Read bassa KORINT HIIŊ 5 Bible Online

KORINT HIIŊ 5 - bassa bible

KORINT HIIŊ 5

¹A duma caakwụ maa tuwɛle tu namba na ashashɛ hiŋ, tuwɛle tu gana na tu zasaba okwo na ashashɛ atwa na tɛtanɛ shɛ rishe. Ibɛ shɛ maa bụtụ bu ko bo woto ne biyikwo bishi[11] bwa!

²Ibɛ ahiɛ mama sata, ahia busa! I ga lanɛ maa hi to-ụkwụla, maa hi becinji bụtụ na njɛ ijɛ ɛtɛ na ashashɛ hiŋ.

³Iwɛ-tɛkana, okwo Ngaa zasaba apata ne hiŋ na tu'waba, ama ahaŋsa mi tuba namba apata. N dumwa ụshɛrɛya bụtụ na njɛ ijɛ ɛtɛ gana maa N namba apata.

⁴Aka na ahi ụlwatagwụ kpaaŋ ni izeci ya Agwangwama tu Jisus, ahaŋsa mi du namba ne hiŋ tedure nu ukpakhiŋ wa Agwangwama tu Jisus,

⁵maa ti shepi ma bụtụ na njɛ ijɛ ɛtɛ ti peni bu ma Setan, maa ba nda tu'waba tu bwa ufwu,[12] maa tuba e bicinji hwuŋ ohwulu ubwa nu Ụjita wa Agwangwama Jisus.[13]

⁶Tubusa ti hiŋ tɛ zhɛshɛ o, hi mepi shi suu maa Ifucingɛ ticwɛŋ zhɛ ya nda maa tu'unto ti ibrɛd hwɛ hwɛɛ ti shɛŋ?

⁷Iwɛ ecilo ata vwa ma Ifucingɛ ingwụshɛ hwɛɛ, maa hiɛ shɛ ibrɛd ifwo nɛ zasa Ifucingɛ. A kwụnua iyi ụrụpɛ isene tɛkashɛka tu, ubwa shɛ ga Krast.

⁸Iwɛbɛ po hwure tu untangana ma isene gɛ, ama shɛ ni Ifucingɛ ingwụshɛ o, kwo kaa ni inɛ ya amiaụŋ keeni inɛ iyi iwɛ o, semi ga shɛ ni ibrɛd nɛ zasa Ifucingɛ, inɛɛ nɛ i shɛ ibrɛd tụrụmbɛɛ keeni inɛ tɛkana.

⁹N hi 'nyatanɛ nu utakada ata mu[14] maa kede hi hiŋtotongwu na anjɛ-tuwɛle o.

¹⁰Ama shɛ anjɛ-tuwɛle, kwo kaa atwa isɛbwɛngwɛ, kwo kaa atwa tuhwulo, kwo kaa anjɛ-ntatanuwaŋ a na unyizo ga Ama njɛ o. Yaa ga shɛ iwɛ aba, asha hiɛ shɛ hia bana nu unyizo ga hwɛ hwɛɛ.

¹¹Ama N hi 'nyatanɛ maa to hiŋtotongwu ma na bụtụ be elele na oo po izeci maa yɛu-bino na amɛ Krast, ti yaa shɛ baa nda tuwɛle, kwo kaa isɛbwɛngwɛ, kwo kaa tuwa tɛnda, kwo kaa tutwa, kwo kaa isweeswee iyi nɛ ya ngba bụtụ o, kwo kaa tuhwulo. Hiɛ shɛ shɛ hia ya du okwo iyimɛyɛ na bụtụ gana ata o.

¹²Imbe i shɛ inee mi nu ụshɛrɛya wa atwa tupohondo tụdụmaa? Shɛ ahiɛba suu hia duma ụshɛrɛya wa atwa na namɛ na amɛ tu'ulwa?

¹³Agwatana ubwa ba duma tuba ụshɛrɛya wa atwa na namɛ no tupohondo, bacɛnga ma bụtụ ata bụ wɛ na ashashɛ hiŋ.