Read bassa UGONDU WA ATUMWA 22 Bible Online

UGONDU WA ATUMWA 22 - bassa bible

UGONDU WA ATUMWA 22

¹Ahiɛba miaụŋ-mo-bino mi keeni eshi mi, hwulaga ma ajɛshɛgwa mi na Ngɛɛ zhɛ me hi swegeni.

²Aka na ta a hwụjɛ maa Rihibru baa jɛmɛ na aba, ee keeni tunama shiru, nazhɛ go Poul hiɛŋ aŋ.

³N shɛ Biju na ee meci nu Tasus na namɛ na cɛnjɛ ti Silikia, ama nụ ụshɛpwụ ga Ngaa waŋnɛ nu ukaka Gamaliɛl, ee m mbisegeni undwa we eshi tu hwɛɛ, Ngaa 'yajɛ du kaa tɛzhɛgɛdana ta Agwatana gana na ta ahi namɛ epe hwɛɛ hŋ tutu taa hwayɛ.

⁴N shɛkwa la atwa na 'wa uhwaŋna ga Krast, Ngaa kwụnua aŋ, Ngoo umpwo la etwenyi te eyikwo, Ngee utegeni atwa na maa e zweni aŋ nu umwono-tishi.

⁵To Bunongbo bụ 'wụtụ, ta ajɛmɛ-ushaura eri ma n la du tiseyida hwɛɛ aba maa iwɛ-tɛkana Ama duma. Ni i'ɛlɛ ya aba du Ngee leshiji la atakada na ee 'nyeteni miaụŋ-mo-bino ma aba mu na mu namɛ nu Damaskos, Ngee zhe du apata maa mɛ cɛ atwa na namɛ apata shigbo, maa Me suje aŋ nu Jɛrusalɛm maa e peni aŋ ulwapɛ.

⁶Ama aka na ti Ngee zhe tahaŋnụ ti mi uuwa Ngoo gwumwonu nu Damaskos, geri bu uwaŋna tishikoko, eshigiri, uhioko-uhwaŋna uko ụ'wụtụ banɛ na azuba waa ta n rungwutwonu.

⁷Ngee leyi na cɛnjɛ, Ngaa hwụjɛ rụhwụŋ ru ko, ru n suyanɛ, rɛɛ hiɛŋ, O-Soul! O-Soul! Iwembe po abu ma n shɛkaa?

⁸Ngee heŋteni, Ngɛɛ hiɛŋ, Agwangwama, gaaba nuu? Rɛɛ n jishijɛ, rɛɛ hiɛŋ, Gamba n shɛ ge Jisus bụtụ ata bu Nazarɛt aba shɛka.

⁹Atwa na zhagajɛ la ne mi kwụbɛ du uhioko-uhwaŋna ata gom, ama a hwụjɛ shɛ tuba rụhwụŋ ra bụtụ ata ba njɛ ne mi o.

¹⁰Nazhɛ Ngee heŋteni bu, Ngɛɛ hiɛŋ, Agwangwama, imbe Ngɛɛ zhɛ ma ndaa? Nazhɛ Agwangwama n jishijɛ, bɛɛ hiɛŋ, Ishijɛ teni nu Damaskos, apata ɛɛ zhɛ mo bu mbiso iyi elele nɛ ee bi shileni maa njɛ.

¹¹Aka na tu uhioko-uhwaŋna ata u tupaawụụ n libicinji, ibɛ po atwa na ga zhagajɛ ne mi n untanganɛ u'ala ee n zeriji Ngee teni Damaskos.

¹²Bụtụ bu ko namba nụ ụshɛpwụ ata ɛɛ hiɛŋ, ga Ananias, na shɛ bụtụ tɛcara nu Undwa. Eju na namɛ apata hwɛɛ a muna bụ ụjɛrụma tebiye.

¹³Baa zhajɛ pi mi, bee shikeni, boo n dongonu, bɛɛ hiɛŋ, Ɛ-yɛu-bino mi go Soul, hiokonono uhwaŋna. Gunu ata gom Ngee hieci uhwaŋna, Ngaa mbiyanɛ bụ.

¹⁴Bɛɛ hiɛŋ, Agwatana eshi tu ubu teri maa mepi ukwulana ubwa, maa kwụbɛ Bụtụ ata bwa bi tiririri, maa hwụjɛ du rụhwụŋ ru bwa.

¹⁵Iwɛnɛ po gabụ bi zhɛ ba sha useyida ubwa, maa mbishi atwa elele iyi nɛ abu kwụbɛ keeni iyi nɛ abu hwụjɛ.

