Read bassa ROM 13 Bible Online

ROM 13 - bassa bible

ROM 13

¹Ga bụtụ bụtụ no momo shilono ụhwada na untanganɛ bụ, iwɛnɛ ti yaa zasa ụhwada we elele na namba, semi unaa na banɛ no olugwo Agwatana. Ahwada na kaa namɛ, Agwatana tileni aŋ.

²Ibɛ po bụtụ be elele na ba sukakana ụhwada, asha ba sukakana iyi nɛ Agwatana shiri. Atwa na kaa a sukakana uŋ, asha ụshɛrɛya ee meme sugeni.

³Iwɛnɛ po ehiu ga shɛ shɛ iyi inyɛsɛ ta ba nda ugondu ubiye o, semi ta ba nda una ụwɛ. I bu kwụlanɛ suu maa kede inyɛsɛ ya atwa ụhwada na bu sha? Asha na nda iyi ibiye, nazhɛ ɛɛ zhɛ ma bu dumanga.

⁴Iwɛnɛ po Agwatana aa ndana iyi iwɛ bu, iwɛ maa ibu zhɛmanɛ. Ama yaa shɛ aba nda iyi iwɛ, asha na nda inyɛsɛ ya aba, iwɛnɛ tu utokwobi na aa untanganɛ shɛ shɛ gadaga, ama anjɛ-itɛpwɛ aa shɛ, iwɛ maa a na nda isɛbwɛ no ofwo bụtụ be elele na ba nda iyi iwɛ.

⁵Iwɛbɛ po yaa shɛ i tilɛɛ maa hi meme tileneni ụhwada, shɛ iwɛ maa hi gezhigeni isɛbwɛ kiri o, ama iwɛnɛ ti yee teni cɛŋ maa bụtụ njɛ.

⁶Iwɛ ecilo ga ahia tụpa du adalụ. Iwɛnɛ po Agwatana aa ndana ugondu, gana go kaa a nda uŋ tutu.

⁷Na tụpa ma atwa elele atashɛ aba. Bụtụ na ba lashɛga ukwuribi wa adalụ, na tụpa bu ma ukwuribi wa adalụ; bụtụ na kaa aa tụpa ukwuribi ụhwada, na tụpa bu ma ukwuribi ụhwada; bụtụ na kaa aa nda inyɛsɛ ibwɛ, na nda ma inyɛsɛ ibwɛ; bụtụ na kaa aa muna ụjɛrụma, na muna bu ma ụjɛrụma.

⁸Ta ya ma bụtụ be elele utashɛ we elele o, semi ga shɛ tumomo lubonu kiri ehi momo lubonu. Bụtụ na bo lubo binya bwa, asha bụ ụrɛcɛnjɛ iyi nɛ undwa jɛmɛ.

⁹Iwɛbɛ po onu-tupana ata ɛ hiɛŋ, Ta nda tuwɛle o, ta kwụna bụtụ o, to zundo izunde o, ta la tiseyida tu tukata o, ta nda eshe-iyi o, ama unu-tupana unya we elele na ta namba ya, asha u namɛ na amɛ iwɛ ɛtɛ ike, nɛ hiɛŋ, No lubo uyebi bu gana na obu momo lubo.

¹⁰Tulubo tɛ njɛ shɛ uyebi ubwa iyi iwɛ o; ibɛ po tulubo tɛ shɛ undwa tụ'ụrɛcɛnga.

¹¹Ijɛ du ahiɛ shɛ hi na nda, zhinjɛ ma ya malabụ, gana na te ehi mepi maa aka ci ya cebe. Aka na maa e ti bicinji gwumwongonu ya hwuwayɛ uhwuri aka ala atɛ tɛtanɛ-rishe hiiŋ.

¹²Ụjita shiwo ya cebe, iyi gwumwonu ya tuholo. Ibɛ po yaa shɛ tilɛɛ maa ti tileni ma ya ugondu tishi, maa tu no urugono ma i'wɛŋnɛ ujasa uhioko-uhwaŋna.

¹³Tu na zha ma tahaŋnụ shii gana na ta bụtụ ba zha tahaŋnụ nu uwaŋna. Kede tu nama ma na ti'nyama keeni mayaga tuswagana o, kede tu nama ma nɛ tuwɛle keeni eshe-iyi o, kede tu nama ma na ashamanjɛ keeni isɛbwɛngwɛ o.

¹⁴Ama no urugono ma masha ma Agwangwama Jisus Krast, to no shiyono ma ahaŋsa hiŋ nu ukwedeyi masha ma butugwumwa o.