Read bassa UGONDU WA ATUMWA 7 Bible Online

UGONDU WA ATUMWA 7 - bassa bible

UGONDU WA ATUMWA 7

¹Nazhɛ Bunongbo bụ 'wụtụ heŋteni Stivin, bɛɛ hiɛŋ, Gana go ga hŋ yaa shɛ?

²Ge Stivin jishijɛ bụ, bɛɛ hiɛŋ, Amiaụŋ-mo-bino mi, keeni eshi mi, hwulaga ma n-ndumwa mi mi. Agwatana ụjɛrụma bananɛ la bishi tu ga Abraham, aka na tu baa namɛ nu Mɛsopotemia, nazhɛ baa jɛjɛ ya na cɛnjɛ tu Haran.

³Bɛɛ hiɛŋ bụ, Bana na cɛnjɛ tụ bụ, maa genji umwamwa bụ maa zhe na cɛnjɛ tu na Ngɛɛ zhɛ mo bu mbisono.

⁴Bee beni ga na cɛnjɛ tu Kaldia na shɛ cɛnjɛ tu bwa, baa jɛjɛ ya na cɛnjɛ tu Haran. Aka na te bishi bwa 'wi, nazhɛ Agwatana shapananɛ bụ na cɛnjɛ tu ga ahiɛ jɛjɛ ya na tuba hwayɛ bana.

⁵Agwatana kaa peni shi Abraham ogwu na amɛ tuba, okwo ma tu na ti eri ta waŋna maa patana okwo uvwɛvwɛjɛ ubwa o. Ama Agwatana kaa shileni bu unu maa ubwa bɛɛ zhɛ ba pana tụ maa 'yaga keeni ajalalo ubwa. Ga Abraham kaa ta zasa la okwo yɛu aka ata o.

⁶Agwatana du mbishi bu, bɛɛ hiɛŋ, Ajalalo bu zhɛ a sha erinji na cɛnjɛ ta anya atwa, a na zhɛ a nda aŋ ajama, ɛ zhɛ a nda aŋ umungwuta shiywa akpakwụ-eyebi.

⁷Agwatana hiɛŋ bụ, Gamba n zhɛ ma duma ụshɛrɛya udenji ata a na zhɛ a nda aŋ ajama, na aba ibɛ nazhɛ ɛɛ zhɛ a banɛ na cɛnjɛ ta ata maa a n zhɛbɛ.

⁸Nazhɛ Agwatana peni Abraham unu-tutwa u teleyi tijaja. Ga Abraham meci Azik, baa namɛ ijitɛ itindɛtu, bee jeji teleyi tu bwa. Ga Azik meci Jekob, ge Jekob meci miaụŋ umpwa-na-muba-mi-yebi, mu na mɛ shɛ tukwuno ta alamụ tu.

⁹Ama miaụŋ-mo-bino Josɛf ma nda isɛbwɛngwɛ nu bwa, ibɛ po aa sukakanɛ bụ, harɛ ee senji bu na cɛnjɛ ti Ijipti. Ama Agwatana kaa namɛ nu bwa.

¹⁰Bee leshiji bu nu ụbaụta ata kpaaŋ. Agwatana kaa peni Josɛf ti'inta keeni tulubo-ti-biye na agba Faro Agwuma Ijipti, ibɛ po ga Faro njɛ bụ ugwomina cɛnjɛ ti Ijipti keeni uhiu ihwɛ ibwɛ hwɛɛ.

¹¹Na aka ata ibɛ imunɛ layɛ na cɛnjɛ ti Ijipti hwɛɛ, keeni cɛnjɛ ti Kenan. Eshi tu njɛ ụbaụta ụ'wụtụ, iwɛnɛ te e gwushiji shi iyimɛyɛ maa a na ya.

¹²Ama aka na ti ge Jekob hwụjɛ maa iyimɛyɛ namba na cɛnjɛ ti Ijipti, baa tumwanɛ miaụŋ mu bwa hiiŋ, aba shɛ ogwunukwoshi tu.

¹³Na aka tahaŋnụ ta aba ti yebi nazhɛ go Josɛf meme mbiseni ya atagwụ ubwa nazhɛ ga Faro mepi ya atwa umwamwa Josɛf.

