Read bassa UGONDU WA ATUMWA 3 Bible Online

UGONDU WA ATUMWA 3 - bassa bible

UGONDU WA ATUMWA 3

¹Jitoo ko ga Pita na Jon, zhɛ nu Umwono wa Agwatana na aka ogogo atatụ tu uwaŋna yinganɛ duwa, ibɛ shɛ aka adua.

²Ibɛ atwa oko 'waŋnɛ bụtụ bu ko na shɛ ugwurukwu taa te e meci bu, oo shilo bu no odubo ata Umwono wa Agwatana, a na ɛɛ hiɛŋ izeci ya aba, Tipilanụ, maa bu na lụpa atwa na o tono nu Umwono wa Agwatana ukwuribi.

³Aka na tu baa kwụbɛ Pita na Jon, tɛ ɛ zhɛ o tono nu Umwono wa Agwatana, baa lụpɛ aŋ ukwuribi.

⁴Ama ga Pita na Jon zweni bu igbɛtɛtɛ, ga Pita hiɛŋ bụ, Utu ngbaraka!

⁵Ibɛ po bụtụ ata zweni aŋ ga igbɛtɛtɛ, bi ge heŋshi maa ɛ zhɛ a pana bụ iyi ike.

⁶Ama ga Pita hiɛŋ bụ, N zasa ukwuribi we elele o, ama iyi nɛ Ngaa 'yajɛ, ibɛ Ngɛɛ zhɛ ma bu pana. Ishijɛ zhe tahaŋnụ ni izeci Jisus Krast bụtụ bu Nazarɛt.

⁷Ga Pita imɛ bu u'ala ubiye, bɛɛ ishicinjɛ bụ. Gunu ata ɛvwɛvwɛjɛ ubwa keeni o'umpwo ashɛgashɛga ubwa 'yajɛ ikɛnyi.

⁸Bɛɛ ishijɛ bee shikeni, bee jwe ungapa, bee teni nu Umwono wa Agwatana na ata Pita, baa zha tahaŋnụ, baa dwa angapa, baa shɛtana Agwatana.

⁹Atwa kpaaŋ kwụbɛ bụ, tu baa zha tahaŋnụ, baa shɛtana Agwatana.

¹⁰E mepi kaa maa bụtụ ga ba shana ba gɛga no Odubo ata Umwono wa Agwatana, ɛɛ hiɛŋ, Tipilanụ, ba lụpa ilupwɛ na. Ibɛ po igɛhi 'imɛ aŋ, yaa dama aŋ kpaaŋ aba iwɛ iyi nɛ jiteni bu.

¹¹Ta bụtụ ata untanganɛ Pita na Jon, atwa elele gezheji, aa ụlwataganụ aŋ na amɛ angba Sụlụmụn, igɛhi 'imɛ aŋ duwa.

¹²Aka na tu ga Pita kwụbɛ aŋ, bɛɛ hiɛŋ aŋ, Ahiɛba atwa Isrɛl, Iwembe po iwɛ bụtụ ga ihi damaa? Kwo kaa iwembe po ehi tu zweni igbɛtɛtɛ gana gaa, gana maa nu ukpahiŋ tu kwo kaa ne tiririri tu tu atɛ njɛ maa bụtụ ga zhe tahaŋnụụ?

¹³Agwatana Abraham, na Agwatana Azik, keeni Agwatana Jekob, na shɛ Agwatana ogwunukwoshi tu, ubwa peni Yɛu ibwɛ ugondu[11] ụjɛrụma, ubwa shɛ ge Jisus ata ehi shepi la ehi peni atwa, ehi teri ashamanjɛ ubwa ne eshe Pɛilat, na aka na tu baa jala la maa ganga bụ u hwulo.

¹⁴Ama hi teri ashamanjɛ Bụtụ ata bi tijilo, na shɛ bụtụ bi tiririri, ahiɛ lụpɛ maa e hi gengeni bụkwụnɛ ba atwa.

¹⁵Ahiɛ kwụnɛ bụtụ na ba pana atwa uraiŋ, ama Agwatana kaa hicinjɛ bụ no tu'wo. Atuba tɛ shɛ eseyida iwɛ ɛtɛ.

¹⁶Rishe-tɛtɛtana izeci Jisus,[12] ibɛ peni bụtụ ga ahiɛ kwụbɛ, ehi mepi du kaa ukpahiŋ. Rishe ra ata tɛtɛtana tedure Jisus,[13] ruba ri peni bụtụ ga ahiɛ kwụbɛ ne eshe hiŋ kpaaŋ ulapiya.

¹⁷A-miaụŋ-mo-bino mi, M mepi ya hwuwayɛ go maa nu umepiteshi ahiɛ njɛ iŋ la, te ehiu hiŋ hwɛɛ.

¹⁸Ama iyi nɛ Agwatana dumwa la nu unu we egesere ubwa kpaaŋ, maa ga Krast zhɛ ba nda ụbaụta, ibɛ gɛnɛnɛ baa njɛ maa i sɛ.

¹⁹Jɛshɛrɛga ma ya shihaŋsa shi hiŋ hwuwayɛ maa hi zhe pa Agwatana, maa sugo iwɛwɛ hiŋ, iwɛ maa Agwangwama ihi ingatanjɛ hwuŋ ta aka ata ci.

²⁰Nazhɛ Agwangwama zhɛ ma hi tumwananɛ ukpahiŋ ufwo, ubwa shɛ ge Jisus ata i shɛ gɛ Mɛsaya ata bee teri.

²¹I shɛ i tilɛɛ maa nama tugwo na azuba uuwa i ci aka na Agwatana zhɛ ba nda iyi elele tɛnda tu ufwo, ibɛ shɛ inɛɛ nɛ Agwatana dumwa la cala nu unu we egesere ubwa tijilo, a na namba la cala uuwa i ci aka ga.

²²Go Moses hiɛŋ, Agwangwama zhɛ ma hi talaga bigesere na ashashɛ miaụŋ-mo-bino hiŋ, gana na bee n teri la, hiɛ shɛ kaa hi na hwuga-unu ubwa ni iyi elele nɛ boo hi mbiso.

²³Bụtụ be elele na kaa hwụjɛ shɛ unu iwɛ nɛ bigesere ata ba duma, ɛ zhɛ a bacɛnga bụ na ashashɛ atwa ubwa, maa a kwụnɛ bụ.

²⁴Egesere elele na namɛ la te kwune na aka Samuɛl keeni anaa na 'wa bụ, jɛmɛ la iwɛ ijɛ ya nda na aka ga.

²⁵Ahiɛba kaa hiɛ shɛ miaụŋ me egesere ata keeni miaụŋ mu unu ata Agwatana twa la ne eshi hiŋ, aka na ti bɛɛ hiɛŋ la Abraham, Tedure na ajalalo bu, Ngɛɛ zhɛ ma pana atwa unyizo ga kpaaŋ uwebiye.

²⁶Ibɛ po Agwatana teri Yɛu-ugondu ubwa, baa hi tumwananɛ bụ hiiŋ iwɛ maa ma hi pana uwebiye ata ụ'wụtụ, tedure na tɛjɛshɛrɛga tu na bụtụ bụtụ zhɛ ba jɛshɛrɛga na ashashɛ hiŋ maa ganga iyi iwɛ ibwɛ.