Read bassa KORINT HIIŊ 9 Bible Online

KORINT HIIŊ 9 - bassa bible

KORINT HIIŊ 9

¹M mama zasa suu? Shɛ butumwa suu Ngaa shɛ? N ta kwụbɛ shɛ la suu Jisus Krast Agwangwama tu? Shɛ ahiɛba suu hiɛ shɛ ugondu mu na Ngaa ndanɛ Agwangwama?

²Yaa shɛ Ngaa shanɛ shɛ anya atwa butumwa, ama tuba N hi shanɛ. Iwɛnɛ po ahiɛba hiɛ shɛ useyida ugondu mu u butumwa na Ngaa ndanɛ AGWANGWAMA.

³Ajɛshɛgwa mi na Ngɛɛ zhɛ ma pana atwa na ma manga[25] ta.

⁴Tu ga zasa suu ụhwada maa tu na ya, tu na swa?

⁵Tu ga zasa suu ụhwada maa ta 'waŋna eyikwo tu a na shɛ angwụfwụ tu,[26] gana atumwa anya, keeni gana miaụŋ-mo-bino na amɛ Agwangwama kwo kaa gana Kifas?

⁶Kwo kaa Gamba na Banabas kiri suu tu zasa ụhwada maa ta ganga ugondu tɛnda?

⁷Busaza na bwaa ba jasa hwuŋ ujasa nu ukwuribi ukanyi ubwaa? Okwo kaa gaaba bwaa jwe itimɛ ya afwafwa na yɛ shɛ tụ'walụ ta abaa? Okwo gaaba bwaa ba biga unyama iyimabiga na swe shi mosubo mi ibɛɛ?

⁸Ma duma suu iwɛ gɛ gana na ta atwa a duma? Okwo Undwa jɛmɛ shɛ iŋ suu?

⁹I 'nyeci nu Undwa Moses, yɛɛ hiɛŋ, To umpo unu buna na bo rukoto iyimɛyɛ izɛgwu o. Iwɛ inɛ suu i to Agwatana?

¹⁰Okwo shɛ iwɛ tu suu kiri Agwatana jɛmɛ iwɛ ɛtɛ? Iwɛ tu ee 'nyeci iŋ gom. Iwɛnɛ po ta bụtụ na ba hwaŋ itimɛ, ta bụtụ na bo dubo iyimɛyɛ izɛgwu, a ngbaracɛ uhwaŋna maa ɛ zhɛ a 'yaga urobwo iyimɛyɛ itimɛ ɛtɛ.

¹¹Gana na ati hi bilajɛ iyi mpiala, asha i zhɛ ya sha suu iyi i'wɛtwɛ tɛ ɛti zhɛ ta 'yaga ya iyi hiŋ nɛ ihi 'yaganɛ ule maa iti mbiyeni?

¹²Yaa shɛ anya atwa a 'yajɛ ụhwada iyi gɛnɛ gɛ no olugwo hiŋ, shɛ atuba suu ti 'yajɛ ụhwada hiŋ tu hwuri aŋ? Ama tɛ njɛ shɛ uhwara nu ụhwada ata o, semi isɛbwɛ ata ima ni iyi elele, iwɛ maa kede ta kapana Anabarɛ Ebiye Krast uhwaŋna o.

¹³Hi mepi shi suu maa atwa na a nda ugondu nu umwono wa Agwatana, a ya iyimɛyɛ nu umwono wa Agwatana? Atwa na kaa a nda ugondu nu utukwu-ụrụpɛ, a lashɛga du urobwo wa aba ni iyi ụrụpɛ ata?

¹⁴Gobwonu du Agwangwama peni-unu maa ga atwa na a ananga Anabarɛ Ebiye na lashɛga iyimɛyɛ ya aba tedure na Anabarɛ Ebiye ata.

¹⁵Ama N ta njɛ shɛ ijɛ kwukwuŋ. N 'nyeci shi iŋ du kaa maa i shɛ ya nda no ofwo mi o. Iwɛnɛ po tu'wo ti n debegeni uhwuri maa bụtụ bu ko njɛ tubusa ti mi iyi tɛgadaga!

¹⁶Yaa shɛ Ama ananga Anabarɛ Ebiye, N zasa tubusa o, iwɛnɛ ti yaa n shanɛ iyi tilɛɛ. Iiŋ, N zhɛ ma nda hwuŋ adangboo ti yaa shɛ Ngee enenji shi Anabarɛ Ebiye!

¹⁷Yaa shɛ Ama nda ijɛ na tukwulangana ti mi, asha N 'Yajɛ ule, ama yaa shɛ Ngaa njɛ shɛ iŋ na tukwulangana ti mi, asha e n utegeni kaa ugondu ga maa ma nda uŋ.

¹⁸Asha imbe shɛ ya ule muu? Ibɛ shɛ maa ga ma ananga Anabarɛ Ebiye zawa ulumo tụtụpa, iwɛ maa kede Mo to gana na ụhwada mu namɛ na amɛ Anabarɛ Ebiye o.

¹⁹M mama 'yajɛ no olugwo atwa kpaaŋ, Ngaa mama nduwa du bujama ba atwa kpaaŋ, iwɛ maa ma kaana atwa ti'yaga.

²⁰No ofwo Eju, N shɛ gana Biju, iwɛ maa ma lasụ Eju. No ofwo atwa na a hwuga-unu Undwa, N shɛ gana bụtụ na ba hwuga-unu Undwa, okwo tu Ngaa hwụjɛ shɛ unu Undwa ni ikɛnyi mi, iwɛ maa ma lasụ atwa na a hwuga-unu Undwa.

²¹No ofwo atwa na zasa Undwa, N shɛ gana bụtụ na zasa Undwa, iwɛ maa ma lasụ atwa na zasa Undwa, shɛ iwɛ maa N zasa Undwa wa Agwatana o, ama N namɛ nu Undwa Krast.

²²No ofwo atwa na lwegeji, Ngaa shɛ du gana bụtụ na lwegeji, iwɛ maa ma lasụ atwa na lwegeji.

²³N shɛwa iyi elele no ofwo atwa elele, iwɛ maa okwo gana elele ti yaa shɛ nekeshi atwa oko o bino tedure ne mi.

²⁴Hi mepi shi suu maa atwa na o gozhigo usumwa tụlagwụ, kpaaŋ aba o gozhigo, ama bụtụ bu ko kiri ɛɛ zhɛ a pana ule usumwa ata? Gana go du gozhigo ma maa e hi peni ule hiŋ.

²⁵Atwa elele na o gozhigo usumwa na ee shiri, o momo sho ta 'yajɛ ikɛnyi. A nda inɛ ya aba iwɛ maa e leshiji udara na zha shɛ wo ilogogo, ama ta nda inee tu iwɛ maa ta lashɛga udara na zhɛ wa nama unyizo-nom.

²⁶Ibɛ po okwo to Omo gozhigo bata, shɛ maa M mepi shi ofwo na Ngɛɛ zhɛ o. Okwo Ama kala okwu, shɛ maa M mepi shi bụtụ na Ama tagana okwu ata o.

²⁷Ama tu'waba ti mi Omo kwuto, Ama nda tu gana bujama mi, iwɛ aka na Ngee enengeni anya atwa Anabarɛ Ebiye, Ngaa zha shɛ tuba mo tono ya cɛŋ ni ikɛnyi mi.