Read bassa ROM 9 Bible Online

ROM 9 - bassa bible

ROM 9

¹Iwɛ-tɛkana Ama duma na amɛ Krast, shɛ ụzagwụ Ama dwa o, maa bimbisegeni-ba-amɛ mi ma n la tiseyida na amɛ Mpiala mi Tijilo,

²maa N 'yajɛ amɛ-tụhaŋtụ tebiye keeni ụngwụ na zasa uce na amɛ mi.

³I gɛ zhɛ ma n kwulana yebe maa ma nda adua maa ga shɛ Gamba unu-tukalana wa Agwatana 'imɛ maa mo bogwu na Krast iwɛ miaụŋ-mo-bino mi anaa na shɛ udenji mu na tu'waba.

⁴Aba shɛ atwa Isrɛl, a na Agwatana njɛ gana miaụŋ mu bwa mu tụpana, a na ụjɛrụma ụ shɛ una aba, tu onu-tutwa,[20] tu Undwa tụpana, ta Agwatana tɛzhɛba, keeni unu-tishilo.

⁵Atwa angwụshɛ a shɛ a na aba; ga Krast shɛ bụtụ bu udenji wa aba nu uhwaŋna tu'waba. Ubwa kaa shɛ Buumwa na Hwuri kpaaŋ,[21] go zhemonjino Agwatana unyizo-nom. Ami!

⁶I shɛ shɛ gana maa n-ndumwa mu na Agwatana dumwa la mu kwu o. Iwɛnɛ po shɛ atwa kpaaŋ a na shɛ ajalalo Jekob a shɛ atwa Agwatana kpororo.

⁷Shɛ hwɛ hwɛɛ aba kaa du a shɛ miaụŋ ma Agwatana iwɛnɛ aa shɛ ajalalo Abraham o. Iwɛnɛ ta Agwatana mbishi Abraham, bɛɛ hiɛŋ, Tedure na Azik ɛɛ zhɛ a rɛta ajalalo bu.

⁸Inɛ ɛtɛ shɛ shɛ maa miaụŋ mu na ee meci tedure na masha ma butugwumwa mɛ shɛ miaụŋ ma Agwatana o, semi miaụŋ mu na ee meci tedure nu unu-tishilo, muba aa rɛcɛ maa aba shɛ ajalalo Abraham gom.

⁹Inɛ gɛ banɛ nu unu-tishilo ata na hiɛŋ, Na aka gana ga ibɛ Ngɛɛ zhɛ me gwure, ga Sara kaa zhɛ ba mata yɛu-ye-eyi.

¹⁰Shɛ inɛ ɛtɛ kiri o, ama gana na ti ge Rebeka du le ofubo na bụtụ bu ko, ubwa shɛ ga Azik na shɛ ugwunukwoshi tu.

¹¹Aka na ti bee te meci shi miaụŋ, na aka na aa ta njɛ shɛ iyi ibiye kwo kaa iyi iwɛ ye elele, iwɛ maa iyi nɛ Agwatana heŋshi to tuhwulo, gana na ta tutala tu bwa tu namɛ. Tutala ta ata kaa ti beni shi nu ugondu, ama tu banɛ no olugwo bụtụ na ba suyana ụhiɛŋshɛ,

¹²na hiɛŋ bụ, Yɛu nɛ bee meci hiiŋ ibɛ zhɛ ya ndana inɛ imɛwɛɛ iyi.

¹³I zhɛ ya sha gana na te e 'nyeci, ɛɛ hiɛŋ, Ge Jekob Ngee lubi, Ngee imi tuba Isụ.

¹⁴Asha imbe ɛti zhɛ tɛ hiɛŋ yaa? Agwatana suu 'yajɛ orugwusu? Awo, Shɛ gana ata kwukwuŋ!

¹⁵Iwɛbɛ po bɛɛ hiɛŋ Moses, bụtụ na Ngɛɛ zhɛ ma hioko inyɛmɛnyɛmɛ ibwɛ, ubwa Ngɛɛ zhɛ mo hioko inyɛmɛnyɛmɛ ibwɛ; bụtụ na kaa Ngɛɛ zhɛ ma nda uwanyi ubwa, ubwa Ngɛɛ zhɛ ma nda uwanyi ubwa.

¹⁶I shɛ shɛ inɛ ya atwa na a jala kwo kaa inɛ ya atwa na a nda ugondu o, ama i shɛ inɛ Agwatana na bo hioko inyɛmɛnyɛmɛ ya atwa.

¹⁷Utakada n-ndumwa ma Agwatana mbishi Agwuma Faro, wɛɛ hiɛŋ, Iwɛ ecilo ga Ngɛɛ bi ishicinjɛ, iwɛ maa Ma ala maa Mo bu mbisono ukpahiŋ mu, iwɛ maa izeci mi mburusonu nu unyizo hwɛ hwɛɛ.

