Read bassa KORINT HIIŊ 3 Bible Online

KORINT HIIŊ 3 - bassa bible

KORINT HIIŊ 3

¹A-miaụŋ-mo-bino mi na amɛ Krast, N eri shi ma duma n-ndumwa ne hiŋ gana atwa mpiala o, semi gana atwa na 'yajɛ ahaŋsa atwa unyizo ga, keeni gana miaụŋ mi shenje na amɛ Krast.

²N hiɛ bɛjɛ no mosubo, shɛ ni iyimɛyɛ nɛ 'yajɛ ikɛnyi o, iwɛnɛ ta ahi ta twa sụ la maa hiɛ yɛ iyimɛyɛ nɛ 'yajɛ ikɛnyi. Okwo ta hwayɛ hi te eri shi hia ya iŋ o.

³Iwɛnɛ po hi ta shɛ gana atwa unyizo ga. Aka na te eshe-iyi keeni ashamanjɛ uwuru namɛ na ashashɛ hiŋ, shɛ gana atwa unyizo ga suu ahiɛ shɛ? Ibɛ shɛ atwa na a haŋsa iwɛ gana na atwa unyizo ga a haŋsa.

⁴Aka na ta bụtụ bu ko hiɛŋ, N shɛ bụtụ Poul, binya bụtụ hiɛŋ, N shɛ bụtụ Apụlụs, shɛ gana atwa unyizo ga suu ahiɛ shɛ?

⁵Imbe ga Apụlụs shɛɛ? Imbe tuba go Poul shɛɛ? Miaụŋ-mu-ugondu ma Agwatana a na ihi zɛrijɛ maa hiɛ tɛtana-rishe kwakwa atɛ shɛ. Ama bụtụ bụtụ tu njɛ ugondu na Agwangwama peni bu.

⁶Gamba m bɛrɛ izɛgwu, nazhɛ ga Apụlụs zwegeni iŋ meni, ama Agwatana tuba ubwa wɛŋnicinjɛ iŋ.

⁷Iwɛ inɛ gɛ, ta bɛbɛrɛ, te buzwegeni-be-meni, a shɛ shɛ iyi elele o, semi Agwatana ata wɛŋnicinjɛ iŋ kiri.

⁸Ta bɛbɛrɛ, te buzwegeni-be-meni, iyi ike aa shɛ, ama bụtụ bụtụ zhɛ ba lashɛga hwuŋ ule ubwa gana na tu ugondu na baa njɛ namɛ.

⁹Atuba to mbiyono Agwatana ugondu, ahiɛba tuba hiɛ shɛ itimɛ ya Agwatana nɛ bee vweri, keeni tuma ta Agwatana.

¹⁰Gana na ta Agwatana m peni tulubo tu bwa ti biye, ibɛ po Ngaa shɛ ya gana bumo-bu-tuma bụ 'wụtụ na 'yajɛ ahaŋsa-tuto. N shiri ukoshilo; nazhɛ binya bụtụ tuba ba satana tuma nu ukoshilo ata. Ama bụtụ bụtụ ga bu na nda pece gana na tu baa satana tụ.

¹¹I zasa bụtụ na te eri bo shilonono ukoshilo unya namɛ swooŋ nu unaa na oo shilwo cebe, na shɛ ge Jisus Krast o.

¹²Ama yaa shɛ bụtụ be elele ba ma na azhɛnarɛya, na azụrụfa, na atayɛ ogwumishi, nu ụ'wụ'wụ, na ambɛ keeni andụrụ nu ukoshilo ata.

¹³Ɛ zhɛ o mbisono hwuŋ ugondu bụtụ bụtụ caakwụ; iwɛnɛ tɛ ɛ zhɛ ɛ vwɛ uŋ hwuŋ caakwụ nụ Ụjita ata. Iwɛnɛ po ɛ zhɛ a kapɛshɛnga uŋ hwuŋ nu ulwa, ulwa ata ubwa kaa zhɛ wa manga ugondu na bụtụ bụtụ njɛ.

¹⁴Yaa shɛ ulwa ata eri shi wo hwoŋzhingo tuma tu na bụtụ bụtụ mo nu ukoshilo ata, asha bi zhɛ ba lashɛga ule.

¹⁵Ama yaa shɛ kaa tuma ta bụtụ bụtụ tu hwoŋni, asha ufwu njɛ bụ, ama ubwa ni ikɛnyi ibwɛ zhɛ bo bino gana bụtụ na ee jinji nu ulwa.

¹⁶Hi mepi shi suu maa ahiɛba hiɛ shɛ umwono wa Agwatana, na Mpiala ma Agwatana ma nama?

¹⁷Bụtụ be elele na ba nda umwono ata wa Agwatana ufwu, Agwatana zhɛ a nda bu du ufwu. Iwɛnɛ tu umwono wa Agwatana jirimi; ahiɛba kaa hiɛ shɛ uŋ.

¹⁸Kede bụtụ be elele na mama halakaka o, yaa shɛ bụtụ be elele na ashashɛ hiŋ ba haŋsa maa bɛ incɛ ti'inta tu unyizo ga, asha ga sha alagwụ iwɛ maa tuba ba inta ti'inta tu tugom.

¹⁹Mapa ma maa ti'inta tu unyizo ga tɛ shɛ iyi ụlagwụ ne eshe Agwatana. Iwɛbɛ po yee 'nyeci ni Iwɛ ya Agwatana, yɛɛ hiɛŋ, Agwatana a ima atwa ti'inta na ti'inta tu na aa nda.

²⁰Yee 'nyeci sasana, yɛɛ hiɛŋ, Agwangwama mepi maa tuhaŋsa tu na atwa ti'inta a haŋsa, tɛ shɛ iyi tɛgadaga.

²¹Iwɛ ecilo ata, kede bụtụ be elele na busa ya iwɛ bụtụ o, iwɛnɛ ti iyi elele i shɛ inee hiŋ.

²²Okwo Gamba go Poul, okwo ga Apụlụs, okwo ga Kifas, okwo unyizo, okwo uraiŋ, okwo tu'wo, okwo iyi nɛ namɛ hwuwayɛ, kwo kaa iyi nɛ te ci, hwɛ hwɛɛ ibɛ i shɛ inee hiŋ.

²³Ahiɛba hiɛ shɛ inɛ Krast, ga Krast tuba i shɛ inɛ ya Agwatana.