Read bassa KORINT HIIŊ 14 Bible Online

KORINT HIIŊ 14 - bassa bible

KORINT HIIŊ 14

¹'Wa ma tulubo. Ga apwaŋ mpiala na hi dwa eshe, ama inɛɛ nɛ eshe ibɛ i shɛ na hi dwa tebiye, i shɛ i'enenji utumwa wa Agwatana.[46]

²Iwɛnɛ po bụtụ na ba duma rɛjɛmɛ ru mpiala, shɛ na atwa baa duma iwɛ o, semi na Agwatana, iwɛnɛ ti yaa zasa bụtụ be elele na eshiciji n-ndumwa mu bwa; ama ba duma iyi tusweci tedure nu mpiala.

³Ama bụtụ na ba ananga utumwa wa Agwatana, ba duma n-ndumwa na atwa, iwɛ maa ma aŋ, maa kaana aŋ ikɛnyi, maa ingatanga aŋ.

⁴Bụtụ na ba duma rɛjɛmɛ ru mpiala, ubwa mama ma; ama bụtụ na ba ananga utumwa wa Agwatana, ubwa ba ma Tụ'ụlwa-tụ-ụhiɛŋshɛ-Agwangwama.

⁵I ga ma n kwụlanɛ maa hi na duma rɛjɛmɛ ru mpiala kpaaŋ hiŋ, ama i n kwụlanɛ maa hi na ananga utumwa wa Agwatana uhwuri maa hi na duma rɛjɛmɛ ru mpiala. Bụtụ na ba ananga utumwa wa Agwatana, bu hwuri bụtụ na ba duma rɛjɛmɛ ru mpiala. Yaa shɛ ee te lesheji shi n-ndumwa mu bwa, asha bi eri shi bo mbiyono tụ'ụlwa-tụ-ụhiɛŋshɛ-Agwangwama maa ma tụ o.

⁶Ama a-miaụŋ-mo-bino mi na amɛ Krast, yaa shɛ Ngaa zhajɛ pi hiŋ, Ama duma rɛjɛmɛ ru mpiala, asha imbe shɛ ule na Ngɛɛ zhɛ ma hi pana, ti yaa shɛ Ngaa jɛmɛ shɛ iwɛ ne hiŋ na tɛkapɛshɛngana, kwo kaa ni i'enenji utumwa wa Agwatana, kwo kaa nu n-ndumwa mi iyi-tumapa, kwo kaa nu n-ndumwa mi iyi timbisogonoo?

⁷Okwo iyi nɛ hwungwa sụ, gana ukpasana, kwo kaa aduma, yaa shɛ yaa zasa rụhwụŋ ru tuswoswoswo, gana naa ɛhi zhɛ hia mapa iyi nɛ rụhwụŋ ru ukpasana kwo kaa rụhwụŋ ra aduma ata ya dumaa?

⁸Yaa shɛ shɛ aka na ee hwuri ukakacɛ nu uhwaŋna na maa atwa eshiciji iwɛ ujasa, gaaba zhɛ mama ima iwɛ ujasaa?

⁹Gabata du ahiɛ shɛ, gana naa ɛɛ zhɛ a mapa iyi nɛ ahia duma ti yaa shɛ ahia duma n-ndumwa na rɛjɛmɛ ru mpiala kirii? Semi ta ahia duma iwɛ na rɛjɛmɛ ru na atwa eri o eshicigo kakayɛ.

¹⁰Rɛjɛmɛ ru ofwugwo swoswoswo ru namba nu unyizo, i zasa ma ru na ru zasa ecilo na ashashɛ rɛjɛmɛ ra ata o.

¹¹Ibɛ po yaa shɛ Ngee mepi shi ecilo iyi nɛ rɛjɛmɛ ra ata ra duma, asha n-ndumwa ma bụtụ ata mi zhɛ ma n shana gana ridenji ru na Ngaa hwụjɛ shɛ, nazhɛ n-ndumwa mi mi mi zhɛ ma shana bụtụ ata du gana ridenji ru na baa hwụjɛ shɛ.

