Read bassa KORINT HIIŊ 15 Bible Online

KORINT HIIŊ 15 - bassa bible

KORINT HIIŊ 15

¹Ama a-miaụŋ-mo-bino mi na amɛ Krast, Ma nda maa hi mepi maa, Anabarɛ Ebiye na Ngee hi enengeni, a na ehi leshiji du, a na ehi shikeni na aba du.

²Yaa shɛ ahi untanganɛ iwɛ ɛtɛ Ngee hi enengeni dimi, ukpahiŋ iwɛ ɛtɛ zhɛ mo hi bicingo, ti yaa shɛ rishe ri hiŋ tɛtɛtana rɛ shɛ shɛ bohondo.

³Iwɛnɛ po hiiŋ, N hi peni iyi nɛ Ngee leshiji du maa ga Krast 'wi iwɛ iwɛwɛ tu, gana na tu Utakada Iwɛ ya Agwatana jɛmɛ;[48]

⁴maa e ni bu, maa ɛ hicinjɛ bụ nụ ụjita ụtatụ, gana na tu Utakada Iwɛ ya Agwatana jɛmɛ;

⁵maa bu bananɛ Kifas,[49] nazhɛ baa bananɛ eseshi-iyi umpwa-na-ba-eyebi.

⁶Na aba ibɛ nazhɛ baa bananɛ miaụŋ-mo-bino mu na mu hwuri akpakwụ-eyebi-ni-dipi-yebi (500) na aka oko, pa'ụtụ atwa oko na ashashɛ aba ta namba taa hwayɛ, ama atwa oko loyo malabụ na ashashɛ aba.

⁷Nazhɛ baa bananɛ Jemis; nazhɛ baa bananɛ atumwa vwɛ kpaaŋ.

⁸Nu ukwunanga wa aba hwɛɛ nazhɛ baa m bananɛ du, Gamba na n shɛ gana yɛu tubasaga.[50]

⁹N shɛ bụtụ na 'nyanɛ na ashashɛ atumwa, N lanɛ shɛ maa a n suyanɛ butumwa o, iwɛnɛ tu Ngaa shɛkwa la tụ'ụlwa-tụ-ụhiɛŋshɛ-Agwatana.

¹⁰Ama tedure no tulubo-ti-biye ta Agwatana, ibɛ po Ngaa namɛ gana ga. Tulubo tu bwa ti biye tu na bee m peteni, tɛ shɛ shɛ iyi tɛgadaga o. Ama N njɛ ugondu duwa Ngee hwuri aŋ kpaaŋ, ama shɛ Gamba njɛ iŋ o, semi tulubo-ti-biye ta Agwatana tu na tu namɛ ne mi.

¹¹Iwɛbɛ po okwo yaa shɛ Gamba, kwo kaa aba, kwo kaa atwa ata, gabata ata ananga, ibɛ kaa po du ahiɛ tɛtanɛ-rishe.

¹²Ama yaa shɛ aa ananga maa ɛ hicinjɛ Krast no tu'wo, asha imbe po atwa oko na ashashɛ hiŋ eri ɛ hiɛŋ maa tihiɛ ta atwa na 'wi tu zasabaa?

¹³Yaa shɛ tihiɛ ta atwa na 'wi tu zasaba, asha a hiɛcɛnjɛ shɛ la du Krast o.

¹⁴Yaa shɛ kaa aa hiɛcɛnjɛ shɛ Krast, asha i'enenji tu i shɛ iyi tɛgadaga, asha rishe ri hiŋ tɛtɛtana rɛ shɛ du iyi tɛgadaga.

¹⁵Iwɛ-tɛkana ɛ zhɛ ma tu ta ugbe maa ti le Agwatana tiseyida tu tukata, iwɛnɛ te eti le Agwatana tiseyida maa bi hicinjɛ Krast, na kaa baa hiɛcɛnjɛ shɛ, ti yaa shɛ aa hiɛcɛnjɛ shɛ atwa na 'wi.

¹⁶Yaa shɛ aa hiɛcɛnjɛ shɛ ga atwa na 'wi, asha a hiɛcɛnjɛ shɛ du Krast o.

¹⁷Yaa shɛ kaa aa hiɛcɛnjɛ shɛ Krast, asha rishe ri hiŋ tɛtɛtana rɛ shɛ iyi tɛgadaga, asha hi ta namɛ ni iwɛwɛ hiŋ.

¹⁸Nazhɛ asha atwa na loyo malabụ na amɛ Krast njɛ ufwu.

¹⁹Yaa shɛ ashɛlatụ Krast na ata nda a shɛ nu uraiŋ ga atu namɛ kiri, asha tɛ shɛ atwa tinyɛmɛnyɛmɛ uhwuri atwa kpaaŋ.

²⁰Ama Mo hi mbiso maa, a hiɛcɛngwa Krast no tu'wo, ibɛ du po baa shɛ buhwuri-bu-umbe ba atwa na leyi malabụ.

²¹Iwɛnɛ po gana na ta bụtụ shapɛ tu'wo nu unyizo, gobwonu du bụtụ shapɛ tihiɛ ta atwa na 'wi.

