Read bassa UGONDU WA ATUMWA 8 Bible Online

UGONDU WA ATUMWA 8 - bassa bible

UGONDU WA ATUMWA 8

¹Go Soul leni na tụkwụna tu na aa kwụnɛ Stivin. Te kwuni nụ ụjita ata ibɛ tɛshɛka tụ 'wụtụ ti ishɛganɛ tụ'ụlwa-tụ-ụhiɛŋshɛ-Agwangwama tu na tu namɛ nu Jɛrusalɛm. Ibɛ po atɛtanɛ-rishe garatagwụ hwɛɛ aba, ee zhe na cɛnjɛ tu Judia keeni Samaria, semi atumwa kiri vwɛ.

²Nazhɛ etwenyi na meme tileni swooŋ e ni Stivin, a twanɛ bụ u'wo duwa, oo to-ụkwụla iwɛ ubwa.

³Ama go Soul mekeni maa iricingo tụ'ụlwa-tụ-ụhiɛŋshɛ-Agwangwama, boo tonongo shimwono, baa mbata etwenyi ne eyikwo, boo zwono aŋ nu umwono-tishi.

⁴Ibɛ po atwa na garatagwụ rinji, ee enenji n-ndumwa ma Agwatana no ofwo elele na ee teni.

⁵Ge Filip zhe Samaria[29] bee enengeni aŋ Krast.

⁶Aka na ta atwa ofwugwo hwụjɛ n-ndumwa mu na ge Filip ba duma, aa kwụbɛ kaa du arụhwajɛ na baa nda, ibɛ po ee shiyeni shihaŋsa sha aba ni iwɛ nɛ baa duma.

⁷Iwɛnɛ po mpiala mụ wɛ[30] ma ugaga duwa, maa bananjɛ na shɛmɛ sha atwa ofwugwo, baa nɛnjɛ du atwa ofwugwo a na tu'waba ta aba tu 'wogeni keeni shigwurukwu shu ofwugwo.

⁸Ibɛ po atwa ụshɛpwụ ata njɛ unyasa ụ'wụtụ.

⁹Ama butubwenyi bu ko namba nụ ụshɛpwụ ata, ɛɛ hiɛŋ ga Saimon bɛnjɛ-bi-tishino, na ba dama atwa Samaria, iwɛnɛ tu baa mama njɛ gana bụtụ bu ko bụ 'wụtụ.

¹⁰Atwa elele tɛtanɛ iwɛ ubwa rishe, ta miaụŋ, ta atwa a'wụtụ, ɛɛ hiɛŋ, Bụtụ ga ubwa shɛ ukpahiŋ wa Agwatana na ɛɛ hiɛŋ, Una ụ'wụtụ.

¹¹Iwɛnɛ ti yee ilegeji ya tu baa ndana aŋ tishino ta ata, ibɛ po aa tɛtanɛ iwɛ ubwa rishe.

¹²Ama aka na ta atwa tɛtanɛ i'enenji ya Anabarɛ Ebiye Cɛnjɛ-ta-tugwama ta Agwatana keeni izeci Jisus Krast nɛ ge Filipi ba ananga rishe, aa njɛ aŋ ubaptizim, te etwenyi te eyikwo.

¹³Ga Saimon du tɛtanɛ-rishe ni ikɛnyi ibwɛ, aa njɛ bu du ubaptizim, baa 'wa ya Filip no ofwo elele. Ama aka na tu baa kwụbɛ iyi tudama keeni arụhwajɛ na ge Filip ba nda, yaa dama bụ.

¹⁴Aka na ta atumwa na namɛ nu Jɛrusalɛm hwụjɛ maa Asamaria leshiji n-ndumwa ma Agwatana, aa tumwananɛ aŋ Pita keeni Jon.

¹⁵Aka na te e ci apata, aa ndanɛ aŋ adua maa e leshiji Mpiala mi Tijilo.

¹⁶Iwɛnɛ po bi ge te zhegeni shi bụtụ be elele na ashashɛ aba o, semi ubaptizim kiri aa njɛ aŋ ni izeci ya Agwangwama Jisus.

¹⁷Ibɛ po ee petengeni aŋ i'ɛlɛ ya aba, nazhɛ ee leshiji Mpiala mi Tijilo.

¹⁸Aka na tu ga Saimon kwụbɛ maa tedure ni i'ɛlɛ nɛ atumwa petengeni aŋ, ee leshiji Mpiala mi Tijilo, baa shɛkanɛ aŋ ukwuribi, bɛɛ hiɛŋ,

¹⁹M peni ma du ụhwada ga, iwɛ maa bụtụ be elele na Ngee peteni i'ɛlɛ mi, maa lashɛga du Mpiala mi Tijilo.

²⁰Ama ga Pita jishijɛ bụ, bɛɛ hiɛŋ, Ga azụrụfa ata bụ njɛ ufwu tu gabụ, iwɛnɛ te ebi heŋshi maa nu ukwuribi aa lashɛga upwaŋ wa Agwatana!

²¹Bu zasa urobwo we elele ni iwɛ gɛ o, iwɛnɛ ta ahaŋsa bụ zasa kpororo ne eshe Agwatana.

²²Jɛshɛrɛga-ahaŋsa maa genji iyi iwɛ ɛtɛ ebi heŋshi, maa tabwa Agwatana, nekeshi ba bu gangana ahaŋsa ga ebi heŋshi.

