Read bassa KORINT YEBI 6 Bible Online

KORINT YEBI 6 - bassa bible

KORINT YEBI 6

¹Gana na ata nda ugondu na Agwatana zhiaaŋ, ibɛ po ata hi lụpa du maa kede hi leshiji tulubo-ti-biye ta Agwatana gadaga o.

²Ibɛ po Agwatana hiɛŋ. N shɛlajɛ iwɛ bu na aka na teni cɛŋ, Ngee bi mbiyeni kaa nụ ụjita ubino. Hioko, hwuwayɛ go ibɛ shɛ aka na teni cɛŋ, hwayɛ ga ibɛ shɛ ụjita ubino.

³Ti shileni shi bụtụ be elele iyi ulayɛ o, iwɛ maa kede e sepi ugondu na ata nda unu o.

⁴Ama okwo ni iyi elele, tu momo utogono tutono cɛŋ maa tɛ shɛ miaụ-mu-ugondu Agwatana, ni isɛbwɛ-ti'ima i'wɛtwɛ, nụ ụbaụta, ni iyi nɛ ukekeshi ibɛ ya nda bụtụ, na amɛ-tụhaŋtụ,

⁵ni ijibi nɛ ee ti jibi, no shimwono-shi-tishi, no tusukwutogwu, nu ugondu ukpahiŋ tɛnda, nu uzawa malabụ, ne ezumi tɛnda;

⁶na tụrụmbɛɛ, ni isɛbwɛ-ti'ima, ni iyi-tumapa, na ahaŋsa tikpeke, ni iwɛ tumapa, na amɛ Mpiala mi Tijilo, no tulubo tu tugom,

⁷ni iwɛ-tɛkana tụdụma, nu ukpahiŋ wa Agwatana; ni i'wɛŋnɛ ujasa i tiririri, tu u'ala ubiye keeni u'ala ugwulwo,

⁸nu ụjɛrụma, nu ụpụrụsa; nu urishi ụwɛ, nu urishi ubiye. Tɛ shɛ gana ehelekeci, ama ti shɛ kaa atwa tɛkana;

⁹tɛ shɛ gana atwa na atwamwa mepi shi, ama atwamwa kaa ti mepi tebiye; tɛ shɛ gana atwa na o 'wo, ama hioko ma ta ya kaa uraiŋ; tɛ shɛ gana atwa na aa pana ulwapɛ, ama a tu kwụnɛ shɛ kaa;

¹⁰tɛ shɛ gana atwa na shɛmɛ sha aba sha hashaganụ, ama ta nda kaa unyasa aka elele, tɛ shɛ gana okofwo, ama atuba kaa ta nda atwa ofwugwo azhɛgba; tɛ shɛ gana atwa na zasa iyi elele, ama ti 'yajɛ kaa iyi elele.

¹¹Ahiɛba atwa Korint, ti hi swekeni shi iyi elele nu n-ndumwa mu unu tu o, ti hi kepishingeni kaa shɛmɛ shi tu kpataa.

¹²Tu gwuricinji shi tulubo tu na oto hi lubo ne ekwunyi o, ama ahiɛba hio gwuricingo tulubo tu na ehi mo tu lubo ne ekwunyi.

¹³Ma duma iwɛ ne hiŋ gana miaụŋ mi mi, kapɛshɛnga ma shɛmɛ shi hiŋ kpataa, nda iŋ ma gana tụtụpanana.

¹⁴Ta mama nangwụcɛnga ma na atwa na tɛtanɛ shɛ rishe o, tiririri suu ti eri ta twa-ikpɛngwu ni iyi iwɛ? Kwo kaa uhioko-uhwaŋna suu eri wa twa-ikpɛngwu ne tishi?

¹⁵Unu-tutwa Krast suu eri momo lononu no tugworozwo?[9] Bụtụ na tɛtanɛ-rishe suu eri ba sha itwɛ ike na bụtụ na tɛtanɛ shɛ rishe?

¹⁶Tumomo lononu ti imbe Umwono wa Agwatana zhɛ momo lononu na tuwaa? Atuba tɛ shɛ Umwono wa Agwatana na shɛ buumwa. Gana na ta Agwatana hiɛŋ. N zhɛ ma nama na shɛmɛ sha aba, N zhɛ mu no rungo na ashashɛ aba; N zhɛ ma sha Agwatana aba; ɛɛ zhɛ a sha atwa mi.

¹⁷Iwɛ ecilo ata, Agwatana jɛmɛ, bɛɛ hiɛŋ, Banɛ ma na ashashɛ aba, meme tileni ma swooŋ, to tumongono ma iyi nɛ zasa shɛshɛshɛ o, nazhɛ Ngɛɛ zhɛ ma hi lashɛga.

¹⁸Ngɛɛ zhɛ ma sha Bishi hiŋ, ɛhi zhɛ hia sha du miaụŋ mi mi me eyi keeni miaụŋ-mo-o, Agwangwama na Hwuri Kpaaŋ ubwa hiɛŋ.