¹⁴Nazhɛ go Josɛf tumwanɛ utumwa maa a suyanɛ bishi bwa ge Jekob keeni atwa umwamwa ubwa hwɛɛ, a na shɛ atwa dupu-nu-woshi-na-ba-a-ta, maa ga zhajɛ pu bwa.

¹⁵Nazhɛ ge Jekob zhe ni Ijipti, apata bee 'wi, ta miaụŋ mu bwa mu na mɛ shɛ ogwunukwoshi tu.

¹⁶Nazhɛ ee suje n'wo ma aba ee gwuricinje ni Shɛkɛm, ee ni aŋ apata nu u'uye ata ga Abraham so la na azụrụfa ni i'ɛlɛ miaụŋ mu Hemo na namɛ la ni Shɛkɛm.

¹⁷Ama aka na tu unu na Agwatana shileni la Abraham gwumwonu tuto, ufwugwo wa atwa ata tu kaa wa kaana ugombo ni Ijipti duwa.

¹⁸Nazhɛ agwuma oko na mepi shi la iyi elele iwɛ Josɛf yɛ tugwama ti Ijipti.

¹⁹Agwuma ata njɛ udenji tu umungwuta, bee peni aŋ ụbaụta, baa njɛ maa ge becinji miaụŋ mi shenje nu nhwaŋ ma aba, maa a kwụnɛ mụ.

²⁰Na aka ata kaa ee meci Moses na kaa pilanụ ne eshe Agwatana.[22] Aa bɛjɛ bụ ni ihwɛ bishi bwa ipiɛnɛ itɛtu.

²¹Aka na te e becinji bu ee shire no tupohondo, ibɛ po yɛu-yo-o Faro gwushiji bu, baa bɛjɛ bụ gana ti yɛu ibwɛ ikɛnyi ibwɛ.

²²Ibɛ po ee mbisegeni Moses ti'inta ta atwa Ijipti kpaaŋ, nazhɛ baa 'yajɛ ya ukpahiŋ nu n-ndumwa keeni ugondu tɛnda.

²³Ama aka na tu go Moses ci shiywa buhanda, ahaŋsa teni na amɛ ubwa maa ge hikeni miaụŋ-mo-bino bwa mu na mɛ shɛ atwa Isrɛl.

²⁴Aka na tu baa kwụbɛ ta bụtụ bi Ijipti bu ko ba nda aŋ iyi iwɛ, bee lesheji aŋ, baa njɛ itɛpwɛ, baa kwụnɛ bụtụ ata bi Ijipti.

²⁵Bi ge heŋshi maa atwa ata ubwa zhɛ o eshicigo maa Agwatana zhɛ o bicingo aŋ tedure nu bwa, ama e eshiciji shi o.

²⁶Ti iyi heri bee beneneni, baa kwụbɛ ta atwa Isrɛl eyebi a twa ifelu abaaba, baa jala maa lashaga aŋ, maa a latumananɛ. Bɛɛ hiɛŋ aŋ, Ahiɛba atwa mi, iwembe po ahi mama ndanụ iyi iwɛɛ?

²⁷Ama bụtụ ata ba nda binya bwa iyi iwɛ shishingeni Moses, bɛɛ hiɛŋ bụ, Gaaba bwa ubu njɛ uhiu tu keeni bɛjɛmɛ-bụ-ụshɛrɛya tuu?

²⁸Ba jala suu maa n kwụnɛ gana ata abụ kwụnɛ bụtụ bi Ijipti wenebe?

²⁹Aka na tu go Moses hwụjɛ n-ndumwa ma ata, bee gezhiji bee zhe baa namɛ na cɛnjɛ ti Midian. Apata bee meci miaụŋ-me-eyi mi yebi.

³⁰Aka na tu baa namɛ apata shiywa buhanda, nazhɛ butumwa-ba-azuba bananɛ bụ nu ụshɛka Ishɛmɛ Sainai tedure na bụratụ bu ulwa uko na wo hwoŋno nu ukokoto.