²³N kwụbɛ maa bu ta namɛ na mangayɛ mụ ụgagwụ keeni tijama ti iwɛwɛ.

²⁴Ga Saimon jishijɛ bụ, bɛɛ hiɛŋ, Tabwa ma Agwangwama iwe mi, iwɛ maa kede ijɛ ahiɛ jɛmɛ kezhe nu uhiuhiu mu o.

²⁵Aka na te e le tiseyida, aa jɛmɛ n-ndumwa ma Agwangwama, ee hwuri ujiyo nu Jɛrusalɛm, aa ananga Anabarɛ Ebiye na ashɛpwụ Samaria ofwugwo tɛ ɛ zhɛ.

²⁶Ama butumwa ba Agwangwama ba azuba hiɛŋ Filip, Ishijɛ maa zhe geri bu tuta[31] tu uhwaŋna ata banɛ nu Jɛrusalɛm zhɛ Gaza. Ugata shɛ uhwaŋna ụshɛka.

²⁷Ge Filip ishijɛ ga bee zhe. Baa kwụbɛ bụtụ ata bi Itiopia na shɛ ivwɛlɛ, na 'yajɛ ụhwada ụ'wụtụ nu ugondu wa Agwuma-o-o Itiopia. Uduciya wa Agwuma ata o o hwɛɛ zweni ni i'ɛlɛ ivwɛlɛ ɛtɛ. Bụtụ ata ge zhe Jɛrusalɛm maa zhɛba Agwatana.

²⁸Ti bee ci ya ujiyo, baa jɛjɛ nụ ụhaŋtụ ubwa ụ cɛnjɛ, baa rɛta utakada bigesere ga Ayizaya.

²⁹Ibɛ po Mpiala mi Tijilo mi hiɛŋ Filip, Zhaga dongonu ụhaŋtụ ata maa zhagaga nu bwa.

³⁰Ge Filip gezhiji ga, bee zhe apata, baa hwụjɛ tu baa rɛta utakada bigesere ga Ayizaya. Ge Filip heŋteni bu, bɛɛ hiɛŋ, Bi eshiciji hŋ ijɛ aba rɛta?

³¹Nazhɛ bụtụ ata bu ụhwada jishijɛ Filip, bɛɛ hiɛŋ, Gana naa Nge eri mo eshicigo ti yaa shɛ bụtụ be elele n eshicigeni shii? Ibɛ po baa lụpɛ Filip maa ge munje maa gɛga nu bwa.

³²Upada Utakada Iwɛ ya Agwatana na baa rɛta hiɛŋ, E zeriji bu gana na aa zarɛga yɛu-ụgwụdụ no ofwo na ɛɛ zhɛ a shɛla bụ, gana na ti yɛu-ụgwụdụ ya sha igwureni ni i'ɛlɛ bụtụ na ba hwaga tihiŋzhe tu bwa, bu dumanɛ shɛ iwɛ ye elele o.

³³A lacɛ maa a jɛmɛ ụshɛrɛya ubwa ne tishiriri, iwɛnɛ ti bee meme zucinje. Gaaba zhɛ ba imanjɛ ajalalo ubwaa? Iwɛnɛ te e becinji uraiŋ ubwa nu unyizo.

³⁴Nazhɛ ivwɛlɛ ɛtɛ heŋteni Filip, bɛɛ hiɛŋ, M mbishi ka iwɛ bụtụ na bigesere ga ba duma. Iwɛ ikɛnyi ibwɛ suu, okwo iwɛ binya bụtụ?

³⁵Nazhɛ ge Filip kwuni n-ndumwa mu bwa tụdụma te kwune na shɛwala shi Iwɛ ya Agwatana ata, bee enengeni bu iwɛ Jisus.

³⁶Gana na ta a zha tahaŋnụ ta aba, ee ci meni mu ko, ibɛ ivwɛlɛ ɛtɛ hiɛŋ Filip, kwụba, meni na. Imbe kwuŋ zhɛ ma n kapana ubaptizim tɛndaa?

³⁷[Ge Filip jishijɛ bụ, bɛɛ hiɛŋ, Yaa shɛ abu tɛtanɛ-rishe na amɛ bu hwɛɛ, ɛ zhɛ ma bu nda. Ivwɛlɛ ɛtɛ jishijɛ bụ, bɛɛ hiɛŋ, N tɛtanɛ kaa rishe maa ge Jisus Krast ubwa shɛ Yɛu ya Agwatana.][32]

³⁸Ibɛ po ivwɛlɛ ɛtɛ peni-unu maa ge shikicinji ụhaŋtụ ata. Ee zwi ne meni ebeyebi, ti ge Filip, ti ivwɛlɛ ɛtɛ, ge Filip njɛ bụ ubaptizim.

³⁹Aka na ta a banɛ ne meni, Mpiala ma Agwangwama mi shepi Filip, ivwɛlɛ ɛtɛ kwụbɛ shɛ bụ ya kwukwuŋ. Ama ivwɛlɛ ɛtɛ tuba to tuhwulo ta tahaŋnụ tu bwa nu unyasa.

⁴⁰Ama a kwụbɛ Filip na Azotos, tu boo dulogo ashɛpwụ elele baa ananga Anabarɛ Ebiye tutu bee ci Sɛsɛria.