Read bassa ROM 6 Bible Online

ROM 6 - bassa bible

ROM 6

¹Asha imbe ɛti zhɛ tɛ hiɛŋ yaa? Iwɛwɛ suu ɛti zhɛ tu na uranga tɛnda iwɛ maa tulubo-ti-biye tu na kaana ugombo?

²Awo, kede i shɛ gana ata o! Atuba na tu 'wonuo iwɛwɛ, gana na ɛti tɛ zhɛ ta nama ni ibɛ waaa?

³Hi mepi shi suu maa hwɛ hwɛɛ tu na aa njɛ ubaptizim u tutogotogwu na Krast Jisus, a tɛ njɛ ubaptizim ata maa to togotogwu du no tu'wo tu bwa?

⁴Ibɛ po ee ti ni nu bwa tedure nu ubaptizim na aa tɛ njɛ, a tɛ njɛ uŋ maa tu togotogwu ma no tu'wo tu bwa, iwɛ maa gana na tɛ ɛ hicinjɛ Krast no tu'wo tedure nu ụjɛrụma Bishi, maa tu na zha ma du tahaŋnụ nu uraiŋ ufwo.

⁵Gana na otu togotogwu ne Jisus ni iyi nɛ sụbɛ tu'wo tu bwa, asha gobwonu du ɛti zhɛ tu mo togotogwu nu bwa sasana ni iyi nɛ sụbɛ tihiɛ tu bwa.

⁶Ti mepi maa o togwonuo bụtụ tu bụ ngwụshɛ nrɛ nụ ụ'wụ'wụ-ubatanɛ na Krast, iwɛ maa a njɛ masha ma butugwumwa mi iwɛwɛ ufwu,[12] maa kede ta sha ya ajama iwɛwɛ o.

⁷Iwɛnɛ po bụtụ na uwo asha bu beni ni i'ɛlɛ iwɛwɛ.

⁸Ama yaa shɛ etu 'wi na Krast, ti tɛtanɛ du rishe maa ti zhɛ ta 'yaga uraiŋ nu bwa.

⁹Gana na eti mepi maa a hicingwa Krast no tu'wo, bi zha shɛ kaa bo 'wo ya kwukwuŋ, tu'wo kaa ti zha shɛ ta 'yaga ya ụhwada ubwa kwukwuŋ.

¹⁰Tu'wo tu na bee 'wi, iwɛwɛ bee 'weni tu kpalụ ko gbalụ, ama uraiŋ na baa 'yajɛ, Agwatana baa 'yaganɛ uŋ.

¹¹Iwɛ ecilo ata na mama rɛta ma maa hi 'wonuo iwɛwɛ, ama uraiŋ na ahiɛ 'yajɛ ya, Agwatana ahia 'yagana uŋ na amɛ Krast Jisus.

¹²Ibɛ po kede iwɛwɛ 'yaga ya ụhwada na amɛ tu'waba ti hiŋ tu na ti zhɛ to 'wo maa hi na hwuga-unu ukwedeyi ụwɛ u tuba o.

¹³To sugo ma ya itwɛ tu'waba ti hiŋ ye elele ma hiɛ shɛkanɛ iwɛwɛ maa hi na ndana iwɛwɛ iyi ni ibɛ o, ama na mama shɛkana ma Agwatana, gana na tɛ hi hiɛ no tu'wo. Sugo ma itwɛ tu'waba ti hiŋ hwɛɛ maa hiɛ shɛkanɛ Agwatana maa i shɛ iyi nɛ aa nda iyi tiririri ni ibɛ.

¹⁴Iwɛwɛ zha shɛ ya 'yaga ya ụhwada hiŋ o. Iwɛnɛ ta ahi zasa ya nu Undwa, semi no tulubo-ti-biye.

¹⁵Asha imbe yaa shɛ yaa? Ti zhɛ suu tu na nda iwɛwɛ iwɛnɛ atu zasa nu Undwa atu namɛ no tulubo-ti-biye? Awo, shɛ gana ata o!

¹⁶Hi mepi shi suu maa aka elele na ahiɛ mama shɛkanɛ bụtụ be elele maa hi na hwuga-unu ubwa, asha hiɛ shɛ ajama bụtụ ata ahia hwuga-unu ubwa? Ajama iwɛwɛ nɛ ya 'waŋnɛ tu'wo suu ahiɛ shɛ okwo yibwa ajama unu-tuhwuga na wa 'waŋnɛ tiririri?

¹⁷Ama Agwatana ubwa shɛ ba a'walụ, maa ahiɛba na hiɛ shɛ la ajama iwɛwɛ, hiɛ hwụjɛ ya unu imbisegeni hiŋ nɛ eti hi suji eti utegeni taa na shɛmɛ shi hiŋ.

¹⁸Iwɛbɛ po ee hi bicinji ya iwɛnɛ ahi banɛ ni iwɛwɛ, ahiɛ shɛ ya ajama tiririri.

¹⁹Ma duma iwɛ gana na ta butugwumwa ba duma, hi lwegeji na masha mi hiŋ ma butugwumwa. Gana na ehi suji la itwɛ tu'waba ti hiŋ hwɛɛ ahiɛ shɛkanɛ tiri maa i shɛ ajama ibɛ, maa hi na nda ugondu ụwɛ, gobwonu du sugo ma ya itwɛ tu'waba ti hiŋ hwɛɛ hwuwayɛ maa hiɛ shɛkanɛ tiririri maa hiɛ shɛ ya ajama tuba, maa tuba hi na nda ya ugondu tijilo.

²⁰Aka na ahi ta shɛ la ajama iwɛwɛ, hi zasa la ne tiririri o.

²¹Imbe i shɛ tụ'walụ tu na ahiɛ 'yajɛ la na aka ataa? Ibɛ shɛ iyi nɛ ahia nda ya ezuye ibɛ hwuwayɛ, iwɛnɛ tu ukwunanga inɛ ɛtɛ i shɛ tu'wo.

²²Ama e hi tufwurinji ya hwuwayɛ ni iwɛwɛ, maa hiɛ shɛ ya ajama Agwatana, hi 'yajɛ ya tụ'walụ, iwɛnɛ ahiɛ shɛ ya atwa tijilo Agwatana, ukwunanga inɛ ɛtɛ i shɛ ya uraiŋ unyizo-nom.

²³Itɛpwɛ iwɛwɛ i shɛ tu'wo, ama upwaŋ tulubo-ti-biye ta Agwatana ụ shɛ uraiŋ unyizo-nom na amɛ Krast[13] Jisus Agwangwama tu.