Read bassa UGONDU WA ATUMWA 28 Bible Online

UGONDU WA ATUMWA 28 - bassa bible

UGONDU WA ATUMWA 28

¹Aka na eti benengeni hwɛɛ, nazhɛ eti mepi maa ɛɛ hiɛŋ ụdakwụ itekwu ɛtɛ, Malita.

²Atwa na jɛjɛ nụ ụdakwụ itekwu ɛtɛ, e ti mepeni iwɛ tebiye uhwuri inɛɛ nɛ atwa a shana aa tu mapana. Iwɛnɛ to o tu to amuraba tebiye, aa tɛ shananɛ ulwa maa ta hwatụ, iwɛnɛ te eshilo o ngbo, mpiala kaa mɛ tɛ shɛ.

³Ama aka na tu go Poul suje tɛngwuzhɛ tu ko ti gembi, bee zweni tu nu ulwa, ama oholobwo ulwa ata iri ugbezhi uko, waa banɛ waa ndapanɛ Poul nu u'ala.

⁴Aka na ta atwa na jɛjɛ nụ ụdakwụ ata kwụbɛ tu uhwa ata ndapanɛ bụ nu u'ala, aa mama hiaŋnụ, Bụtụ ga shɛ bụkwụnɛ ba atwa caakwụ, okwo tu baa bananganɛ itekwu, ụshɛrɛya u tishiriri zha shɛ wo lonono bu maa ya ya uraiŋ o.

⁵Nazhɛ go Poul bibizeni uhwa ata nu ulwa, bɛ njɛ shɛ bụ kaa iyi iwɛ ye elele o.

⁶Ama e ge heŋshi maa u'ala Poul zhɛ wɛ shɛŋ, kwo kaa bi gɛ zhɛ ba laya eshigiri bo 'wo. Ama gana na ta a ngbaracɛ uuwa, aa kwụbɛ shɛ iyi iwɛ ye elele nɛ njɛ bụ, ee sheyinji shihaŋsa sha aba, ɛɛ hiɛŋ, Ụzhɛba go Poul shɛ!

⁷Cɛnjɛ tu ko tu namba tu dongonu ofwo ata, ɛ hiɛŋ bụtụ na shɛ buhwuri-bu-umbe ba tuba, go Publius. Bee ti leshiji ni ihwɛ ibwɛ ijitɛ itɛtu, baa tɛ njɛ tebiye.

⁸Bishi Publius weci, mpiala mɛ shɛ bụ, etini du 'imɛ bụ. Go Poul teni pu bwa, baa njɛ adua, bee peteni bu i'ɛlɛ ibwɛ, baa nɛnjɛ bụ.

⁹Aka na tu baa njɛ inɛ ɛtɛ, atwa vwɛ a na namɛ nụ ụdakwụ ata a na a gwumanga zhajɛ, baa nɛnjɛ aŋ hwɛɛ.

¹⁰Atwa ata a tụ mụnɛ ụjɛrụma ni iyi ifwugwo,[92] aka na eti teni ụhaŋtụ, ee tu zweneni iyi nɛ ukekeshi ibɛ ga tu nda nụ ụhaŋtụ iwɛ tahaŋụ tu tu.

¹¹Na aba na ti ipiɛnɛ itɛtu keshici, eti teni ụhaŋtụ uko na namɛ nụ ụdakwụ itekwu ɛtɛ na aka bu ushwo. Ụhaŋtụ ata banɛ na Alɛkizandiria, ɛ hiɛŋ useyida ubwa, Ụzhɛba shidɛngwurɛbɛ.

¹²Nazhɛ ɛti zɛtɛ ụhaŋtụ ata nu Sairakus, atɛ jɛjɛ apata ijitɛ itɛtu.

¹³Eti beni apata, eti ringeni eti ci Rɛgium. Aka na tu ụjita uko keshici, mpiala mu tuta mɛ njɛ, nazhɛ ati zhajɛ Potol nụ ụjita uyebi.

¹⁴Apata atụ kwụbɛ miaụŋ-mo-bino mu ko, aa tu tabwa maa ta gɛga na aba ijitɛ icenje. Gana eti ci Rom ta.

¹⁵Aka na ta miaụŋ-mo-bino mu Rom mụ hwụjɛ unabarɛ tu maa te ci ba, ɛɛ ti tɛjɛ uhwaŋna tutu udukwo Apius keeni Iketi itɛtu. Aka na tu go Poul kwụbɛ aŋ, baa njɛ ugwoje na Agwatana, nazhɛ du amɛ ubwa lemi.

¹⁶Aka na eti teni Rom, ee leneni Poul maa gɛga bwooko na busaza na ba ngbaraka bụ.