¹²Gobwonu du, gana na ahiɛ 'yajɛ tɛzhɛgɛdana maa hi 'yaga apwaŋ mpiala, na nda ma du gana na maa hi na kaana tụ'ụlwa-tụ-ụhiɛŋshɛ-Agwangwama ugombo

¹³Iwɛ ecilo ata, bụtụ na ba duma iwɛ na rɛjɛmɛ ru mpiala, ga bu na nda adua maa bu na nda tilesheji ti iwɛ ɛtɛ.

¹⁴Yaa shɛ Ama nda adua na rɛjɛmɛ ru mpiala, asha mpiala mi mi muba ma nda adua, ama asha shɛ na ahaŋsa mi yaa banɛ o.

¹⁵Asha imbe yaa shɛ yaa? N zhɛ ma nda adua na mpiala, Ngɛɛ zhɛ ma nda adua na ahaŋsa du; N zhɛ ma zunga azunga na mpiala, Ngɛɛ zhɛ ma zunga azunga na ahaŋsa du.

¹⁶Shibwonu yaa shɛ obu zhemonjino Agwatana na mpiala, gana na bụtụ be eshe ohondo[47] na namɛ na ashashɛ hiŋ na eshiciji shi kaa iyi nɛ abɛ njɛ adua ibɛ zhɛ be leni, Ami, ti bee mepi shi kaa iyi nɛ abɛ jɛmɛ ne tizhemonjino tụ bụụ?

¹⁷Iwɛ-tɛkana maa bu zhemonjino ga Agwatana tebiye, ama tuba i me shi binya bụtụ o.

¹⁸Ama N njɛ ugwoje wa Agwatana iwɛnɛ Ama duma rɛjɛmɛ ru mpiala ihi hwuri kpaaŋ hiŋ.

¹⁹Ama i n kwụlanɛ maa mu na duma okwo n-ndumwa mu ta gbalụ mu na mu banɛ na ahaŋsa mi na tụ'ụlwa-tụ-ụhiɛŋshɛ-Agwangwama, maa Mo mbisogono anya atwa iyi, uhwuri maa ma duma n-ndumwa mi gembi ufwugwo na rɛjɛmɛ ru mpiala.

²⁰A-miaụŋ-mo-bino mi na amɛ Krast, ta sha ma miaụŋ na shihaŋsa shɛ na ahia haŋsa o, ama sha ma miaụŋ mi tiweewee ni iyi iwɛ tɛnda, ama sha ma tuba ogborofwu na shihaŋsa shɛ na ahia haŋsa.

²¹Ee 'nyeci nu Undwa, ɛɛ hiɛŋ, N zhɛ ma shapa atwa na a duma rɛjɛmɛ ru mpiala keeni n-ndumwa ma agaiŋ, maa Ma duma n-ndumwa nu udenji ga, ama okwo ti yaa shɛ gana ata, a zha shɛ a shɛlaga n-ndumwa mi mi waa o, Agwangwama jɛmɛ.

²²Iwɛnɛ po rɛjɛmɛ ru mpiala rɛ shɛ iwɛ useyida, shɛ iwɛ atwa na tɛtanawaŋ-rishe o, semi iwɛ atwa na ta tɛtanɛ shɛ rishe. Ama i'enenji utumwa wa Agwatana i shɛ iwɛ atwa na tɛtanawaŋ-rishe, shɛ iwɛ atwa na ta tɛtanɛ shɛ rishe o.

²³Yaa shɛ tụ'ụlwa-tụ-ụhiɛŋshɛ-Agwangwama tụ ụlwatagwụ urubwo uko hwɛ hwɛɛ, aa duma rɛjɛmɛ ru mpiala kpaaŋ aba, yaa shɛ atwa eshe ohondo a na eshiciji shi keeni atwa na ta tɛtanɛ shɛ rishe teni apata, a zha shɛ ɛ hiɛŋ suu ụmpɛ ahia sụma?

²⁴Ama yaa shɛ ahia ananga utumwa wa Agwatana, yaa shɛ bụtụ be eshe ohondo kwo kaa bụtụ na ta tɛtanɛ shɛ rishe teni apata, hi zhɛ hiɛ vwɛ bu uvwi kpaaŋ hiŋ, ɛhi zhɛ hia duma kaa ụshɛrɛya ubwa kpaaŋ hiŋ.

²⁵Iyi tusweci nɛ ga namɛ na ahaŋsa ubwa zhɛ ya bananɛ bụ caakwụ, ibɛ po du bɛɛ zhɛ ba laya nu umbe hiŋ, maa zhɛba Agwatana. Nazhɛ bɛɛ zhɛ bɛ hiɛŋ, Agwatana namba ga na ashashɛ hiŋ gom.

