Read bassa ƐFƐSƐS 5 Bible Online

ƐFƐSƐS 5 - bassa bible

ƐFƐSƐS 5

¹Na shata ma Agwatana gana na ahiɛ shɛ miaụŋ mu tulubo.

²Na nda ma iyi no tulubo gana na tu ga Krast ihi lubi du, bee meme peni kaa iwɛ hiŋ, baa shɛ iyi tɛshɛkana keeni iyi ụrụpɛ na shanɛ Agwatana gana ụhiụŋ ụlatụ.

³Ta na duma ma okwo iwɛ tuwɛle tɛnda, okwo iyi elele nɛ zasa shɛshɛshɛ, keeni isɛbwɛngwɛ na ashashɛ hiŋ o, iwɛnɛ ta ahiɛ shɛ atwa tijilo Agwatana;

⁴keeni tiri, keeni n-ndumwa mu tusashɛ tụdụma o, okwo asada na teni shi cɛŋ ta na nda ma o; ama na nda ma ugwoje tụlụkpashɛ ti inɛ ɛtɛ.

⁵Mapa ma inɛ gɛ gom, maa i zasa buwɛle, kwo kaa bụtụ na zasa shɛshɛshɛ, kwo kaa bụtụ na ba nda isɛbwɛngwɛ, na shɛ bɛnjɛ-bu-tuwa, i zhɛ ba 'yaga ogwu elele na Cɛnjɛ-ta-tugwama tu Krast keeni ma tu ta Agwatana o.

⁶To lono ma maa bụtụ be elele ihi helekeci na n-ndumwa mo ohondo. Iwɛnɛ po iwɛ ijɛ ɛtɛ isɛbwɛ ya Agwatana ya zhajɛ nu uhiuhiu miaụŋ mu na mu hwụjɛ shɛ unu.

⁷Ibɛ po kede i'ɛlɛ hiŋ nama na aba o.

⁸Iwɛnɛ po hi namwawaŋ la ne tishi aka oko, ama hwuwayɛ hi namɛ ya nu uhioko-uhwaŋna na amɛ Agwangwama. Na nda ma ya iyi ta lanɛ na miaụŋ mu na mu namɛ nu uhioko-uhwaŋna.

⁹(Iwɛnɛ po uhioko-uhwaŋna ubwa[6] wɛ bɛcinjɛ iyi ibiye ye elele, keeni tiririri, keeni iwɛ-tɛkana).

¹⁰Na yalaga ma, maa hi na mapa iyi nɛ kwụlanɛ Agwangwama.

¹¹Ta na twa ma ikpɛngwu nu ugondu tishi na zasa ule o, ama ga shɛ uvwi ɛhiɛ vwɛ aŋ.

¹²Iwɛnɛ po iyi nɛ aa nda ne tusweci, okwo tụdụma ti ibɛ tu baba, ezuye yaa shɛ.

¹³Ama aka na tu uhioko-uhwaŋna vwɛ iyi elele uvwi, asha u mbiseni iŋ caakwụ.

¹⁴Iyi elele nɛ kaa ee mbiseni caakwụ i shɛ ya uhioko-uhwaŋna.[7] Iwɛbɛ po yɛɛ hiɛ ni Iwɛ ya Agwatana, E-buweci-bu-malabụ, zhinjɛ, Hiɛ no tu'wo, Nazhɛ ga Krast zhɛ na ta no ofwo bu.

¹⁵Ibɛ po na nda ma pece tebiye gana na ahia nda iyi, ta na nda ma iyi gana atwa na incɛ shɛ o, semi ga shɛ gana atwa na incɛ.

¹⁶Na nda ma uhwara no ohwolu elele na ahiɛ 'yajɛ, iwɛnɛ ta aka ga shɛ aka awɛ.

¹⁷Iwɛbɛ po ta sha ma shɛlagwụ o, ama no eshicigo ma iyi nɛ kwụlanɛ Agwangwama.

¹⁸Ta na swa ma meni mu tụ'walụ ta afwafwa maa mu na hi ngba o, ya pana bụtụ ụpụrụsa, ama ga Mpiala mi Tijilo mu no shinongo shɛmɛ shi hiŋ.

¹⁹Na duma ma n-ndumwa na anya hiŋ na Shɛzunga shi tizhemonjino AGWANGWAMA, keeni Shɛzunga sha Agwatana, keeni Shɛzunga shɛ mpiala, na zungangana ma Agwangwama shɛzunga sha ashɛtwa na shɛmɛ shi hiŋ.

²⁰Na nda ma ugwoje wa Agwatana na shɛ Bishi ɛgbɛɛ iwɛ iyi elele ni izeci ya Agwangwama tu Jisus Krast.

²¹No momo tulonono ma anya hiŋ ni inyɛsɛ Krast.

²²Ahiɛba eyikwo, no momo tulonono ma olwo hiŋ gana na ehi meme tileneni Agwangwama.

²³Iwɛnɛ po bwolo ubwa shɛ uhiuhiu biyikwo, gana na ga Krast shɛ du uhiuhiu tụ'ụlwa-tụ-ụhiɛŋshɛ-Agwangwama, tu na tɛ shɛ tu'waba tu bwa, ubwa du kaa shɛ Bibicinji ba tu'waba ta ata.

²⁴Ama gana na ta tụ'ụlwa-tụ-ụhiɛŋshɛ-Agwangwama ti meme shileni Krast, gobwonu du ge eyikwo no momo tulonono olwo aba ni iyi elele hwɛɛ.

²⁵Ahiɛba olwo, no lubo ma eyikwo hiŋ, gana na ti ga Krast lubi du tụ'ụlwa-tụ-ụhiɛŋshɛ-Agwangwama, harɛ bee meme peni iwɛ tuba;

²⁶iwɛ maa nda tụ tijilo, na aka na tu baa njɛ tụ shɛshɛshɛ na tɛnyashɛnga te meni mu na mɛ shɛ n-ndumwa ma ata;

²⁷iwɛ maa mama shapɛrɛganɛ tụ'ụlwa-tụ-ụhiɛŋshɛ-Agwangwama tu na ti 'yajɛ ụjɛrụma, tu na tu zasa udomu, okwo tukwanya kwanya, kwo kaa iyi gɛnɛ ɛtɛ; no ofwo ikɛnyi ibwɛ ama iwɛ maa tɛ shɛ tu'ulwa te tijilo, maa kede ti 'yaga unu-tusapa o.

²⁸Gana olwo shɛ o lubo eyikwo aba gana tu'waba ta aba ta. Bụtụ na bo lubo biyikwo bwa, asha bu momo lubo du.

²⁹I zasa bụtụ na bo imo tu'waba tu bwa kwukwuŋ, ama bo shiyono tu eshe, baa ima tụ u'ala gana na tu ga Krast ba nda du tụ'ụlwa-tụ-ụhiɛŋshɛ-Agwangwama.

³⁰Atuba kaa tɛ shɛ itwɛ tu'waba tu bwa.

³¹Iwɛ ecilo ata ibɛ butubwenyi ba ganga bishi bwa no bino bwa, maa bo togwu ne biyikwo bwa, ebe yebi ata a sha ya ike.

³²Iyi tusweci gɛ i shɛ iyi i'wɛtwɛ; ama n-ndumwa mu Krast na tụ'ụlwa-tụ-ụhiɛŋshɛ-Agwangwama Ama duma.

³³Okwo ti yaa shɛ gana ata, bụtụ bụtụ na ashashɛ hiŋ go bu no lubo biyikwo bwa gana ikɛnyi ibwɛ; ge biyikwo kaa du na pana bwolo bwa ụjɛrụma.