Ti iyi heri eti hwuri eti zhe Sɛsɛria, eti teni nu umwono Filip na shɛ bi'enenji, na shɛ du bụtụ bu ko na atwa ata ecenje, atu namɛ nu bwa.

⁹Bụtụ ata 'yajɛ miaụŋ-mo-o mi neshi mu na mu ta shɛ asapa[80] egesere aa shɛ.

¹⁰Aka na ta atu namɛ apata te ilegeji, bigesere bu ko na ɛɛ hiɛŋ, ga Agabus banɛ nu Judia bee zwe apata.

¹¹Aka na ti bɛɛ zhɛ pu tu, bee shepi umazhɛya we embi Poul, bee meme umpi ivwunɛ ibwɛ ikɛnyi ibwɛ keeni i'ɛlɛ ibwɛ, bɛɛ hiɛŋ, Mpiala mi Tijilo mi hiɛŋ, Gana ga du Eju na namɛ nu Jɛrusalɛm zhɛ o umpo bụtụ na 'yajɛ umazhɛya ga, nazhɛ ɛɛ zhɛ a shapa bụ a pana atwa na shɛ shɛ Eju.

¹²Aka na ta atụ hwụjɛ iwɛ ɛtɛ, atụ lụpɛ Poul hwɛɛ ta atwa ofwo ata maa kede mungo Jɛrusalɛm o.

¹³Nazhɛ go Poul hiɛŋ aŋ, Iwembe po ahia twa-u'wo, ahia hashɛgana amɛ mii? M mama 'imɛ shɛ iwɛ tu'umpo kiri o, ama iwɛ maa Mo 'wo du nu Jɛrusalɛm iwɛ izeci ya Agwangwama Jisus.

¹⁴Ama gana na te eti eri shi to ngwuricingo bu, eti genji, ɛti hiɛŋ, Asha ge iyi nɛ shɛ ukwulana wa Agwangwama i njɛ.

¹⁵Na aba na ta atu namɛ apata fwalaa, eti suji i'wɛŋnɛ tu, eti munji Jɛrusalɛm.

¹⁶Eseshi-iyi oko banɛ ni Sɛsɛria aa zhagajɛ no tu. Ee tu suji ni ihwɛ Minason na banɛ Saipros. Bɛ shɛ biseshi-bi-iyi[81] te kwuni taa nu umozhigo, otu zokwu ni ihwɛ ibwɛ.

¹⁷Aka na eti ci Jɛrusalɛm, miaụŋ-mo-bino mi ti leshiji nu unyasa.

¹⁸Aka na ti iyi heri, go Poul zhagajɛ no tu eti zhe maa tɛ kwubɛ Jemis.[82] N-nyarɛ mu namba apata hwɛɛ aba.

¹⁹Aka na tu go Poul 'walụ aŋ, nazhɛ bee swegeni aŋ iyi elele nɛ Agwatana nduwa na ashashɛ atwa na shɛ shɛ Eju tedure nu ugondu ubwa.

²⁰Aka na ta a hwụjɛ iwɛ ɛtɛ, ee peni Agwatana ụjɛrụma. Ɛɛ hiɛŋ Poul, Ɛ-yɛu-bino tu na amɛ Krast, bụ kwụbɛ gana na te Eju igbɛɛ ifwugwo namba a na tɛtanɛ-rishe, hwɛɛ aba kaa 'yajɛ tɛzhɛgɛdana iwɛ Undwa.

²¹A hwugwa maa bo mbisogono ba Eju elele na namɛ na ashashɛ atwa na shɛ shɛ Eju maa ge genji ya Undwa Moses tu'wa, maa bo mbisogono aŋ du maa kede e jeji ya miaụŋ ma aba teleyi o, maa du kede a 'wa ya masha me Eju o.

²²Gana na tuba yaa shɛɛ? Gana elele ti yaa shɛ, ɛ zhɛ a hwuga tilɛɛ maa bi zhajɛ epe.

²³Ibɛ po ata jala maa njɛ iyi nɛ ɛti zhɛ to bu mbiso. Ti 'yajɛ ba etwenyi oko eneshi a na meme shileni unu.

²⁴Sugo atwa ata, maa mama njɛ gana na tu Undwa tishɛshɛshɛ we Eju hiɛŋ. Gabụ tuba bi zhɛ ba tụpa utashɛ iyi elele nɛ aa njɛ ufwu ni ibɛ, iwɛ maa a 'nyanjɛ tukpala, nazhɛ ɛɛ zhɛ a mapa hwɛɛ aba maa iyi elele nɛ ee mbishi aŋ iwɛ bụ i shɛ shɛ iwɛ-tɛkana o, ama gabụ ni ikɛnyi bụ ba nda iyi tebiye te teni cɛŋ nu Undwa Moses.

²⁵Ama ti 'nywotwonuo atwa na shɛ shɛ Eju a na tɛtanawaŋ-rishe utakada maa ge worinji iyi nɛ oo to ụrụpɛ nu ntatanuwaŋ, keeni mehieŋ, keeni iyi nɛ aa kwụnɛ uzawa undala,[83] keeni tuwɛle.