²⁶A-miaụŋ-mo-bino mi na amɛ Krast, asha imbe yaa shɛ yaa? Aka elele ahi ụlwatagwụ, bụtụ bu ko ba zunga azunga Agwangwama, binya bụtụ ba nda imbisegeni, binya bụtụ 'yajɛ tɛkapɛshɛngana, binya bụtụ ba duma rɛjɛmɛ ru mpiala, binya bụtụ ba lashaga rɛjɛmɛ ra ata. Ama na nda ma iyi elele iwɛ maa hi na ma Tụ'ụlwa-tụ-ụhiɛŋshɛ-Agwangwama.

²⁷Yaa shɛ bụtụ be elele ba duma rɛjɛmɛ ru mpiala, asha ga shɛ atwa eyebi kiri a duma rụ, kwo kaa nekeshi atwa atatụ, ama kede e hwuri ya gana ata o, ga na duma kaa na tumama 'wanụ. Bụtụ bu ko kaa shɛ ba lashaga iwɛ ɛtɛ aa jɛmɛ.

²⁸Ama yaa shɛ bilesheji zasaba, asha ga nama saiiŋ na tụ'ụlwa-tụ-ụhiɛŋshɛ-Agwangwama, asha ga na mama dumangana na Agwatana.

²⁹Ga shɛ atwa eyebi kwo kaa atwa atatụ a duma utumwa wa Agwatana, ga atwa vwɛ tuba na manga iwɛ ɛtɛ aa jɛmɛ.

³⁰Ama yaa shɛ n-ndumwa mu ko mu kapɛshɛngwanu binya bụtụ na jɛjɛ apata, asha ga bụtụ ata ga duma iwɛ hiiŋ nama tugwo saiiŋ.

³¹Iwɛnɛ po kpaaŋ hiŋ eri a ananga utumwa wa Agwatana, ama na duma ma atwa oko oko, iwɛ maa hi seshi kpaaŋ hiŋ, keeni maa e hi keeni ikɛnyi kpaaŋ hiŋ.

³²Atwa na a ananga utumwa wa Agwatana a untangana mpiala ma aba maa ga binya bụtụ jɛmɛ n-ndumwa mu bwa.

³³Iwɛnɛ po Agwatana shɛ shɛ Agwatana tusukwutogwu o, semi bu na ba amɛ-olom. Gana na yaa namɛ du na tụ'ụlwatagwụ ta atwa tijilo Agwatana.

³⁴Ge eyikwo na nama shiruu na tụ'ụlwa-tụ-ụhiɛŋshɛ-Agwangwama. E leneni shi aŋ ma a na dumanga n-ndumwa o, ama ge meme tileneni ụhwada, gana na tu Undwa jɛmɛ.

³⁵Ama yaa shɛ aa jala maa e seshi iyi elele, asha ge heŋteni olwo aba ni ihwɛ, iwɛnɛ ti yaa shɛ iyi ye ezuye maa biyikwo na dumanga n-ndumwa na tụ-ụlwa-tụ-ụhiɛŋshɛ-Agwangwama.

³⁶Okwo no olugwo hiŋ suu Iwɛ ya Agwatana banɛ? Kwo kaa pi hiŋ suu kiri yaa zhajɛ?

³⁷Yaa shɛ bụtụ be elele ba haŋsa ni ikɛnyi ibwɛ maa bɛ shɛ bi'enenji bu utumwa wa Agwatana, kwo kaa bụtụ bu mpiala, asha ga mapa maa iyi nɛ Ama hi 'nyatanɛ i shɛ unu-tupana na banɛ no olugwo Agwangwama.

³⁸Ama yaa shɛ bụtụ be elele 'wa sụ iŋ, ta 'wa ma du iwɛ ubwa o.

³⁹A-miaụŋ-mo-bino mi na amɛ Krast, na 'yaga ma tɛzhɛgɛdana ni i'enenji utumwa wa Agwatana, ta kapa ma kaa du uhwaŋna rɛjɛmɛ ru mpiala tụdụma o.

⁴⁰Ama na nda ma iyi elele te teni cɛŋ keeni na tumama 'wanụ.