Read bassa KORINT YEBI 4 Bible Online

KORINT YEBI 4 - bassa bible

KORINT YEBI 4

¹Iwɛ ecilo ga, gana na ati 'yajɛ ugondu ga tɛnda, ta Agwatana kaa hieci inyɛmɛnyɛmɛ tu,[6] ibɛ po u'waba utu kwuswa sụ.

²Ama ti keri iyi tusweci ye ezuye, ti zhe shi tahaŋnụ ni i'inswɛ o, ti helekeci shi kaa atwa nu n-ndumwa ma Agwatana o. Ama to mbisono iwɛ-tɛkana ata caakwụ, gana na otu momo utogono bimbisegeni-ba-amɛ ba bụtụ bụtụ maa ti teni cɛŋ ne eshe Agwatana.

³Ama yaa shɛ owowo urigeni Anabarɛ Ebiye tu, asha atwa na a nda ufwu kiri yaa shanɛ gana ata.

⁴Aba shɛ atwa na azhɛba unyizo ga lubicinji shihaŋsa sha aba iwɛ maa kede uhioko-uhwaŋna wa Anabarɛ Ebiye ụjɛrụma Krast, na shɛ ụsụbwa wa Agwatana to aŋ o, iwɛnɛ aa tɛtanɛ shɛ rishe.

⁵Ti meme enenji shi o, semi ge Jisus Krast, maa ubwa shɛ Agwangwama, atɛ shɛ tuba miaụŋ mi hiŋ mu ugondu[7] iwɛ Jisus.

⁶Agwatana na hiɛŋ, Go uhioko-uhwaŋna na ta ne tishi, ubwa nduwa maa go uhioko-uhwaŋna ubwa na ta na shɛmɛ shi tu, iwɛ maa go uhioko-uhwaŋna iyi-tumapa ụjɛrụma wa Agwatana na ta nụ ụpɛshɛka Jisus Krast.

⁷Ama ti 'yajɛ uduciya ga ni iyi-uhwugwa nɛ oo mo na cɛnjɛ-ti'wɛŋnɛ, iwɛ maa i mbiseni maa ukpahiŋ ga ụ'wụtụ banɛ no olugwo Agwatana, ama shɛ no olugwo tu o.

⁸A tu hwụngwụlangana geri geri, ama ụbaụta kaa ụ tụ pɛpɛtanɛ shɛ o, shihaŋsa shi tu shɛ ma tu zuga, ama ti genji shi kaa ashɛlatụ tɛnda o.

⁹Ama okwo ta a ti shɛka, e ti jineji shi kaa o; okwo to o tu po na cɛnjɛ, ama tɛ njɛ shɛ kaa ufwu o.

¹⁰Gabata iyi nɛ yo jitongono tu'waba tu tu iwɛ tu'wo ti Jisus ma ti zhaganɛ aka elele, iwɛ maa tu no mbisono uraiŋ Jisus caakwụ tedure na tu'waba tu tu.

¹¹Iwɛnɛ po atuba na tu ta namɛ, o tu sugo aa shɛkana tu'wo ɛgbɛɛ iwɛ Jisus, iwɛ maa a kwụbɛ uraiŋ Jisus caakwụ tedure na tu'waba tu ga ti zhɛ to 'wo.

¹²Ecilo ibɛ shɛ maa tu'wo ta nda ugondu na shɛmɛ shi tu, uraiŋ tuba wa nda ugondu na shɛmɛ shi hiŋ.

¹³Ama gana na ta ati 'yajɛ mpiala me ebe me rishe-tɛtɛtana mu ko mu ko, i shɛ gana na te e 'nyeci ni Iwɛ ya Agwatana, ɛɛ hiɛŋ, N tɛtanɛ-rishe, ibɛ po Ngaa jɛmɛ iwɛ; ti tɛtanɛ du rishe, ibɛ po ata duma du iwɛ.

¹⁴Ti mepi maa Agwatana ata hicinjɛ Agwangwama tu Jisus no tu'wo, bi zhɛ mɛ ti hicinjɛ du tedure ne Jisus, bɛɛ zhɛ kaa mo tu sugo na agba ubwa atubana te hi.

¹⁵Ijɛ kpaaŋ i shɛ iwe hiŋ, iwɛ maa gana na to tulubo-ti-biye ta kaana ugombo no ofwo atwa ofwugwo, ti zhɛ ta nda du maa ga ugwoje tɛnda na kaana ugombo iwɛ ụjɛrụma wa Agwatana.

¹⁶Iwɛbɛ po u'waba utu kwuswa sụ; ama okwo tupohondo tu tu ta gbazhɛgwa, ama a nda tuba amɛ na amɛ tu maa a na sha ofwo iyi-heri iyi-heri.

¹⁷Iwɛnɛ po ụbaụta ga u tihɛkɛlɛ ata kwụba na aka ga ticwɛŋ, e eri shi a manga uŋ nu ụjɛrụma ụ'wụtụ, na kaa shɛ una unyizo-nom na waa ma tɛ shapɛrɛganɛ o.

¹⁸Ti shiyeni shi ahaŋsa tu ni iyi nɛ atwa eri a kwụba o, semi ni iyi nɛ atwa eri shi a kwụba. Iyi nɛ atwa eri a kwụba, 'yajɛ uce, ama iyi nɛ atwa eri shi a kwụba, namɛ unyizo-nom.