²²Iwɛnɛ po gana na ta atwa kpaaŋ 'wi na amɛ Adam, gobwonu du atwa kpaaŋ zhɛ a 'yaga uraiŋ na amɛ Krast.

²³Ama ga Krast ubwa shɛ buhwuri-bu-umbe na aka na to ogwungwu bụtụ bụtụ i ci, na aba inɛ ɛtɛ nazhɛ tizhajɛ tu bwa tu na tɛ shɛ iwɛ atwa Krast ti zhɛ to to.

²⁴Aka na ti bee shepi Cɛnjɛ-ta-tugwama bee peni Agwatana na shɛ Bishi, ibɛ shɛ aka na ti bee iricinji tugwama tiya, keeni ụhwada we elele, keeni ukpahiŋ we elele, nazhɛ ukwunanga zhɛ wa zhajɛ ya.

²⁵I shɛ tilɛɛ maa ga Krast zhɛ ba ya tugwama uuwa i ci aka na ti bee tileni atwa i'ime ibwɛ nu ukaka ubwa.

²⁶Tu'wo, tuba tɛ shɛ bụtụ ata bi i'ime bu umɛwɛɛ na ɛɛ zhɛ a nda ufwu.

²⁷I 'nyeci, yɛɛ hiɛŋ, Agwatana tileni[51] iyi elele nu ukaka ubwa. Ama aka na bɛɛ hiɛŋ, bi tileni iyi elele tuta tu ụhwada Krast, asha i banɛ ya caakwụ maa Agwatana ata na tileni iyi elele nu ukaka Krast, bu zasa na ashashɛ iyi elele ɛtɛ o.

²⁸Ama aka na te e tileneni ụhwada Krast iyi elele, nazhɛ ubwa na shɛ Yɛu ni ikɛnyi ibwɛ zhɛ momo shilo nu ukaka wa Agwatana na go tulwonuo iyi elele nu ukaka ubwa, iwɛ maa Agwatana shɛ iyi elele no ofwo bụtụ be elele.

²⁹Shibwonu asha imbe tuba atwa na aa nduwa ubaptizim iwɛ atwa na uwo zhɛ a ndaa? Yaa shɛ aa hiɛcɛnjɛ shɛ atwa na 'wi kwukwuŋ, asha iwembe po aa njɛ aŋ ubaptizim iwɛ abaa?

³⁰Asha iwembe po ata njala araiŋ tu no tu'wo aka elele duu?

³¹A-miaụŋ-mo-bino mi na amɛ Krast, iyi-heri iyi-heri tu'wo ti mɛ n sɛpɛjɛ uhiu. Ma duma iwɛ na tubusa iwe hiŋ na Ngaa 'yajɛ na amɛ Krast Agwangwama tu.

³²Yaa shɛ Ngaa twawa ifelu ni isundɛ ehilo nɛ Ɛfɛsɛs, gana na ta atwa hiɛŋ, asha imbe i shɛ ule na Ngaa yɛɛ? Yaa shɛ aa hiɛcɛnjɛ shɛ Krast no tu'wo, asha hwure tɛ yɛ ma, tu swe ma, iwɛnɛ ɛti zhɛ tu mo 'wo beyi.

³³Kede e hi helekeci o, tiyejilo tụ wɛ to tocingo masha mi biye ụdamụ.

³⁴Gwure ma no ofwo ahaŋsa tuhwungbɛ, ta nda ma iwɛwɛ o. Iwɛnɛ po atwa oko zasa iyi-tumapa iwɛ Agwatana o. Ma duma inɛ gɛ iwɛ maa ezuye ihiɛ shɛ.

³⁵Ama bụtụ bu ko zhɛ bo hoŋtono, bɛɛ hiɛŋ, Gana naa ɛɛ zhɛ ɛ hicinjɛ atwa na uwoo? Tu'waba tu gana naa ɛɛ zhɛ a 'yagaa?

³⁶Gabụ alagwụ! Iyi nɛ abɛ bɛrɛ zha shɛ yɛ unshɛ maa i 'yaga uraiŋ o, semi aka na ti yee 'wi.

³⁷Izɛgwu nɛ aba bila zasa tu'waba ti iyi nɛ yɛɛ zhɛ ya sha hwuŋ ti yɛɛ unshɛ o, ama bụzagwụ bo ohondo kwakwa, nekeshi ohiu, kwo kaa izɛgwu inyɛ.

³⁸Ama Agwatana peni iŋ tu'waba tu na tu kwụlanɛ bụ, gabata kaa bee peni bụzagwụ bụzagwụ tu'waba ti ikɛnyi ibɛ.

³⁹Tu'waba kpaaŋ tɛ shɛ shɛ tu ko, ama tu ko tɛ shɛ ma tu atwa, tinya tɛ shɛ ma tu isundɛ ehilo, tu'waba tu ko tɛ shɛ tu'waba ta shanụnụ, tu'waba tinya tɛ shɛ tu'waba ti ijɛnɛ.

