Read bassa ROM 16 Bible Online

ROM 16 - bassa bible

ROM 16

¹Mo hi utogono bụngwụfwụ tu ge Fibi, na shɛ bɛnjɛ-bi-iyi[36] ba tụ'ụlwa-tụ-ụhiɛŋshɛ-Agwangwama tu na tu namɛ ni Kɛnkɛria,

²maa hi leshiji bu na amɛ Agwangwama, gana na lanɛ maa atwa tijilo leshiji bụtụ, maa hi no mbiyono bu ni iyi elele nɛ ukekeshi ibɛ wa nda bu pi hiŋ. Iwɛnɛ po ubwa ni ikɛnyi ibwɛ ba sumanɛ atwa ofwugwo u'uno hwɛɛ, tu Gamba ni ikɛnyi mi du.

³'Walụ ma Prisika[37] keeni Akwila, a na a nda ugondu ne mi na amɛ Krast Jisus,

⁴anaa na keri ohiuhiu aba iwe mi; shɛ Gamba ngooko kaa du kiri ma nda ugwoje wa aba o, ama ta atwa tụ'ụlwa-tụ-ụhiɛŋshɛ-Agwangwama ta atwa na shɛ shɛ Eju du ta nda ugwoje wa aba hwɛɛ.

⁵'Walụ ma tụ'ụlwa-tụ-ụhiɛŋshɛ-Agwangwama tu na to sotulonu ni ihwɛ ya aba. 'Walụ ma biyejilo mi bu tulubo gɛ Ɛpainɛtos, na shɛ bụtụ bi hiiŋ na leshiji iwɛ Krast na cɛnjɛ te Esia.

⁶'Walụ ma Meri na njɛ ugondu nụ ụbaụta duwa iwe hiŋ.

⁷'Walụ ma Andronikos keeni Junias,[38] a na shɛ udenji mu,[39] a na namɛ nu umwono-tishi ne mi. A shɛ atwa na 'yajɛ izeci na ashashɛ atumwa, aba du shɛ atwa na tɛtanɛ Krast rishe hiiŋ ne mi.

⁸'Walụ ma Ampiliatos, bụtụ mi bu tulubo na amɛ Agwangwama.

⁹'Walụ ma Obanos, na ba nda ugondu no tu na amɛ Krast, keeni Sitikus bụtụ mi bu tulubo.

¹⁰'Walụ ma Apɛlɛs, na shɛ bụtụ na ee menji aa kwụbɛ maa bi teni cɛŋ na amɛ Krast. 'Walụ ma atwa ihwɛ Aristobulos.

¹¹'Walụ ma Hɛrodon, na shɛ udenji mu. 'Walụ ma atwa ihwɛ Nasisos na namɛ na amɛ Agwangwama.

¹²'Walụ ma Trufaina keeni Trufosa, a shɛ eyikwo na njɛ ugondu nụ ụbaụta iwɛ ya Agwangwama. 'Walụ ma Pesis, biyikwo ata bu tulubo na njɛ ugondu nụ ụbaụta duwa iwɛ ya Agwangwama.

¹³'Walụ ma Roufos, na ee teri na amɛ Agwangwama, keeni bino bwa na shɛ du bino mi.

¹⁴'Walụ ma Asinkritos, keeni Filɛgon, nɛ Hɛmɛs, na Patrobas, nɛ Hɛmas keeni miaụŋ-mo-bino na namɛ na aba.

¹⁵'Walụ ma Filologos, no Julia, ne Neros keeni bụngwụfwụ bwa, keeni Olumpas, keeni atwa tijilo elele na namɛ na aba.

¹⁶Na mama 'walanụ ma a'walụ tijilo. Tu'ulwatagwụ tu Krast hwɛɛ ta hi 'walụ.

¹⁷A-miaụŋ-mo-bino mi na amɛ Krast, Ma hi lụpa maa hi no shiyono atwa na a 'waŋnɛ tubogwu keeni iyi ukwurishi nɛ ya sukakana imbisegeni tu nɛ ehi seshi eshe maa kede hi cimi aŋ o.

¹⁸Iwɛnɛ po shɛ Agwangwama Krast atwa gana ata a ndana iyi o, semi shɛmɛ sha aba kiri aa ndana iyi.[40] A na halakaka atwa na te eshiciji shi iyi tebiye tedure nu n-ndumwa ma aba mi biye keeni unu wa aba ụlatụ.

¹⁹Iwɛnɛ po unu na ahi hwụjɛ teni atwa kpaaŋ na shɛcɛbɛ. Ibɛ po Ama nda unyasa iwe hiŋ, ama i n kwụlanɛ maa hiɛ shɛ atwa na incɛ ni iyi ibiye, ama to no shiyono ma tuba i'ɛlɛ hiŋ ni iyi iwɛ o.

²⁰Ama Agwatana amɛ-olom zhɛ a pɛpɛtana Setan tuta tɛ shivwɛvwɛjɛ shi hiŋ hwuwayɛ hwuwayɛ.

²¹Go tulubo-ti-biye ta Agwangwama tu Jisus Krast tu nama ne hiŋ. Go Timoti na ba nda ugondu ne mi, ma hi 'walụ, no Lukios, na Jason keeni Sosipata, a na shɛ udenji mu, ma hi 'walụ du.

²²Gamba gɛ Tɛtios na 'nyacɛ utakada ga, Ma hi 'walụ na amɛ Agwangwama.

²³Ga Gaiyos na n 'imɛ uganyi, na 'imɛ du tụ'ụlwa-tụ-ụhiɛŋshɛ-AGWANGWAMA uganyi, ma hi 'walụ. Gɛ Ɛrɛstos na ba ngbaraka ukwuribi ụshɛpwụ ga, ma hi 'walụ, keeni Kwatos na shɛ yɛu-bino tu.

²⁴[Go tulubo-ti-biye ta Agwangwama tu Jisus Krast tu nama ne hiŋ hwɛɛ. Ami].[41]

²⁵Ama no ofwo bụtụ ata na eri me hi shikicingo dimi, tedure na Anabarɛ Ebiye Jisus Krast na Ama ananga, gana na ta tɛkapɛshɛnga ti iyi tusweci nɛ ee shiri saiiŋ te kwuni na aka cala namɛ.

²⁶Ama bu vwɛ iŋ ya hwuwayɛ caakwụ tedure nu utakada na egesere 'nyeci, tedure nu unu na Agwatana unyizo-nom peni. Ibɛ shɛ inɛɛ nɛ aa njɛ maa ga atwa na shɛ shɛ Eju mepi maa a hwụjɛ-unu rishe-tɛtɛtana.

²⁷Ga shɛ Agwatana unyizo-nom na incɛ kiri ee peni ụjɛrụma. Ami.