¹⁷Ti ijitɛ itɛtu keshici, go Poul suyanɛ ehwurembe Eju a na namɛ nu ụshɛpwụ ata pu bwa. Aka na ta a zhajɛ, bɛɛ hiɛŋ aŋ, A-miaụŋ-mo-bino mi, Okwo tu Ngaa njɛ shɛ atwa tu kwo kaa iyi uvwovwu tu iyi iwɛ ye elele, ɛ n 'imɛ waa nu Jɛrusalɛm, aa n njɛ bujama, ee n utegeni Orom.

¹⁸Aka na te e n heŋtengeni iheŋtengene, ibɛ po yaa kwụlanɛ aŋ maa e n genji, iwɛnɛ ta a kwụbɛ shɛ iyi elele nɛ Ngaa njɛ lanɛ tu'wo.

¹⁹Ama aka na te Eju leni shi, ibɛ po yaa n tɛtajɛ maa Ma shapɛ n-ndumwa mi mi no ofwo Sisa. N nga zasa iyi elele maa Ma suyana udenji mu ụshɛrɛya o.

²⁰Iwɛbɛ po Ngaa hi suyanɛ maa Ma hiɛ kwụba, maa Ma dumanga du n-ndumwa ne hiŋ. Iwɛnɛ po iwɛ bụtụ na atwa Isrɛl a nda ashɛlatụ ubwa, ibɛ po oo n to ogbo ga.

²¹Ɛɛ jishijɛ bụ, ɛɛ hiɛŋ, Atwa Judia kaa ti 'nyeteni shi utakada we elele iwɛ bụ o, i zasa kaa bụtụ be elele na ashashɛ miaụŋ-mo-bino zhajɛ epe maa e ti mbishi kwo kaa maa a jɛmɛ iyi iwɛ ye elele iwɛ bụ o.

²²Ama i tu kwụlanɛ maa ta hwuga iyi nɛ ebi heŋshi. Ti mepi maa atwa a dumangana urubwo ga n-ndumwa mụ wɛ no ofwo elele.

²³Aka na te e shileni Poul ụjita, atwa ofwugwo ụ'wụtụ wa aba zhajɛ pu bwa jita ata no ofwo na boo zokwu. Bee eshicigeni aŋ n-ndumwa ma ata, bee le tiseyida iwɛ Cɛnjɛ-ta-tugwama ta Agwatana tebiye, baa jɛmɛ n-ndumwa mu Undwa Moses, keeni munaa na egesere jɛmɛ iwɛ Jisus, te kwuni nu uvwungwa tutu ụrụmɛ, iwɛ maa shihaŋsa sha aba shi leni.

²⁴Atwa oko tɛtanɛ n-ndumwa mu na baa jɛmɛ rishe, ama atwa oko tɛtanɛ shɛ rishe o.

²⁵Ama aka na to o momo lononu su abaaba, ee hwuri na aba na tu go Poul jɛmɛ n-ndumwa mu ga, bɛɛ hiɛŋ, Mpiala mi Tijilo mi mbiswo eshi tu n-ndumwa mi biye, tedure nu unu bigesere ga Ayizaya, bɛɛ hiɛŋ,

²⁶Zhaga no ofwo atwa ga, maa mbishi aŋ maa, Tuhwuga ɛhi zhɛ hi na hwuga, ama hi zha shɛ hie eshicigo; tungbaraka ɛhi zhɛ hi na ngbaraka, ama hi zha shɛ hia kwụba o;

²⁷iwɛnɛ ta shɛmɛ sha atwa ga sha nda ti'insu, yaa 'yaganɛ aŋ kaa ikɛnyi tuhwuga, e utegeji shishe sha aba, iwɛ maa kede a kwụbɛ ne shishe sha aba o. Iwɛ aka na ɛɛ zhɛ a hwuga na shɛcɛbɛ sha aba, ɛɛ zhɛ e eshicigo na shihaŋsa sha aba, ɛɛ zhɛ a jɛshɛrɛga maa Ma nɛnga aŋ.

²⁸Mapa ma maa a tumwanua atwa na shɛ shɛ Eju utumwa ubino wa Agwatana, ɛɛ zhɛ kaa a shɛlaga iwɛ ubwa.

²⁹[Aka na tu go Poul jɛmɛ iwɛ gɛ, nazhɛ Eju hwuri, aa nda ashamanjɛ a'wụtụ abaaba].

³⁰Shiywa shi yebi mudu go Poul jɛjɛ nu umwono na baa tụpa ukwuribi ubwa. Boo to atwa elele na zhajɛ pu bwa amuraba nu unyasa.

³¹Go Poul enenji iwɛ Cɛnjɛ-ta-tugwama ta Agwatana, bee mbisegeni atwa iyi iwɛ Agwangwama Jisus Krast ne eshe-hwoo, i zasa kaa bụtụ be elele na lakanɛ bu o.