Read bassa ROM 8 Bible Online

ROM 8 - bassa bible

ROM 8

¹Hwuwayɛ go n-ndumwa-tụwụma mu zasaba ya iwɛ atwa na namɛ na amɛ Krast Jisus.

²Iwɛnɛ tu undwa Mpiala mu uraiŋ na namɛ na amɛ Krast Jisus u n rufwuji[14] nu undwa iwɛwɛ keeni una tu'wo.

³Undwa zasa ukpahiŋ, iwɛnɛ ta masha ma butugwumwa mu logwocenji uŋ, ibɛ po Agwatana tuba tumwanɛ Yɛu ibwɛ ikɛnyi ibwɛ na tu'waba tu na tu sụbɛ tu'waba tu tu ti iwɛwɛ, iwɛ iwɛwɛ kaa sasana. Ibɛ po bee peni iwɛwɛ n-ndumwa-tụwụma na amɛ tu'waba ta ata ta butugwumwa,

⁴iwɛ maa ugondu u tiririri Undwa ulwa na amɛ tu na njɛ shɛ iyi na masha ma butugwumwa, ama semi na Mpiala.

⁵Atwa na a nda iyi na masha ma butugwumwa, e shiyeni masha ma butugwumwa eshe, maa a na nda iyi nɛ masha ma butugwumwa ma jala, ama atwa na a nda iyi na Mpiala, e shiyeni iyi Mpiala eshe maa a na nda iyi nɛ Mpiala ma jala.

⁶Iwɛnɛ po ahaŋsa masha ma butugwumwa a shɛ tu'wo, ama ahaŋsa Mpiala a shɛ uraiŋ keeni amɛ-olom.

⁷Iwɛnɛ po ahaŋsa masha ma butugwumwa o imo Agwatana, iwɛnɛ ti yaa shɛ shɛ Undwa wa Agwatana 'yajɛ ụhwada ahaŋsa ata; masha ma ata kaa mi eri shi mo lubo Agwatana kwukwuŋ.

⁸Atwa na kaa a hwuga-unu masha ma butugwumwa, e eri shi a kwulana Agwatana kwukwuŋ.

⁹Ama yaa shɛ Mpiala ma Agwatana mu namɛ na amɛ hiŋ gom, asha shɛ masha ma butugwumwa mu ma hi 'yagaga ya o, asha semi Mpiala mu ma hi 'yagaga ya. Ama bụtụ be elele na zasa Mpiala mu Krast, asha bụtụ ata shɛ shɛ du bụtụ Krast o.

¹⁰Ama yaa shɛ ga Krast namɛ na amɛ hiŋ, asha okwo iwɛwɛ kwụnɛ tu'waba ti hiŋ, tiririri tuba ti zhɛ ta pana mpiala mi hiŋ uraiŋ.[15]

¹¹Yaa shɛ kaa Mpiala ma bụtụ na hicinjɛ Jisus no tu'wo mu namɛ na amɛ hiŋ, asha bụtụ ata na hicinjɛ Krast Jisus no tu'wo zhɛ ba pana tu'waba ti hiŋ tu na ti zhɛ to 'wo uraiŋ du tedure na Mpiala mu bwa mu na mu namɛ na amɛ hiŋ.

¹²A-miaụŋ-mo-bino mi na amɛ Krast, tɛ yɛ utashɛ, ama shɛ masha ma butugwumwa atɛ yɛ utashɛ ata maa tu na nda iyi nɛ masha ma ata ma butugwumwa ma jala o.

¹³Yaa shɛ tunama ti hiŋ ta nda iyi nɛ masha ma butugwumwa ma jala, asha hi zhɛ hio 'wo tilɛɛ. Ama yaa shɛ ahia kwụna ugondu na masha ma butugwumwa ma nda tedure nu Mpiala, asha nazhɛ ɛhi zhɛ hia 'yaga uraiŋ.

¹⁴Atwa elele na Mpiala ma Agwatana ma 'yagaga, aba shɛ miaụŋ ma Agwatana.

¹⁵Iwɛnɛ po shɛ mpiala mu na mi zhɛ ma hi pananana inyɛsɛ ehi leshiji o, semi Mpiala mu na mɛ tɛ njɛ miaụŋ, muba mi ti leneni maa tu na ugaga, maa ti nɛ hiɛŋ, Aba![16] Bishi! Muba ehi leshiji.

¹⁶Mpiala ma Agwatana ni ikɛnyi ibwɛ momo lonu tiseyida na mpiala mu tu maa tɛ shɛ miaụŋ ma Agwatana.

¹⁷Gana na atɛ shɛ miaụŋ ma Agwatana, asha atuba tɛ shɛ ayɛ-ogwu Agwatana na Krast. Yaa shɛ ata nda ụbaụta nu bwa gom, asha atuba du ti zhɛ ta 'yaga hwuŋ ụjɛrụma nu bwa.

¹⁸N heŋshi maa ụbaụta na ata nda hwuwayɛ na aka ga, u te teni shi cɛŋ maa e menji uŋ nụ ụjɛrụma na ɛɛ zhɛ ma tu kapɛshɛngana hwuŋ o.

¹⁹Iyi elele nɛ Agwatana karɛ ya nda ashɛlatụ tugom iwɛ aka na Agwatana zhɛ a kapɛshɛnga hwuŋ miaụŋ mu bwa.

