Read bassa ROM 5 Bible Online

ROM 5 - bassa bible

ROM 5

¹Gana na te e ti peni n-ndumwa-zhɛ tedure ne rishe-tɛtɛtana, ibɛ po ati 'yajɛ ya amɛ-olom[9] na Agwatana tedure na Agwangwama tu ge Jisus Krast.

²Nu bwa ati 'yajɛ onungwu maa to tono no tulubo-ti-biye tu ga oto shikono na tuba tedure ne rishe-tɛtɛtana, ata busa[10] nụ ụbaụta tɛnda, na ashɛlatụ ụjɛrụma wa Agwatana na ata nda.

³Shɛ inɛ ɛtɛ kiri o, ama ta busa du nụ ubaụta tɛnda[11] iwɛnɛ te ti mepi maa ụbaụta wa pana bụtụ egiri-tula,

⁴egiri-tula kaa a pana bụtụ ahaŋsa-tuto, ahaŋsa-tuto a pana bụtụ ashɛlatụ tɛnda.

⁵Ashɛlatụ kaa peni shi bụtụ ezuye o. Iwɛnɛ ta Agwatana utu dudugwonuo tulubo tu bwa na shɛmɛ shi tu, ibɛ shɛ tulubo tu na tu dure na Mpiala mi Tijilo mu na bee ti peni.

⁶Iwɛnɛ po aka na eti te lwegeji, na aka na teni kaa cɛŋ ibɛ ga Krast 'wi iwɛ atwa na a nda iyi iwɛ.

⁷I shɛ iyi nɛ gwụmɛ maa bụtụ be elele 'wi iwɛ bụtụ bi tiririri. Ama nekeshi bụtụ bu ko feye namba na zhɛ ba ala maa 'wo iwɛ bụtụ bi biye.

⁸Ama Agwatana tuba iti mbiseni tulubo tu bwa caakwụ, maa aka na ati ta shɛ la atwa iwɛwɛ, ibɛ ga Krast 'wi iwe tu.

⁹Ibɛ po gana na ga Krast iti peni n-ndumwa-zhɛ tedure ne mehieŋ mu bwa, asha bi zhɛ mo ti bicingo maa ta bana ni isɛbwɛ ya Agwatana.

¹⁰Gana na to tu'wo ti Yɛu ya Agwatana tu tu togononu nu bwa na aka na atɛ shɛ la atwa i'ime ibwɛ, asha aka na oo tu togononu nu bwa, uraiŋ Krast zhɛ mo tu bicingo du.

¹¹Shɛ inɛ ɛtɛ kiri o, ama ta busa na amɛ Agwatana tedure na Agwangwama tu Jisus Krast. Ti leshiji kaa tutogononu tu ga tedure nu bwa.

¹²Gana na ti iwɛwɛ dure na bụtụ bu ko yee teni nu unyizo, tu'wo du tu dure ni iwɛwɛ, ibɛ po tu'wo tu mburusonu no ofwo atwa kpaaŋ, iwɛnɛ ta atwa kpaaŋ njɛ iwɛwɛ.

¹³Iwɛwɛ namwawaŋ nu unyizo nazhɛ Undwa zhajɛ, ama yaa shɛ Undwa ga zasaba, a ga zha shɛ a rɛta iwɛwɛ ya atwa o.

¹⁴Ama okwo ta atwa na iwɛwɛ nɛ aa njɛ sụbɛ shɛ undwa tu bwada Adam na shɛ ụsụbwa bụtụ na tee ci, iwɛwɛ kaa yɛ waa tugwama no ofwo atwa te kwune taa na aka Adam uuwa i ci aka Moses.

¹⁵Ama upwaŋ tulubo-ti-biye namɛ swooŋ nu ulayɛ. Yaa shɛ ulayɛ bụtụ bu ko shapɛrɛganɛ atwa ofwugwo tu'wo, asha tulubo-ti-biye ta Agwatana keeni upwaŋ na namɛ no tulubo ta ata ti biye gembi wee hwuleji iwɛ atwa ofwugwo du. Tulubo ta ata ti biye kaa tu banɛ no olugwo bụtụ ata bu ko, ubwa shɛ ge Jisus Krast.

¹⁶Upwaŋ ata kaa shɛ shɛ aa manga ni iwɛwɛ bụtụ ata bu ko. Iwɛnɛ tu ụshɛrɛya na iwɛwɛ bụtụ ata bu ko 'waŋnɛ ụ shɛ n-ndumwa-tụwụma, ama upwaŋ tulubo-ti-biye na alayɛ ata ofwugwo 'waŋnɛ ụ shɛ n-ndumwa-zhɛ.

¹⁷Yaa shɛ ulayɛ bụtụ ata bu ko leneni tu'wo maa tɛ yɛ tugwama tedure na bụtụ ata bu ko, asha atwa na leshiji tulublo-ti-biye keeni upwaŋ tiririri te gembi duwa tubaa? A zha shɛ suu a ya tugwama nu uraiŋ keeni ukpahiŋ bụtụ ata bu ko na shɛ ge Jisus Krast?

¹⁸Ibɛ po gana na tu ulayɛ uko gba 'waŋnanɛ atwa kpaaŋ n-ndumwa-tụwụma, gobwonu du ugondu u tiririri uko 'waŋnanɛ atwa kpaaŋ n-ndumwa-zhɛ keeni uraiŋ.

¹⁹Gana na ta bụtụ bu ko hwụjɛ shɛ unu, atwa ofwugwo shɛ atwa iwɛwɛ, gobwonu du gana na ta bụtụ bu ko tuba hwụjɛ-unu, ibɛ po ɛɛ zhɛ a pana atwa ofwugwo n-ndumwa-zhɛ.

²⁰Ama Undwa teni wee keeni ulayɛ ugombo, ama ofwo na iwɛwɛ keeni ugombo, tulubo-ti-biye tuba ti keeni ugombo uhwuri gana ata tebiye tebiye,

²¹iwɛ maa gana na ti iwɛwɛ yɛ tugwama na amɛ tu'wo, gobwonu du tulubo-ti-biye tɛ shɛ ta ya tugwama tedure ne tiririri tu na tu namɛ na amɛ uraiŋ unyizo-nom na dure Jisus Krast Agwangwama tu.