¹⁸Iwɛnɛ po Agwatana o hioko inyɛmɛnyɛmɛ bụtụ na baa jala maa hioko inyɛmɛnyɛmɛ ibwɛ, bụtụ na kaa baa jala maa pana ahaŋsa tɛshɛshɛpana, bi zhɛ ba pana bu ahaŋsa tɛshɛshɛpana.

¹⁹Ibɛ po bụtụ bu ko na amɛ hiŋ zhɛ mɛ n hiɛŋ, Asha iwembe po Agwatana ta kwụba waa utugbolo tu kwuuŋ? Gaaba kwuŋ eri ba sukakana ukwulana wa Agwatanaa?

²⁰Awo! Ama gabụ butugwumwa, gaaba abɛ shɛ i shɛ maa jishijɛ Agwatanaa? Iyi nɛ oo mo eri yɛɛ hiɛŋ suu bụtụ na mo iŋ, Iwembe po obu m mo gana gaa?

²¹Bumo-bu-nkwasha suu zasa ụhwada cɛnje-ti'wɛŋnɛ, maa muna bufwamɛ ata bu ko bu ko maa ma iyi nɛ kwụlanɛ bụ, maa ge ike i shɛ iyi ụjɛrụma, maa kede ike i shɛ iyi ụjɛrụma o?

²²Gana ata du Agwatana njɛ gom. I kwụlanɛ bụ maa mbisono isɛbwɛ ibwɛ, maa nda maa atwa mepi ukpahiŋ ubwa, ibɛ po baa 'imɛ-isibwɛ tebiye no ofwo iyi uhwugwa nɛ shɛ iyi isɛbwɛ, inɛɛ nɛ aa imanjɛ iwɛ maa a njɛ iŋ ufwu.

²³Ibɛ shɛ iwɛ maa nda maa e mepi ugombo ụjɛrụma ubwa na namɛ ni iyi uhwugwa nɛ boo hioko inyɛmɛnyɛmɛ ibɛ, inɛɛ nɛ baa imwangwa cebe iwɛ maa i 'yaga ụjɛrụma.

²⁴Ibɛ shɛ atuba na baa suyanɛ du, shɛ na ashashɛ Eju kiri o ama na ashashɛ atwa na shɛ shɛ Eju du.

²⁵Gana na tu baa jɛmɛ du nu utakada Hosia, bɛɛ hiɛŋ, Atwa na ga shɛ shɛ atwa mi, N zhɛ mɛ hiɛŋ aŋ atwa mi; biyikwo na kaa Ngee nge lubi shi, N zhɛ Mo lubo bu ya.

²⁶Gana ata du yɛɛ zhɛ ya nama no ofwo atwa na ɛɛ hiɛŋ, Hiɛ shɛ shɛ atwa mi o, apata kaa gbaa ɛɛ zhɛ ɛ hiɛŋ aŋ maa, Miaụŋ ma Agwatana na shɛ Buumwa.

²⁷Ga Ayizaya uganɛ iwɛ atwa Isrɛl, bɛɛ hiɛŋ, Okwo miaụŋ mi Isrɛl mi gembi ofwugwo gana ahwayɛ itekwu, tumwata ta aba kiri ɛɛ zhɛ o bicingo.

²⁸Agwangwama zhɛ a ụrɛcɛnga ụshɛrɛya ubwa tụdụma nu unyizo kakayɛ, ubwa kaa zhɛ ba kwunanga uŋ umɛwɛɛ.

²⁹I namɛ gana na ti ga Ayizaya ga dumwa yebe, bɛɛ hiɛŋ, Yaa shɛ Agwangwama na Hwuri Kpaaŋ iti gengeni shi ajalalo, asha ti gɛ zhɛ ta sha gana Sụdụm, ɛ gɛ zhɛ ma tu nda maa ta sụba Gụmụra.[22]

³⁰Asha imbe ɛti zhɛ tɛ hiɛŋ yaa? Atwa na shɛ shɛ Eju, a na ge mekeni shi iwɛ tutono cɛŋ, ama a njɛ ya maa e teneni Agwatana cɛŋ. Tutono ta aba cɛŋ kaa tu banɛ ne rishe-tɛtɛtana.

³¹Ama miaụŋ mi Isrɛl mu na mu ga 'wa undwa tiririri, ama e gwushiji shi tu kaa o.

³²Iwembe poo? Iwɛnɛ ti yee beni shi ne rishe-tɛtɛtana, ama i shɛ maa i banɛ nu ugondu undwa tɛnda. A twa udukwutwa nu utayɛ ata udukwutwa,

³³Okwo gana na te e 'nyeci, ɛɛ hiɛŋ, Hioko ma, Mo shilo utayɛ udukwutwa na amɛ Zayon, keeni utayɛ ụ'wụtụ na wa gwumana atwa, bụtụ na kaa tɛtanɛ bu rishe, ezuye zha shɛ a sha bu o.