Read bassa ƐFƐSƐS 4 Bible Online

ƐFƐSƐS 4 - bassa bible

ƐFƐSƐS 4

¹Ibɛ po Ama hi lụpa Gamba na aa 'imɛ ee shiyeni nu umwono-tishi iwɛ ya Agwangwama, maa ga araiŋ hiŋ nama te teni cɛŋ na tusuyana tu na Agwatana ihi suyanɛ.

²Ne meme zucinje ma hwɛɛ, na tusaiiŋ, ni isɛbwɛ-ti'ima, na ima ma isɛbwɛ na bụtụ bụtụ no tulubo.

³Nda ma gana na ehi eri maa hi untangana tutogotogwu tu Mpiala tu ko, maa amɛ-olom ihi umpi na anya hiŋ.

⁴Tu'waba tɛ shɛ tu ko, Mpiala mɛ shɛ mu ko, gana na ta a hi suyanɛ na ashɛlatụ oko,

⁵Agwangwama oko, rishe-tɛtɛtana ru ko, ubaptizim uko,

⁶Agwatana oko, na shɛ Bishi bi iyi elele, ubwa na hwuri iyi elele, ba nda ugondu ni iyi elele, ba nama na shɛmɛ shi tu hwɛɛ.

⁷Ubwa peni bụtụ bụtụ na ashashɛ tu tulubo-ti-biye gana na te bimenji bu upwaŋ Krast namɛ.

⁸Iwɛbɛ po Iwɛ ya Agwatana hiɛŋ, Aka na bee munji na azuba, bee zeriji atwa ti'ima a na gembi ufwugwo bee hwuri; bee penenji atwamwa apwaŋ.

⁹Imbe tuba tumungo ta ata tu bwa tɛ shɛɛ? Ti yaa shɛ shɛ tikezhe bee kezhe tugwo hiiŋ bee teni tuta tu unyizoo?

¹⁰Bụtụ ata kezhe, ubwa shɛ Bụtụ ata munji du taa dụlụ uhwuri azuba kpaaŋ, iwɛ maa ba ala iyi elele tishidingo.

¹¹Bee peni atwa oko maa a shɛ atumwa, bee peni atwa oko maa a shɛ egesere, bee peni atwa oko maa a shɛ e'enenji, bee peni atwa oko maa a shɛ a'iywa-agwụdụ keeni embisegeni,

¹²iwɛ maa ụrɛcɛnga atwa tijilo Agwatana, iwɛ ugondu tɛndana atwa, maa o mo tu'waba tu Krast,

¹³uuwa i ci aka na tu hwɛ hwɛɛ tu ci tutogotogwu te rishe-tɛtɛtana tu ko, keeni Yɛu ya Agwatana tumapa, uuwa i ci aka na atɛ shɛ ogborofwu, aka na eti ci bimenji bu ụnjɛswa bi tishidingo tu Krast.

¹⁴Iwɛ maa kede tɛ shɛ ma ya miaụŋ mi shenje mu na mpiala mi imbisegeni ye elele ma 'wananga beye bana tedure na atwa amɛ-tuma, ni inswɛ, na tudabara ta tuhalakaka o.

¹⁵Ama tɛ shɛ tu na untangana iwɛ-tɛkana no tulubo, maa tu na waŋna ma na amɛ ubwa na shɛ uhiuhiu iyi elele, ubwa shɛ ga Krast.

¹⁶No olugwo ubwa ee seteni tu'waba tu na oo togwu gom tedure ni itwɛ elele nɛ ee peni tu, gana na ti inɛ inɛ ya nda ugondu. Tu'waba ta ata ta kaana ugombo hwɛɛ, taa mama ma no tulubo.

¹⁷Ibɛ po Ama duma inɛ gɛ, Ama la du tiseyida na amɛ Agwangwama, maa hiɛ shɛ shɛ hi na uranga ya tunama gana na atwa na zasa rishe-tɛtɛtana a nda na tɛgadaga ta shihaŋsa sha ba o.

¹⁸Ti'eshicigo ta aba tɛ shɛwa tishi, i'ɛlɛ ya aba zaba nu uraiŋ wa Agwatana o, iwɛnɛ to tugbodu tu namɛ na shɛmɛ sha aba, shɛmɛ sha aba kaa shi hweteni.

¹⁹Iwɛ te shi atwa ata o, e meme peni maa a shɛ anjɛ masha mụ wɛ, maa a na nda iyi elele nɛ zasa shɛshɛshɛ keeni eshe-iyi.

²⁰Ama shɛ gana ata ehi seshi Krast o.

²¹Gana na ahiɛ hwụjɛ iwɛ ubwa gom, ee hi mbisegeni kaa iyi na amɛ ubwa, gana na ti iwɛ-tɛkana namɛ na amɛ Jisus Krast.

²²Asha ushigo ma bụtụ ata hiŋ bụ ụngwụshɛ na teni ụdamụ ta masha mi hiŋ mu cala keeni ukwedeyi ụwɛ u tuhalakaka.

²³Ga Mpiala mɛ njɛ shɛmɛ shi hiŋ keeni shihaŋsa shi hiŋ tɛnda tu ufwo.

²⁴Urugono ma bụtụ ata bu ufwo, ubwa shɛ bụtụ ata Agwatana njɛ nụ ụsụbwa ubwa, ne tiririri keeni tijilo tɛ tɛkana.

²⁵Iwɛ ecilo ata na 'waŋ ma ya ụzagwụ, bụtụ bụtụ ga bu na duma iwɛ-tɛkana nu uyebi ubwa, iwɛnɛ ta atɛ shɛ tu'waba tu ko hwɛ hwɛɛ tu.

²⁶Okwo ahia nda isɛbwɛ, ama ta nda ma tuba iwɛwɛ o, to lono ma maa uwaŋna teneni isɛbwɛ hiŋ ti'ishijɛ o.

²⁷Ta pana ma Ibiri ohwolu o.

²⁸Bụtụ na bo zondo la izunde, kede zundo ya izunde o, ama ga bu na nda ya ugondu ni i'ɛlɛ ibwɛ iwɛ maa bu na 'yaga iyi nɛ maa pana bụtụ na ukekeshi wa nda.

²⁹To no lono ma maa n-ndumwa mụ wɛ me elele mu na banɛ nu unu hiŋ o, semi ga shɛ mu naa na mɛ zhɛmɛ, mu na ma ma bụtụ maa bu na kaana tuwaŋna, iwɛ maa bu na pana atwa na a hwuga mụ tulubo-ti-biye, iwɛnɛ tu ukekeshi muba wa nda aŋ.

³⁰Ta hashɛgana ma Mpiala mi Tijilo ma Agwatana amɛ o, iwɛnɛ po na muba aa hiɛ njɛ useyida iwɛ ụjita u tugwube ti hiŋ.

³¹Bacɛnga ma ụgagwụ kpaaŋ, ti isɛbwɛ-ti'ishijɛ, ti isɛbwɛ-tɛnda, tu n'ungwa, to tugbozhigo keeni amiaụŋ kpaaŋ.

³²No momo moponu ma iwɛ, na 'yaga ma uwanyi na shihaŋsa shi hiŋ, no momo gongonu ma iwɛ, gana na ta Agwatana ihi gengeni inee hiŋ iwɛ Krast.