Read bassa UGONDU WA ATUMWA 25 Bible Online

UGONDU WA ATUMWA 25 - bassa bible

UGONDU WA ATUMWA 25

¹Aka na ti gɛ Fɛstos teni cɛnjɛ ta ata, baa namɛ ijitɛ itɛtu, bee beni ni Sɛsɛria bee zhe Jɛrusalɛm.

²Nazhɛ ehiu onongbo, keeni atwa a'wụtụ Eju mbishi bu n-ndumwa mụ wɛ iwɛ Poul. Aa tabwa Fɛstos,

³maa ge gwuricinje Poul nu Jɛrusalɛm. Aba kaa gwubeji nu uhwaŋna maa a kwụnɛ bụ.

⁴Gɛ Fɛstos jishijɛ aŋ, bɛɛ hiɛŋ, O shiyono ba Poul eshe ni Sɛsɛria, Gamba ni ikɛnyi mi, Ma jala du maa Mo hwulo ujiyo apata kakayɛ.

⁵Yaa shɛ gana ata asha ga atwa na 'yajɛ ụhwada na ashashɛ hiŋ, a zhagaga ne mi, yaa shɛ yaa 'yajɛ iyi elele nɛ teni shi cɛŋ na amɛ bụtụ ata, asha ga a jɛmɛ iŋ na agba ụshɛrɛya.

⁶Ti gɛ Fɛstos namɛ na aba gana ijitɛ itindɛtu kwo kaa umpwa, nazhɛ baa sanɛ Sɛsɛria. Ti iyi heri, bee teni nu umwono-ụshɛrɛya, baa tumwanɛ maa ga suyanɛ Poul.

⁷Aka na tu go Poul zhajɛ, Eju na banɛ nu Jɛrusalɛm zhajɛ oo rungwutwonu bu, aa patangana bu n-ndumwa mu na mi zhingeni, munaa na kaa ee eri shi o mbisono maa mɛ shɛ iwɛ-tɛkana.

⁸Ama go Poul sweji unu ubwa, bɛɛ hiɛŋ, Ti iwɛ Undwa, ti iwɛ Umwono wa Agwatana, ti iwɛ Sisa, i zasa iyi elele nɛ Ngaa 'wanganɛ aŋ ni ibɛ kwukwuŋ o.

⁹Ama gana na ti gɛ Fɛstos ba jala maa nda iyi nɛ zhɛ ya kwulana Eju, bee heŋteni Poul, bɛɛ hiɛŋ, I bu kwụlanɛ suu maa zhe Jɛrusalɛm, maa a jɛmɛ ụshɛrɛya n-ndumwa mu ga mụ bụ apata ne eshe mi?

¹⁰Go Poul jishijɛ bụ, bɛɛ hiɛŋ, Na agba ogbudu ụshɛrɛya Sisa Ngɛɛ zhɛ mo shikono. Ofwo na i shɛ tilɛɛ maa a jɛmɛ ụshɛrɛya mu ta. N njɛ shɛ Eju iyi iwɛ ye elele o, gana na du te ebi mepi iŋ tebiye.

¹¹Yaa shɛ Ngaa nga njɛ iyi iwɛ ye elele nɛ lanɛ tu'wo, N nga zha shɛ ma laka maa Mo 'wo. Ama yaa shɛ kaa iwɛ-tɛkana zasaba ni iyi nɛ aa n suyanɛ ụshɛrɛya, asha i zasa bụtụ be elele na eri mo n utogotono aŋ o. N zhɛ ma shapa n-ndumwa mi mi ma zha no ofwo Sisa.

¹²Aka na ti gɛ Fɛstos njɛ ushaura na atwa vwɛ ubwa ụshɛrɛya, bɛɛ jishijɛ Poul, bɛɛ hiɛŋ, Bu shopwo n-ndumwa mụ bụ no ofwo Sisa, asha no ofwo Sisa ɛbi zhɛ ba zha.

¹³Aka na ti ijitɛ imbɛnɛ keshici, ga Agripa na shɛ Agwuma keeni Benesi ci Sɛsɛria maa a kwụbɛ Fɛstos.

¹⁴Gana na te e ilegeji apata ijitɛ ifwugwo, gɛ Fɛstos bwɛjɛ Agwuma n-ndumwa mu Poul, bɛɛ hiɛŋ bụ, Bụtụ bu ko namba ge Filikis shiyeni nu umwono-tishi bee genji bu maa shiyono apata.

¹⁵Aka na ti Ngee zhe Jɛrusalɛm, ehiu onongbo nu n-nyarɛ petengeni bụtụ ata ụshɛrɛya, aa n tabwa maa ma pana bụ n-ndumwa-tụwụma.