¹⁶Hwuwayɛ go, imbe abu ta shɛlanɛɛ? Ishijɛ, maa a bɛ njɛ ubaptizim, maa a nyashɛnjɛ iwɛwɛ bu tedure na tusuyana tu na aba suyana izeci ibwɛ.

¹⁷Aka na ti Ngee gwure nu Jɛrusalɛm, Ama nda adua nu Umwono wa Agwatana, Ngaa kwụbɛ Agwangwama no ozobu,

¹⁸Bɛɛ n hiɛŋ, Nda kakayɛ maa beni nu Jɛrusalɛm, iwɛnɛ ta a zha shɛ o lono tiseyida tu na ɛbi zhɛ bu ma n la epe.

¹⁹Nazhɛ Ngɛɛ jishijɛ bụ, Ngɛɛ hiɛŋ, Agwangwama, aba ni ikɛnyi aba du kaa mepi maa N zwonuo la atwa na ubu tɛtanɛ-rishe nu umwono-tishi, Ngee jibi aŋ du no shimwono-shɛ-tụ'ụlwatagwụ.

²⁰N namba la na aka na ta a kwụna Stivin na le la tiseyida tụ bụ, Ngee shikeni to dongonu aŋ, Ngee leni du na tukwụna ta ata aa kwụna bụ, Gamba du n ngbaracɛ i'wɛŋnɛ ya atwa ata a kwụna bụ.

²¹Nazhɛ Agwangwama n hiɛŋ, Zhaga; N zhɛ ma bu tumwana utumwa taa dụlụ no ofwo atwa na shɛ shɛ Eju.

²²Aa shɛlajɛ iwɛ ubwa uuwa i ci uce iwɛ ɛtɛ. Nazhɛ ee suji rụhwụŋ ra aba na azuba, ɛɛ hiɛŋ, Bacɛnga ma bụtụ bu gana ga nu unyizo, iwɛnɛ ti bee teni shi ya cɛŋ maa nama.

²³Ta a uganɛ, oo vwurongono otogwo aba na azuba, aa 'waŋ upwupwutu na azuba.

²⁴Ibɛ po uberezhe wa asaza peni-unu maa ge tecinji Poul nu nhwaŋ ma aba ma asaza, bɛɛ hiɛŋ, ge jibi bu nu udugwu iwɛ maa e mepi ecilo no po Eju a uganana bu gana ga.

²⁵Ama aka na te e umpi bu hwɛɛ maa e jibi bu ya. Go Poul hiɛŋ uhiu wa asaza dipi-yebi na shikeni apata to dongonu bu, Undwa leni suu maa hi kwuci bụtụ na shɛ yɛu cɛnjɛ tu Rom, okwo tu n-ndumwa mụ wụmɛ shɛ bụ?

²⁶Aka na tu uhiu wa asaza dipi-yebi hwụjɛ iwɛ ɛtɛ, bee zhe pu uberezhe wa asaza, bee heŋteni bu, bɛɛ hiɛŋ, Gana na ɛbi zhɛ ba nda bwaa? Iwɛnɛ ta bụtụ ga shɛ yɛu cɛnjɛ tu Rom.

²⁷Nazhɛ uberezhe ata wa asaza zhajɛ pu Poul, bee heŋteni bu, bɛɛ hiɛŋ, Yɛu cɛnjɛ tu Rom suu abɛ shɛ? Go Poul jishijɛ bụ, bɛɛ hiɛŋ, Iiŋ.

²⁸Nazhɛ uberezhe ata wa asaza jishijɛ bụ, bɛɛ hiɛŋ, Nu ukwuribi ụ'wụtụ, Ngoo so undwa yɛu cɛnjɛ. Ama go Poul jishijɛ bụ, bɛɛ hiɛŋ, Yɛu cɛnjɛ Ngaa shɛ taa na aka na ta atwa mi m meci.

²⁹Ibɛ po atwa na gɛ zhɛ o hoŋtono Poul iheŋtene genji bu gunu ata, nazhɛ inyɛsɛ du shɛ ya uberezhe ata wa asaza iwɛnɛ ti bee mepi ya maa go Poul shɛ yɛu cɛnjɛ tu Rom, harɛ boo to bu kaa shigbo.

³⁰Ama aka na ti iyi heri, tu uberezhe ata wa asaza wa jala maa mapa ecilo tikpeke no po Eju suyanɛ Poul ụshɛrɛya, bee vwoci shigbo shi Poul, nazhɛ bee peni ehiu onongbo unu keeni ajɛmɛ-ụshɛrɛya hwɛɛ maa ga a ụlwatagwụ. Nazhɛ bee kezhicinje Poul, bee shikicinji bu nu umbe wa aba.