Read bassa FILIPAI 2 Bible Online

FILIPAI 2 - bassa bible

FILIPAI 2

¹Ibɛ po yaa shɛ ikɛnyi tukaana ye elele namba tedure Krast, yaa shɛ ti'ingatanga to tulubo tu namba, yaa shɛ ikpɛngwu-tutwa nɛ dure Mpiala namba, yaa shɛ iwɛ-tumapa namba, keeni inyɛmɛnyɛmɛ-tihioko.

²Asha ụrɛcɛnga ma unyasa mu, na ahaŋsa oko ti'yaga, no tulubo tu ko ti'yaga, medenji tutogotogwu na tuhaŋsa ti iyi ike.

³Ta na nda ma iyi elele no tumomo-mungicingo, kwo kaa nụ ụjɛrụma tɛgadaga o, ama ga shɛ na ahaŋsa tusaiiŋ. Bụtụ bụtụ ga bu na haŋsa maa binya bwa tekweci bee hwuri bu.

⁴Kede bụtụ bụtụ na ngbaraka iyi ikɛnyi ibwɛ kiri o, ama ga bu na ngbaraka du inɛ ya anya ubwa.[5]

⁵Ga ahaŋsa ata namɛ na amɛ Krast Jisus, na nama du na shɛmɛ shi hiŋ.

⁶Okwo tu baa shɛ masha mu ko na Agwatana, shɛ ni iji baa njɛ maa nangwụ na Agwatana o.

⁷Ubwa mama njɛ bohondo,[6] bee teni ụsụbwa bujama tisha, baa mama jɛshɛrɛjɛ baa sụbɛ atwa.

⁸Gana na ta a kwụbɛ maa masha mu bwa mɛ shɛ masha ma butugwumwa, bee meme-zucinje, baa hwụjɛ-unu uuwa i ci tu'wo, okwo tu taa shɛ tu'wo tụ ụ'wụ'wụ-ubatanɛ.[7]

⁹Iwɛbɛ po du Agwatana gembicinji bu te zeci, bee peni bu izeci nɛ hwuri izeci ye elele;

¹⁰iwɛ maa go ululo we elele na namɛ na azuba, tu unyizo, keeni tuta tu unyizo du, kwuzono izeci Jisus,

¹¹maa go unu we elele leni maa ge Jisus Krast ubwa shɛ Agwangwama, iwɛ ụjɛrụma wa Agwatana na shɛ Bishi.

¹²Ahiɛba eyejilo mi tulubo, kede i shɛ aka na Ngaa namɛ ne hiŋ kiri ahia hwuga-unu mu aka elele o, ama na kaana ma unu mu tuhwuga hwuwayɛ okwo tu Ngaa zasaba. Na nda ma ugondu na zhɛ wɛ bɛcinjɛ ubino hiŋ tedure ni inyɛsɛ keeni tɛzhɛgɛdana.

¹³Iwɛnɛ po Agwatana ubwa ba nda ugondu na shɛmɛ shi hiŋ. Ubwa ma hi pana tukwulangana maa hi na haŋsa keeni maa hi na nda du iyi nɛ ya kwulana bụ.

¹⁴Na nda ma iyi elele uzawa tungwulongongo, nu uzawa ashamanjɛ,

¹⁵iwɛ maa kede hi 'yaga unu-tusapa o, maa hi nama rụmbɛɛ, maa hiɛ shɛ miaụŋ ma Agwatana mu na mu zasa udomu, maa hi na ta gana uhioko-uhwaŋna nu unyizo, na ashashɛ uwaŋnɛ ga ontongonu, unaa na kaa ụ shɛ una uci'nyɛ,

¹⁶gana na ta ahia untangana n-ndumwa ma ata mu uraiŋ dimi, maa Ma ala hwuŋ tubusa nụ Ụjita u tugwure tu Krast, maa Ma kwụba maa usumwa na Ngee gezhiji la nu ugondu mu shɛ shɛ iyi tɛgadaga o.

¹⁷Ama okwo yaa shɛ aa 'wɛŋ mehieŋ mi mi gana ụrụpɛ tuswa[8] keeni ugondu tɛndana rishe ri hiŋ tɛtɛtana, asha Ma nda unyasa, Ma bwada kaa unyasa ata ne hiŋ hwɛɛ.

¹⁸Gobwonu du ahiɛ shɛ hi na nda unyasa, maa hi na bwada unyasa ata ne mi.

¹⁹Ama N ngbaracɛ uhwaŋna maa i zha shɛ yo ilogogo ti Ngɛɛ zhɛ ma hi tumwananɛ Timoti o, iwɛ maa amɛ mi gwuriseni na aka na ti Ngee mepi gana na tu unabarɛ hiŋ shɛ.

²⁰N zasa bụtụ na ahaŋsa ubwa nangwụ nu bwa na zhɛ ma hi ngbaraka tebiye o.

²¹Iwɛnɛ po hwɛɛ aba a jalakaka iyi ikɛnyi aba, e jelekeci shi inɛ Krast Jisus o.

²²Ama hi mepi du gana na go Timoti shɛ, maa gana na ti yɛu ya nda ugondu ne bishi bwa, gobwonu du baa nduwa ugondu wa Anabarɛ Ebiye ne mi.

²³Ibɛ po Ngaa ngbaracɛ uhwaŋna maa Ma tumwanɛ bụ pi hiŋ gunu na tu Ngaa kwụbɛ gana na ti iyi n namanɛ epe.

²⁴Ama M patanɛ Agwangwama rishe maa i zha shɛ yo ilogogo ti Ngɛɛ zhɛ ma zhajɛ ni ikɛnyi mi o.

²⁵Ama N heŋshi maa i shɛ tilɛɛ maa Ma hi tumwananɛ Ɛpafroditos, yɛu-bino mi, na ba nda ugondu ne mi, na kaa ba nda tusaza ne mi. Ubwa du shɛ butumwa hiŋ na ahi tumwanɛ, maa ma n ndana iyi nɛ ukekeshi ibɛ ma n nda.

²⁶Iwɛnɛ po bi 'yajɛ ukwedeyi ụ'wụtụ iwe hiŋ hwɛɛ, ama ụbaụta sepi bu la duwa, hiɛ hwụjɛ maa bụ gwụmɛ la.

²⁷Iwɛ-tɛkana, bụ gwụmɛ la ga gom, bu vwɛ cwɛŋ maa i shɛ bi ge 'wi, ama Agwatana hieci inyɛmɛnyɛmɛ ibwɛ, shɛ inɛ ibwɛ kiri bee hieci o, ti inee mi ni kɛnyi mi du, iwɛ maa kede amɛ tụhaŋtụ mi keeni ugombo.

²⁸Ibɛ po Ngaa tumwanɛ bụ na tɛzhɛgɛdana, iwɛ maa aka na ahiɛ kwụbananɛ bụ, maa hiɛ njɛ unyasa, iwɛ maa tuba amɛ-tụhaŋtụ mi salananụ.

²⁹Iwɛ ecilo ata, lashɛga bu ma na amɛ Agwangwama nu unyasa ụ'wụtụ hwɛɛ, na muna ma atwa gana ata ụjɛrụma.

³⁰Iwɛnɛ po iwɛ ugondu Krast baa ga vwɛ la cwɛŋ i shɛ bu 'wi. Bee njeri uraiŋ ubwa no tu'wo, iwɛ maa mo n shidingono iyi nɛ ehi ge eri shi hi ma n ndana.