Read bassa ROM 4 Bible Online

ROM 4 - bassa bible

ROM 4

¹Imbe ɛti zhɛ tɛ hiɛŋ maa ga Abraham na shɛ ugwunukwoshi ụlamụ tu to ugbee?

²Yaa shɛ ee peni Abraham n-ndumwa-zhɛ iwɛ ugondu na baa njɛ, asha bi 'yajɛ iyi nɛ maa busa, ama tuba shɛ ne eshe Agwatana o.

³Imbe Iwɛ ya Agwatana hiɛɛŋ? I hiɛŋ, Ga Abraham tɛtanɛ Agwatana rishe, ibɛ po Agwatana rɛcɛ bụ maa bɛ shɛ bụtụ bi tiririri.

⁴Ama a rɛcɛ shɛ alubashɛ na aa tụpa bụtụ na ba nda ugondu maa tulubo-ti-biye aa shɛ o, semi utashɛ ugondu ata baa njɛ aa cɛpɛ bụ.

⁵Ama bụtụ na njɛ shɛ ugondu, naa kaa tɛtanɛ bụtụ na ba pana atwa iwɛwɛ n-ndumwa-zhɛ, ɛ zhɛ a rɛta rishe ru bwa tɛtɛtana maa tiririri raa shɛ.

⁶Ge Devid jɛmɛ iwɛ uwebiye bụtụ na Agwatana rɛcɛ tiririri tu bwa uzawa ugondu tɛnda, bɛɛ hiɛŋ,

⁷Atwa na Agwatana gengeni iyi iwɛ ya aba, a na kaa bee. Urigeni iwɛwɛ ya aba gwoje!

⁸Bụtụ na Agwatana zha shɛ ba rɛta iwɛwɛ ibwɛ kaa gwoje!

⁹Atwa na jeji teleyi kiri suu 'yajɛ ugwoje ga tɛnda, kwo kaa ta atwa na jeji shi teleyi du? Tudumwa, ɛti hiɛŋ maa a rɛcɛ rishe-tɛtɛtana ra Abraham maa tiririri raa shɛ.

¹⁰Na aka naa aa rɛcɛ rụụ? Na aka na ti bee jeji teleyi suu, kwo kaa na aka na ti bee te jeji shi la teleyi? Shɛ na aka na ti bee jeji teleyi o, ama na aka na ti bee te jeji shi la teleyi.

¹¹E jeji bu ya teleyi maa i shɛ useyida, ibɛ i shɛ useyida na aa njɛ bu ne tiririri tu na baa 'yajɛ ne rishe-tɛtɛtana, na aka na ti bee te jeji shi la teleyi, iwɛ maa u sha bishi ba atwa elele na tɛtanɛ-rishe, okwo te e jeji shi aŋ teleyi, iwɛ maa a rɛcɛ du tiririri ta aba.

¹²Shɛ bishi ba atwa na jeji teleyi kiri baa shɛ o, ama ta atwa na a nda du iyi nu uhwaŋna rishe-tɛtɛtana ru na ga Abraham na shɛ bishi ata tu 'yajɛ taa na aka na te e te jeji shi bu la teleyi.

¹³Unu na Agwatana shileni Abraham ta ajalalo ubwa hwɛɛ maa aba shɛ a sha ayɛ-ogwu unyizo, u beni shi nu Undwa o, ama u banɛ ne tiririri tu na ee leshiji tedure ne rishe-tɛtɛtana.

¹⁴Asha yaa shɛ atwa na untanganɛ Undwa a shɛ ayɛ-ogwu, asha rishe-tɛtɛtana rɛ shɛ iyi tɛgadaga, unu na Agwatana shiri kaa du ụ shɛ bohondo.

¹⁵Undwa ubwa 'waŋnɛ isɛbwɛ ya Agwatana, ofwo na Undwa zasaba, undwa tubwada du zha shɛ wa nama o.

¹⁶Ecilo no po rishe-tɛtɛtana rɛ shɛ iyi tilɛɛ i shɛ iwɛnɛ ti iyi elele ya banɛ no tulubo-ti-biye, iwɛ maa e shikicingeni ajalalo ubwa kpaaŋ unu ata tishilo, shɛ iwɛ atwa na untanganɛ Undwa kiri o, ama iwɛ atwa na du shɛ atwa rishe-tɛtɛtana ra Abraham (na shɛ bishi tu kpaaŋ.

¹⁷Gana na te e 'nyeci, ɛɛ hiɛŋ, M bu nduwa bishi ba atwa ofwugwo a na shɛ shɛ Eju), ne eshe bụtụ na baa tɛtanɛ-rishe, ubwa shɛ Agwatana na ba pana atwa na 'wi uraiŋ, ubwa kaa du ba suyana iyi nɛ zasaba gana maa i namba.

¹⁸Okwo tu ga Abraham zasa ecilo na maa nda ashɛlatụ, ama na amɛ ashɛlatụ ata kaa waa baa tɛtanɛ-rishe maa bɛ shɛ bishi ba atwa ofwugwo a na shɛ shɛ Eju, gana na ti yee 'nyeci, yɛɛ hiɛŋ, Ajalalo bu zhɛ o gombo ofwugwo gana mkpasu.

¹⁹Okwo tu ga Abraham mepi maa bɛ injɛ cebe iwɛnɛ tu baa namwawaŋ shiywa dipi-yebi, bee mepi kaa du maa igwune tumata Sara i uwo, ama rishe ru bwa tɛtɛtana kaa ru lweji shi waa o.

²⁰Bɛ njɛ shɛ oruwo unu na Agwatana shileni bu o, rishe-tɛtɛtana kaa ri 'nyananɛ shɛ bu o. Ama bi leshiji ukpahiŋ tedure ne rishe-tɛtɛtana bee peni Agwatana ụjɛrụma,

²¹iwɛnɛ ti bee mepi gom maa Agwatana eri a nda iyi nɛ bee shiri-unu ibɛ.

²²Ibɛ po aa rɛcɛ rishe ru bwa tɛtɛtana maa tiririri raa shɛ.

²³Ama shɛ iwɛ ubwa kiri ee 'nyeci n-ndumwa ma ata aa rɛcɛ bu no ofwo muba o,

²⁴ama iwɛ tu du na tɛtanɛ bụtụ na hicinjɛ Jisus Agwangwama tu no tu'wo rishe.

²⁵E shepi Jisus ee utegeni tu'wo iwɛ tụwụma tu tu, ibɛ bɛɛ hiɛ maa ma tu pana n-ndumwa-zhɛ.