³¹Aka na tu go Moses kwụbɛ ulwa ata, waa dama bụ. Ibɛ po baa kaana tugwumwonu maa kwụba uŋ tebiye. Baa hwụjɛ ta rụhwụŋ ra Agwangwama ri hiɛŋ bụ,

³²Gamba n shɛ Agwatana ogwunukwoshi bu, ibɛ shɛ Agwatana Abraham, na Agwatana Azik keeni Agwatana Jekob. Ibɛ po inyɛsɛ shɛ Moses, harɛ baa zhɛgɛda, bi eri shi ba kara maa mbiyana uŋ ya o.

³³Nazhɛ Agwangwama hiɛŋ bụ, Hwucoko abida bụ, iwɛnɛ to ofwo ata ebi shikeni a shɛ ofwo tijilo.

³⁴N kwụbɛ iyi iwɛ nɛ atwa Ijipti a nda atwa mi, Ngaa hwụjɛ kaa i'nye nɛ oo 'nyongo, ibɛ po Ngee kezhe maa Ma lashɛga aŋ. Zhajɛ ya hwuwayɛ go, gabụ Ngɛɛ zhɛ ma tumwana ni Ijipti.

³⁵Go Moses ala aa lacɛ, ɛɛ hiɛŋ, Gaaba ubu njɛ uhiu keeni bɛjɛmɛ-bụ-ụshɛrɛya tuu? Ubwa ganana Agwatana tumwanɛ maa sha uhiu keeni bileleji, tedure no timbiyono ta butumwa-ba-azuba na bananɛ bụ nu ulwa ata wo hwoŋno nu ukokoto.

³⁶Bụtụ ganana ndanjɛ iyi ya arụhwajɛ keeni iyi tudama ni Ijipti, nazhɛ bɛɛ bɛcinjɛ aŋ na cɛnjɛ ta ata, ee keshi Itekwu Ishenje,[23] aa namɛ nụ ụshɛka shiywa buhanda.

³⁷Go Moses gatata hiɛŋ la miaụŋ mi Isrɛl, Agwatana zhɛ ma hi talaga bigesere na ashashɛ hiŋ gana na ti bee n teri la.[24]

³⁸Bụtụ ganana namɛ la na tụ'ụlwa-tụ-ụhiɛŋshɛ-Agwangwama nụ ụshɛka, na butumwa-ba-azuba na jɛmɛ la n-ndumwa nu bwa keeni ogwunukwoshi tu ni Ishɛmɛ Sainai. Bɛɛ lɛshijɛ n-ndumwa ma ata ma pana atwa uraiŋ maa ma tu pana.

³⁹Ogwunukwoshi tu jeri shi maa a hwụjɛ la unu ubwa o, ibɛ po ee shishingeni bu mabaaba, yaa namɛ na shɛmɛ sha aba maa e gwuleneni ni Ijipti.

⁴⁰Ibɛ po ɛɛ hiɛŋ Aron, Utu ndanɛ tuwa tu na ti zhɛ ta ti 'yagaga, iwɛnɛ te eti mepi shi iyi nɛ vwuteni Moses na gɛ tu vwɛ na cɛnjɛ ti Ijipti.

⁴¹Na aka ata ibɛ aa njɛ itɛtɛnuwɛŋ yɛu-buna, oo to ụrụpɛ ni ibɛ, aa njɛ isene unyasa iwɛ ugondu na aa njɛ ni i'ɛlɛ ya aba.

⁴²Ama Agwatana jɛshɛrɛjɛ bee genji aŋ, maa a na zhɛba iyi ifwugwo nɛ namɛ na azuba, gana na ti yee 'nyeci nu utakada we egesere, yɛɛ hiɛŋ, Oo ahiɛba atwa Isrɛl, shɛ Gamba la ahiɛ kwụnanjɛ iyimabiga ehi teji ụrụpɛ nụ ụshɛka shiywa buhanda o.

⁴³Ama udulo tuwa tu Molɛk keeni ikpɛsu tuwa ta ata ti hŋ, ɛɛ hiɛŋ, Refan, nɛ shɛ itɛtɛnuwɛŋ ɛtɛ ahiɛ njɛ maa hi na zhɛba. Iwɛbɛ po Ngɛɛ zhɛ ma nda maa a hiɛ 'imɛ maa e hi suji a hiɛ njɛ ajama hileniye Babulon.