²⁶Aka na ti iyi heri, go Poul suji ga etwenyi ata, baa mama njɛ shɛshɛshɛ na aba gana na tu undwa we Eju u tishɛshɛshɛ hiɛŋ. Nazhɛ bee teni nu Umwono wa Agwatana maa mbiso aŋ ụjita na undwa ata tishɛshɛshɛ zhɛ wa ulwa, uuwa i ci aka na ɛ zhɛ a pana ụrụpɛ iwɛ bụtụ bụtụ na ashashɛ aba.

²⁷Aka na ti yaa vwɛ cwɛŋ maa ijitɛ ɛtɛ icenje ulwa, ibɛ Eju oko a na banɛ nu ukpeleshi cɛnjɛ te Esia kwụbɛ Poul nu Umwono wa Agwatana, aa 'imɛ bụ.

²⁸Aa uganɛ, ɛɛ hiɛŋ, Ahiɛba etwenyi Isrɛl, iti mbiyeni ma o! Bụtụ ganana bo mbisogono atwa elele no ofwo elele maa ga sukakanɛ atwa Isrɛl, tu Undwa Moses keeni Umwono ga. Bee suje du sasana atwa na shɛ shɛ Eju maa e teni nu Umwono ga wa Agwatana. Bee heshigeni ya ofwo ga tijilo.

²⁹Iwɛnɛ po a kwụbɛ bụ la nụ ụshɛpwụ abana Trofimos ata banɛ nɛ Ɛfɛsɛs, ee heŋshi maa go Poul zɛrijɛ bu nu Umwono wa Agwatana.

³⁰Ibɛ po ụshɛpwụ ata namɛ kobu kobu, atwamwa bananjɛ geri geri ee gezheji aa ụlwatagwụ. Aa 'imɛ Poul, ee mbembiri bu ɛɛ bɛcinjɛ nu Umwono wa Agwatana, gunu ata ee kepenji shidubo.

³¹Gana na ta a jala maa a kwụnɛ Poul, ibɛ unabarɛ iwɛ ɛtɛ zhe wee ci uberezhe wa asaza, maa bwonu Jɛrusalɛm njɛ ba kobu kobu hwɛɛ.

³²Ibɛ po uberezhe ata wa asaza suji asaza ubwa keeni ehiu asaza dipi-yebi gunu ata, bee gezhiji bee zhe no ofwo aba. Ama aka na ta a kwụbɛ uhiu ata wa asaza keeni asaza, nazhɛ ee genji ya Poul ijibi.

³³Nazhɛ uberezhe ata wa asaza zhe bee shepi Poul, bee peni aŋ unu maa go to bu shigbo shi yebi, nazhɛ bee heŋteni, bɛɛ hiɛŋ, Gaaba naa kwuuŋ? Imbe kwuŋ baa njɛɛ?

³⁴Nazhɛ umeseyi uko na ashashɛ ofwugwo wa atwa ata uganɛ iyi ike, anya atwa uganɛ inyɛ iyi. Ama gana na ti bee eri shi ba mapa tugom ti ibɛ, iwɛ rundu ru na ra nda, bee peni aŋ unu maa ge shepi Poul nu nhwaŋ ma aba ma asaza.

³⁵Aka na tu go Poul bo mungo shigenegbe sha ata shu umwono wa asaza, asaza shepi bu aa 'waŋnɛ iwɛ iyi nɛ atwa ata abwagara zhɛ a nda bụ hwayɛ.

³⁶Iwɛnɛ po ofwugwo wa atwamwa 'wa aŋ, aa ugaga, ɛɛ hiɛŋ, Kwụna bu ma!

³⁷Aka na te e shepi Poul maa e teni nu nhwaŋ ma ata ma asaza, bɛɛ hiɛŋ uberezhe ata wa asaza, N leneni ka maa ma duma iwɛ na bụ. Uberezhe ata wa asaza heŋteni bu, bɛɛ hiɛŋ, Bụ hwụjɛ suu Rigrik?

³⁸Asha shɛ gabụ suu bɛ shɛ Bijipti ata bɛrɛ la ujasa aka oko cala, na du suji la akwụnɛ-atwa igbɛɛ-iyebi (4,000) zhe nu ụshɛka.

³⁹Go Poul jishijɛ bụ, bɛɛ hiɛŋ, Biju Ngaa shɛ, bụtụ bu Tasus na namɛ ni Silikia, N shɛ umamata nụ ụshɛpwụ ata ụ shɛ shɛ ụshɛpwụ ticwɛŋ. Ma bu tabwa maa m peni ohwolu maa ma duma iwɛ na atwa ga.

⁴⁰Aka na tu uberezhe ata wa asaza peni Poul ohwolu, go Poul shikeni ne shigenegbe sha ata, baa ndanɛ atwa ata u'ala kwupekwupe maa a nama shiru. Aka na ta a namɛ shiru, baa jɛmɛ iwɛ na aba ne Rihibru, bɛɛ hiɛŋ: