Read bassa KORINT HIIŊ 13 Bible Online

KORINT HIIŊ 13 - bassa bible

KORINT HIIŊ 13

¹Okwo Ama duma n-ndumwa na rɛjɛmɛ ra atwa[44] keeni rɛjɛmɛ ra atumwa-azuba, yaa shɛ Ngaa zasa tulubo, asha N shɛ gana ụshɛmbɛrɛ na rụhwụŋ ru bwa rɛ shɛ, kiŋ, kiŋ, kiŋ, kwo kaa gana ogogo na ruhwụŋ ra aba rɛ shɛ, ngo, ngo, ngo.

²Okwo Ngaa 'yajɛ upwaŋ u tigesere tụdụma, Ngee eshiciji kaa iyi tusweci keeni iyi-tumapa ye elele kpaaŋ, Ngaa 'yajɛ te rishe-tɛtɛtana ru na ri eri ro mushongo nshama, yaa shɛ Ngaa zasa tulubo, asha N ta shɛ shɛ waa iyi elele o.

³Okwo Ngee suji i'wɛŋnɛ mi kpaaŋ Ngee peni atwamwa, Ngee peni du atwa tu'waba ti mi maa e hwoŋzhinji tu,[45] yaa shɛ Ngaa zasa tulubo, asha i n zasana ule o.

⁴Tulubo ta ima-isɛbwɛ, tee mepi iwɛ; tulubo tu zasa isɛbwɛngwɛ o; tulubo tu bụshɛ shɛ kwukwuŋ, ti meme seci shi na azuba o.

⁵Tulubo tu zasa tugbodu kwukwuŋ, ti jelekeci shi ule iwɛ ikɛnyi tuba o; isɛbwɛ munji shi tu o; tɛ rɛcɛ shɛ iyi iwɛ nɛ aa njɛ tu o;

⁶tɛ njɛ shɛ unyasa ni iyi nɛ zasa ririri o, ama ta nda unyasa ni iwɛ-tɛkana.

⁷Tulubo to shikono na tumanga te elele dimi, ta tɛtana iyi elele rishe, ta nda ashɛlatụ iyi elele, ta la-egiri ni iyi elele.

⁸Tulubo tu zasa uce kwukwuŋ; ama okwo yaa shɛ tigesere tu na aa duma, ti zhɛ to hwuwowu; okwo yaa shɛ rɛjɛmɛ ri nya ru tuswoswoswo ru namba, ri zhɛ ra ima ilɛmɛ; okwo yaa shɛ iyi-tumapa namba, i zhɛ yo hwuwowu.

⁹Iwɛnɛ po iyi-tumapa tu ulwa sụ, tigesere tu tu kaa tu ulwa sụ o.

¹⁰Ama aka na ti iyi nɛ ulwa zhajɛ hwuŋ, nazhɛ iyi nɛ ulwa sụ zhɛ yo hwuwowu.

¹¹Aka na Ngaa ta shɛ la yɛu ticwɛŋ, Ma duma iwɛ gana yɛu ticwɛŋ, Ngaa 'yajɛ ahaŋsa gana yɛu ticwɛŋ, Ama haŋsa iwɛ gana yɛu ticwɛŋ. Aka na tu Ngaa shɛ ya bụtụ bụ 'wụtụ, Ngaa 'wɛŋ ya iyi cɛnɛnɛ.

¹²Iwɛnɛ po tu ta kwụba hwuwayɛ iyi gana uzhizhi gana irɛtɛ, ama eshe tu zhɛ a twa na aka ata. Iyi mi tumapa ta ulwa sụ hwuwayɛ o, ama na aka ata nazhɛ Ngɛɛ zhɛ ma mapa iyi elele gana na ta Agwatana m mepi hwuwayɛ.

¹³Ama hwuwayɛ rishe-tɛtɛtana ru namba, ashɛlatụ namba, tulubo tu namba du, ijɛ namɛ itɛtu; ama inɛɛ nɛ hwuri inɛ vwɛ hwɛɛ i shɛ tulubo.