⁴⁰Tu'waba ta azuba tu namba, tu'waba tu unyizo ga tu namba du. Ama ụjɛrụma ma tu ta azuba namɛ swooŋ nu ụjɛrụma ma tu tu unyizo ga.

⁴¹Uko ụ shɛ ụjɛrụma uwaŋna, ụjɛrụma unya ụ shɛ una upiana, ụjɛrụma unya ụ shɛ una mkpasu; ama ụjɛrụma mkpasu kaa namanjɛ swoswoswo na minya.

⁴²Gobwonu du tihiɛ ta atwa na 'wi tɛ shɛ. A bila tụ no tufwoso, ɛɛ hicinjɛ tụ nu ufwoshishi.

⁴³A bila tụ nụ ụpụrụsa, ɛɛ hicinjɛ tụ nu ụjɛrụma. A bila tụ no tulwogo, ɛɛ hicinjɛ tụ nu ukpahiŋ.

⁴⁴A bila tụ na tu'waba ta butugwumwa, ɛɛ hicinjɛ tụ na tu'waba tu mpiala. Yaa shɛ tu'waba ta butugwumwa tu namba, asha tu'waba tu mpiala tu namba du.

⁴⁵Gobwonu du ee 'nyeci ni Iwɛ ya Agwatana, ɛɛ hiɛŋ, Ga Adam uhiiŋ bɛ shɛ ohwulu butugwumwa, ama ga Adam umɛwɛɛ bɛ shɛ Mpiala na ma nda maa iyi shɛ buumwa.

⁴⁶Inɛ ihiiŋ i shɛ shɛ inɛ Mpiala o, ama inɛ yo ohwulu uumwa; nazhɛ inɛ mpiala zhajɛ ya.

⁴⁷Bụtụ bi hiiŋ bɛ shɛ bụtụ bu unyizo, upwupwutu baa shɛ; ama bụtụ bi yebi banɛ na azuba.

⁴⁸Ama gana na ta bụtụ ata aa njɛ nu upwupwutu i shɛ, gana go du atwa na aa njɛ nu upwupwutu a shɛ, gana na kaa bụtụ ba azuba shɛ, gobwonu du atwa azuba shɛ.

⁴⁹Gana na ati 'yagawa ụsụbwa bụtụ ata aa njɛ nu upwupwutu, gobwonu du ɛti zhɛ ta 'yaga[52] ụsụbwa bụtụ ba azuba.

⁵⁰Ama a-miaụŋ-mo-bino mi na amɛ Krast, Ma duma iwɛ gɛ maa, tumata tu tu'waba keeni mehieŋ ti eri shi ta ya ogwu Cɛnjɛ-ta-tugwama ta Agwatana o; iyi nɛ yo fwoso kaa eri shi ya ya ogwu iyi nɛ fwoshi shi o.

⁵¹Hioko ma iyi tusweci Omo hi mbiso. Shɛ kpaaŋ tu ti zhɛ ta laya malabụ o, ama ɛ zhɛ tuba mo ti sheyingo hwɛ hwɛɛ tu, i zhɛ ya sha hwuŋri, nɛ tipɛ te rishe, na aka na te e hwulupeni hwuŋ ukakacɛ [nụ ụjita ata] umɛwɛɛ.

⁵²Iwɛnɛ po ukakacɛ ata zhɛ wa dumana iwɛ, nazhɛ ɛɛ zhɛ ɛ hicinjɛ atwa na uwo nu uzawa tufwoso, nazhɛ ɛɛ zhɛ mo ti sheyingo.

⁵³I shɛ tilɛɛ maa inɛ gɛ yo fwoso urugono inɛɛ nɛ fwoshi shi, i shɛ kaa du i tilɛɛ maa inɛ gɛ yo 'wo urugono inɛɛ nɛ eri shi yo 'wo.

⁵⁴Ama aka na ti inɛ gɛ yo fwoso urigeni inɛɛ nɛ fwoshi shi, ti inɛ gɛ yo 'wo kaa urigeni inɛɛ nɛ 'wi shi, nazhɛ iyi nɛ ee 'nyeci ni Iwɛ ya Agwatana zhɛ yɛ sɛ, inɛ hiɛŋ, Tụlasụ tu tweri tu'wo.

⁵⁵O-tu'woo, cee tụlasụ tụ bụ tu namɛɛ? O-tu'woo, cee bicere bu namɛɛ?

⁵⁶Bicere bu tu'wo ubwa shɛ iwɛwɛ, ukpahiŋ iwɛwɛ kaa ubwa shɛ Undwa.

⁵⁷Ama tɛ njɛ ma ugwoje wa Agwatana na ma tu pana tụlasụ tu na tu dure Agwangwama tu Jisus Krast.

⁵⁸Iwɛ ecilo ata, a-miaụŋ-mo-bino mi tulubo, shikono ma dimi, ta nda ma bụlama o, na kaana ma ugombo nu ugondu wa Agwangwama tɛnda ɛgbɛɛ gana na te ehi mepi maa ụbaụta na ahia nda na amɛ Agwangwama shɛ shɛ iyi tɛgadaga o.