Read bassa KORINT HIIŊ 2 Bible Online

KORINT HIIŊ 2 - bassa bible

KORINT HIIŊ 2

¹A-miaụŋ-mo-bino mi na amɛ Krast, aka na Ngaa zhajɛ la pi hiŋ maa ma ananga iwɛ iyi tusweci ya Agwatana.[9] N 'waŋnɛ shɛ la n-ndumwa mụ 'wụtụ 'wụtụ kwo kaa ti'inta o.

²Iwɛnɛ tu Ngaa nduwa ahaŋsa mi oko maa kede ma mapa inyɛ iyi elele na ashashɛ hiŋ o, semi ge Jisus Krast na ee tegeni nrɛ nụ ụ'wụ'wụ-ubatanɛ kiri.

³N namɛ ne hiŋ no tulwogogo, ni inyɛsɛ keeni tɛzhɛgɛda tụ 'wụtụ.

⁴N-ndumwa mu na Ngaa jɛmɛ la ne hiŋ keeni i'enenji nɛ Ngee enenji na ashashɛ hiŋ, i beni shi na ti'inta ta butugwumwa o, semi ukpahiŋ Mpiala ubwa mbiseni iŋ,

⁵iwɛ maa kede rishe ri hiŋ tɛtɛtana ri shikono na ti'inta ta atwa o, semi ga shɛ nu ukpahiŋ wa Agwatana.

⁶Ama ta duma n-ndumwa mi ti'inta na atwa na shɛwa ogborofwu, ama shɛ ti'inta tu unyizo ga o, kwo kaa ti'inta te ehiu unyizo ga a na zhɛ a kashɛka o.

⁷Ama ta duma iwɛ iyi tusweci i ti'inta ta Agwatana, tuba tɛ shɛ ti'inta tu na ee sweci la, tu na Agwatana shiri iwɛ ụjɛrụma tu, nazhɛ aa njɛ unyizo ga.

⁸Inɛɛ nɛ ehiu unyizo ga mepi shi, yaa shɛ ee ge mepi a ga zha shɛ a tagana la Agwangwama ụjɛrụma nrɛ nụ ụ'wụ'wụ-ubatanɛ o.

⁹Ama i shɛ gana na te e 'nyeci ni Iwɛ ya Agwatana, ɛɛ hiɛŋ, Iyi nɛ bụtụ be elele ta kwụbɛ shɛ, ni iyi nɛ bụtụ be elele ta hwụjɛ shɛ, nɛ kaa te teni shi okwo na ahaŋsa bụtụ be elele, ibɛ kaa gbaa Agwatana imanganɛ atwa na o lubo bu.

¹⁰Ama Agwatana tuba iti kepishingeni iŋ tedure nu Mpiala mu bwa. Iwɛnɛ ti yaa shɛ maa Mpiala ma ata muba ma yalaga iyi elele hwɛɛ, te me'ilwo ma Agwatana.

¹¹Gaaba namɛ na ashashɛ atwa mepi tuhaŋsa ta bụtụụ, ti yaa shɛ shɛ ahaŋsa bụtụ ataa? Gobwonu du, i zasa bụtụ mepi tuhaŋsa ta Agwatana o, semi Mpiala ma Agwatana.

¹²Iwɛnɛ po shɛ mpiala mu unyizo ga eti leshiji o, semi Mpiala ma Agwatana, iwɛ maa ta mapa iyi elele nɛ Agwatana iti peni arahaŋ tedure no tulubo tu bwa ti biye.

¹³Ama shɛ ti'inta ta atwa unyizo ga ti ti mbisegeni n-ndumwa mu ga ata duma o, semi Mpiala ma Agwatana mi ti mbisegeni mu, ibɛ po oto eshicigono du atwa mpiala iyi mpiala.[10]

¹⁴Ama bụtụ na ta zasa Mpiala ma Agwatana, bi leshiji shi iyi Mpiala ma Agwatana o, iwɛnɛ ti yaa shɛ iyi ụlagwụ ne eshe ubwa. Bi eri shi kaa bo eshicigo ecilo ibɛ o, iwɛnɛ te e menji iŋ nu uhwaŋna Mpiala.

¹⁵Ama bụtụ bu Mpiala mi Tijilo, ubwa eri ba duma ụshɛrɛya iyi elele, ama i zasa tuba bụtụ na eri ba manga bụ ni ikɛnyi ibwɛ o.

¹⁶Gana na ti Iwɛ ya Agwatana jɛmɛ, yɛɛ hiɛŋ, Gaaba kwuŋ mepi ahaŋsa Agwangwama, maa mbisogono bu iwɛɛ? Ama ti 'yajɛ tuba ahaŋsa Krast.