⁴⁴Ogwunukwoshi tu 'yajɛ la udulo ata wa Agwatana u Tụ'ụlwatagwụ nụ ụshɛka. Go Moses njɛ uŋ te teni cɛŋ ne bimenji na Agwatana mbiseni bu baa kwụbɛ.

⁴⁵Ogwunukwoshi tu leshiji la udulo ata ne eshi aba na aka na tu go Joshua 'yagajɛ aŋ, aa 'waŋnɛ uŋ na aka na te e teni cɛnjɛ te edenji ata Agwatana unzenji aŋ. Udulo ata kaa namba la uuwa i ci aka Devid.

⁴⁶Agwatana hieci inyɛmɛnyɛmɛ ibwɛ, ibɛ po baa lụpɛ Agwatana maa go lonono bu maa mana atwa Isrɛl ofwo tɛzhɛba.[25]

⁴⁷Ama gụ Sụlụmụn ubwa meni bu[26] ya umwono ata.

⁴⁸Ama Agwatana na Hwuri Kpaaŋ kaa jɛjɛ shɛ no ofwo na butugwumwa njɛ ni i'ɛlɛ o. Gana na te bigesere bu ko jɛmɛ, bɛɛ hiɛŋ, Agwangwama hiɛŋ,

⁴⁹Azuba aba shɛ idwɛtwɛ mi, unyizo kaa ubwa shɛ udusa na Ama patangana ivwunɛ mi. Umwono imbe ɛhi tɛ zhɛ hi ma n manaa? Kwo kaa cee i shɛ ofwo mi tunamaa?

⁵⁰Shɛ Gamba suu n njɛ ijɛ ɛtɛ hwɛɛ?

⁵¹Ge Stivin hiɛŋ aŋ sasana, Ahiɛba na hiɛ shɛshɛpanɛ, ahiɛba na hi zasa swoswoswo na atwa na shɛ shɛ atwa Agwatana. Aka elele hia sukakana Mpiala mi Tijilo, ahia pashɛnga shɛcɛbɛ shi hiŋ nu n-ndumwa ma Agwatana, gobwonu du eshi hiŋ njɛ la gom.

⁵²Bigesere naa eshi hiŋ shɛcɛ shɛ laa? Aa kwụnɛ egesere na jɛmɛ iwɛ tizhajɛ ta Bụtụ ata bi tiririri,[27] bu gata ehi senji, ahiɛ kwụnɛ la.

⁵³Ahiɛba na hi leshiji Undwa na atumwa-azuba ihi peni, ama hiɛ hwụjɛ shɛ kaa unu ubwa o.

⁵⁴Aka na ta atwa ata ụshɛrɛya hwụjɛ n-ndumwa mu na ge Stivin jɛmɛ, isɛbwɛ munje aŋ tebiye, oo po ivwɛ ya aba ene iwɛ ubwa.

⁵⁵Ama gana na tu Mpiala mi Tijilo mi shini amɛ Stivin, bee shepi eshe na azuba, baa ngbaracɛ azuba zenjizenji, baa kwụbɛ ụjɛrụma wa Agwatana, keeni Jisus ti bee shikeni nu u'ala ubiye wa Agwatana.[28]

⁵⁶Bɛɛ hiɛŋ, Hioko ma, N kwụbɛ ta azuba kapɛshɛngwa, Ngaa kwụbɛ ti Yɛu Bụtụ shikeni nu u'alal ubiye wa Agwatana.

⁵⁷Ibɛ po atwa ata uganɛ duuwa, ee sukekeni shɛcɛbɛ sha aba, ee suleni Stivin hwɛɛ aba.

⁵⁸Ee becinji bu nụ ụshɛpwụ ata, ee tegeni bu atayɛ. Eseyida tileni otogwo aba nu ukaka usemberi uko na ɛɛ hiɛŋ go Soul.

⁵⁹Ge Stivin ba suyana Agwangwama ta a tagana bụ atayɛ ata, bɛɛ hiɛŋ, Agwangwama Jisus, lashɛga ihwungwɛ mi

⁶⁰Bee kwuzhi, baa uganɛ duuwa, bɛɛ hiɛŋ, Agwangwama, ta rɛta iwɛwɛ gɛ ya aba o. Aka na tu ba jɛmɛ iwɛ ɛtɛ, bee leyi malabụ.