¹⁶Ngɛɛ jishijɛ aŋ, Ngɛɛ hiɛŋ, I shɛ shɛ iyi uvwovwu yo Orom maa e utegeni bụtụ be elele na aa suyanɛ ụshɛrɛya atwa na suyanɛ bụ ụshɛrɛya, tobwolo bu ta twa sụ eshe na atwa na ga suyanɛ bụ ụshɛrɛya maa gwushigo ohwolu maa sweji unu ubwa na atwa na ga suyanɛ bụ ụshɛrɛya o.

¹⁷Aka na ta a zhajɛ epe, N njɛ shɛ ti'insu o, ama ni iyi tuholo, Ngaa jɛjɛ no ogbudu ụshɛrɛya, Ngee peni-unu maa ga shapɛ bụtụ ata.

¹⁸Aka na ta atwa ata ga suyanɛ bụ ụshɛrɛya shikekeni epe, i zasa kaa n-ndumwa mu bwa mụ wɛ aa jɛmɛ gana na Ngee nge heŋshi o.

¹⁹Ama iyi nɛ aa suyanɛ bụ ụshɛrɛya ibɛ i shɛ iwɛ ashamanjɛ oko iwɛ tɛzhɛba ta bụtụ na aa ndana iyi, keeni iwɛ Jisus uko ne 'wi, go Poul hiɛŋ maa bi hiɛ.

²⁰Ama gana na ti Ngee gwushiji shi iyi tukpororo nɛ maa Mo hwoyigono iwɛ n-ndumwa ma ata, Ngee heŋteni Poul okwo i zhɛ ya kwulana bu maa zha Jɛrusalɛm maa a jɛmɛ ụshɛrɛya n-ndumwa mu bwa apata.

²¹Ama aka na tu go Poul shepi n-ndumwa mu bwa, bɛɛ hiɛŋ ge kepi bu, maa ga Sisa jɛmɛ ụshɛrɛya ubwa. Ibɛ po Ngee peni-unu maa ge kepi bu ga uuwa i ci aka na Ngɛɛ zhɛ ma tumwana bu no ofwo Sisa.

²²Nazhɛ ga Agripa hiɛŋ Fɛstos, I ga ma kwụlanɛ du maa ma hwuga n-ndumwa ma bụtụ ata ni ikɛnyi mi. Gɛ Fɛstos jishɛjɛ bụ, bɛɛ hiɛŋ, Beyi ga bi zhɛ ba hwuga n-ndumwa mu bwa.

²³Aka na ti iyi heri, ga Agripa ne Benesi mɛmɛ imɛ ni i'iwɛŋnɛ tu'urugono ụjɛrụma ụ'wụtụ, ne eberezhe asaza keeni atwa ihwungwɛ hwungwɛ ụshɛpwụ ata, ee teni nu umwono na aa duma n-ndumwa. Nazhɛ gɛ Fɛstos peni atwa unu maa ge tecinje Poul.

²⁴Gɛ Fɛstos hiɛŋ Agripa keeni atwa elele na namɛ apata, Kwụba ma bụtụ ga, Eju elele na namɛ nu Jɛrusalɛm keeni epe du a n tabwa iwɛ ubwa ni Sɛsɛria ga, aa uganɛ, ɛɛ hiɛŋ maa kede ya ya uraiŋ kwukwuŋ o.

²⁵Ama N kwụbɛtanɛ shɛ bụ kaa iyi nɛ baa njɛ waŋnɛ tu'wo, ibɛ po bee shepi n-ndumwa mu bwa ni ikɛnyi ibwɛ no ofwo uhiu cɛnjɛ ga Agustos. Ibɛ po Ama nda ahaŋsa maa ma tumwana bụ maa zha Rom.

²⁶N zasa iyi tikpeke nɛ maa Ma 'nyatana Iyɛri mi iwɛ ubwa o. Iwɛbɛ po Ngaa shapɛ bụ na agba hiŋ, inɛɛ nɛ hwuri inɛ vwɛ hwɛɛ i shɛ na agba bụ gabụ Agwuma Agripa, iwɛ maa aka na ebu hweyigeni iwɛ nu bwa, nekeshi du Ma 'yaga ya iyi nɛ maa Ma 'nyata.

²⁷I shɛ maa i zasa ecilo maa a tumwanɛ bujama bu umwono-tishi no ofwo uhiu cɛnjɛ[85] uzawa iyi tukpororo nɛ aa suyanɛ bụ ụshɛrɛya iwɛ ibɛ o.