²⁰Iyi elele nɛ kaa Agwatana karɛ, bi shileni iŋ tusukwutogwu, ama shɛ nu ukwulana ibɛ o, ama nu ukwulana bụtụ na shiri iŋ apata maa i na nda ashɛlatụ,

²¹maa iyi elele nɛ Agwatana karɛ ni ikɛnyi ibɛ benengeni tijama to tufwoso, maa i teni tumama 'yaga tu ụjɛrụma miaụŋ ma Agwatana.

²²Ti mepi maa iyi elele nɛ Agwatana karɛ yo ngwulo, yaa hwuga-ụngwụ gana ụngwụ tumata tutu taa hwayɛ.

²³Shɛ gi iyi nɛ Agwatana karɛ kiri yo ngwulo, ta atuba na du ti 'yajɛ Mpiala gana upwaŋ uhiiŋ na Agwatana ti peni, to ngwulo du ni ikɛnyi tu, gana na ati 'yacɛ maa a tɛ njɛ miaụŋ[17] mu bwa, ibɛ shɛ gana na maa e bicinji tu'waba tu tu.

²⁴E ti bicinji tedure na ashɛlatụ, ama shɛ iyi nɛ atu kwubwa ata nda ya ashɛlatụ ibɛ o, gaaba ba nda hwuŋ ashɛlatụ iyi nɛ baa 'yagawaa?

²⁵Ama yaa shɛ ata shɛlana iyi nɛ atu ta kwụbɛ shɛ, asha ti zhɛ ta ima-isɛbwɛ maa ta 'yaka iŋ.

²⁶Gobwonu du Mpiala mo mbiyono tulwogogo tu tu. Ti mepi shi gana na i shɛ tilɛɛ maa ta nda adua o, ama Mpiala ni ikɛnyi ibwɛ ubwa ba 'walatagwụ Agwatana no ti'nyongongo tu na eti eri shi ta duma.

²⁷Ama Agwatana na ba yalaga shɛmɛ sha atwa, ubwa mepi ahaŋsa Mpiala, ubwa kaa du ba 'walatagwụ Agwatana iwɛ atwa tijilo Agwatana, gana na teneni Agwatana cɛŋ.

²⁸Ti mepi maa iyi elele ya nda ugondu zhiaaŋ maa i zhɛmanɛ atwa na o lubo Agwatana,[18] aba shɛ atwa na baa suyanɛ gana na ta ahaŋsa na bee heŋshi namɛ.

²⁹Atwa na Agwatana mwopwo cebe, aba du bee tileni swooŋ cebe, maa a njɛ aŋ ụsụbwa Yɛu ibwɛ, iwɛ maa tuba yɛu ɛtɛ ibwɛ i shɛ tumata ti hiiŋ na ashashɛ miaụŋ-mo-bino mu ofwugwo.

³⁰Ama atwa na boo tulwonuo swooŋ cebe, aba du baa suyanɛ, atwa na baa suyanɛ, aba du bee peni n-ndumwa-zhɛ, atwa na kaa bee peni n-ndumwa-zhɛ, aba du bee peni ụjɛrụma.

³¹Asha imbe ɛti zhɛ ta duma ya iwɛ ijɛ kpaaaŋ? Yaa shɛ Agwatana namɛ no tu, asha gaaba eri ma tu sukakanaa?

³²Agwatana na hebi shi Yɛu ibwɛ ikɛnyi ibwɛ, ama bi shepi bu bee peni iwe tu kpaaŋ, bi zha shɛ suu ma tu pana ya iyi elele arahaŋ nu bwa?

³³Gaaba zhɛ ba suyana atwa na Agwatana teri ụshɛrɛyaa? Agwatana ubwa kaa zhɛ ba pana aŋ n-ndumwa-zhɛ.

³⁴Gaaba zhɛ ba pana aŋ n-ndumwa-tụwụmaa? Ga Krast ubwa shɛ bụtụ na 'wi, shɛ inɛ ɛtɛ kiri o, ubwa du shɛ bụtụ na hiɛ, ubwa du kaa namɛ nu u'ala ubiye wa Agwatana baa 'walatagwụ bụ iwe tu.

³⁵Asha gaaba zhɛ mo tu bogwu no tulubo tu Krastii? Ụbaụta suu, kwo ụngwụ-tụhwụga, kwo tɛshɛka, kwo imunɛ-tiya, kwo mohondo, kwo Abara-ne-ebe, kwo kaa utokwobi?

³⁶Gana na te e 'nyeci, ɛɛ hiɛŋ. Iwɛ bu aa ma tu kwụna taa ti iyi ge heri hwayɛ, aa tɛ rɛcɛ kaa gana agwụdụ na ɛɛ zhɛ a shɛla.

³⁷Awo! Tu lasụ ijɛ kpaaŋ tedure nu ukpahiŋ ụ bụtụ na utu lubi.

³⁸Iwɛnɛ po ohwulu mi namɛ oko maa, okwo tu'wo, okwo uraiŋ, okwo atumwa-azuba, okwo egwominetu,[19] okwo iyi nɛ namɛ hwuwayɛ, okwo iyi nɛ tee ci, okwo akpahiŋ,

³⁹okwo ụnjɛswa, okwo me'ilwo, okwo inyɛ iyi nɛ aa karɛ, eri shi mo tu bogwu no tulubo ta Agwatana tu na tu namɛ na amɛ Krast Jisus Agwangwama tu o.