Read bassa FILIPAI 4 Bible Online

FILIPAI 4 - bassa bible

FILIPAI 4

¹Iwɛbɛ po a-miaụŋ-mo-bino mi tulubo, ahiɛba na Ama jala tijala tụ 'wụtụ, ahiɛba kaa hiɛ shɛ unyasa mu keeni udara mu. Ahiɛba atwa mi tulubo, shikono ma dimi na amɛ Agwangwama.

²Ma lụpa Ɛuyodia, Ma lụpa du Suntuke, maa a 'yaga ahaŋsa oko na amɛ Agwangwama.

³Iiŋ, gabụ uyebi mu u tugom,[11] Ma bụ lụpa du, maa no mbiyono eyikwo ata, iwɛnɛ ee meme shi ne mi na Anabarɛ Ebiye, nɛ Kɛlɛmɛnt du, keeni atwa na vwɛ a na a nda ugondu ne mi, aba shɛ atwa na ee 'nyeci nzeci ma aba nu utakada uraiŋ.[12]

⁴Na bwada ma unyasa na amɛ AGWANGWAMA aka elele, N zhɛ ma dumanana, N hiɛŋ, Na bwada ma unyasa.

⁵Ga atwa kpaaŋ mepi isɛbwɛ hiŋ ti'ima. Agwangwama gwumwongonu ya.

⁶Kede iyi elele ihiɛ tɛtaga ya o, ama na nda ma adua iwɛ iyi elele keeni tutabwa, na nda ma ugwoje, lono ma maa Agwatana mepi iyi nɛ ahia lụpa bụ.

⁷Nazhɛ amɛ-olom Agwatana, a na hwuri iyi elele nɛ atwa eshiciji zhɛ a 'yaka shɛmɛ shi hiŋ keeni shihaŋsa shi hiŋ iwɛnɛ ahiɛ shɛ inɛ Krast Jisus.

⁸A-miaụŋ-mo-bino mi na amɛ Krast, iyi nɛ vwɛ na: no shiyono ma shihaŋsa shi hiŋ ni iyi elele nɛ shɛ iyi tɛkana, ni iyi elele nɛ shɛ aa muna ụjɛrụma, ni iyi elele nɛ shɛ iyi tiririri, ni iyi elele nɛ shɛ iyi tụrụmbɛɛ, ni iyi elele nɛ pilanụ, ni iyi elele nɛ shɛ n-ndumwa mi biye. Yaa shɛ kaa iyi elele nɛ 'yajɛ izeci ibiye namba, yaa shɛ iyi elele nɛ waŋnɛ ashɛtwa namba, asha ga shihaŋsa shi hiŋ shɛ nama du ni inɛ gɛnɛ ɛtɛ.

⁹Iyi elele nɛ ehi seshi, ni iyi nɛ ehi leshiji, ni iyi nɛ ahiɛ hwụjɛ, ni iyi nɛ ahiɛ kwụbɛ no ofwo mi, na nda ma ijɛ ɛtɛ. Nazhɛ Agwatana na a pana atwa amɛ-olom zhɛ a nama ne hiŋ.

¹⁰Ma bwada unyasa duwa na amɛ Agwangwama, iwɛnɛ shihaŋsa shɛ na ahia haŋsa iwɛ mi shi hiananɛ, okwo ti yee ilegeji ya duwa. Okwo te ehi m peni shihaŋsa shi hiŋ, ama hi gwushiji shi ohwolu maa hiɛ njɛ iyi nɛ ahia jala o.

¹¹Ama shɛ maa Ma duma iwɛ iyi nɛ i n 'nyananɛ o. Iwɛnɛ po N swoswo, gana elele ti yaa n namanɛ, inɛ ɛtɛ i n gwumwa ya.

¹²M mepi gana na maa ma 'yaga ta gwumwa, Ngee mepi gana na maa ma 'yaga te gembi. N swoswo ni inɛ inɛ, keeni ni iyi elele nɛ yo vwutongono bụtụ. Tu gana na maa mo shigo, tu gana na maa imunɛ i n gwụmɛ, tu gana na maa ma 'yaga te hwuleji, tu gana na maa i n 'nyananɛ.

¹³N 'yajɛ ya ikɛnyi maa ma nda iyi elele tedure na Krast na m peni ukpahiŋ ata.

¹⁴Hiɛ njɛ tebiye ni ikpɛngwu nɛ ahi twa ne mi nụ ụbaụta mu.

¹⁵Oo ahiɛba atwa Filipai, mapa ma du maa okwo no tukwuno ta Anabarɛ Ebiye, aka na ti Ngee beni na cɛnjɛ tu Masɛdonia, i zasa tụ'ụlwa-tụ-ụhiɛŋshɛ-Agwangwama tu na tu twa-ikpɛngwu ne mi, na tụpana kwo kaa na tulashɛga o, semi ahiɛba kiri.

¹⁶Hi n tumwananɛ du iyi nɛ ukekeshi ibɛ ma n nda,[13] tu Ngaa namɛ ni Tɛsɛlonika uhwuri kpalụ ko.

¹⁷Shɛ maa Ma jala upwaŋ hiŋ o, ama Ma jala maa ge titeni ti hiŋ tu na kaana ugombo.

¹⁸Ama N 'yajɛ ya iyi elele, Ngaa 'yajɛ ya du te me hwuleji, N shiji, iwɛnɛ ti Ngee leshiji apwaŋ na ahiɛ n tumwananɛ tedure ni i'ɛlɛ Ɛpafroditos. A shɛ ụhiuŋ ụlatụ, a shɛ iyi ụrụpɛ nɛ teni cɛŋ nɛ kwụlanɛ Agwatana tebiye.

¹⁹Ama Agwatana mi zhɛ mo hi shidingono iyi elele nɛ ukekeshi ibɛ ma hi nda, gana na tu ugombo wa aduciya ubwa namɛ tedure na Krast Jisus.

²⁰Ama ga ụjɛrụma shɛ una wa Agwatana na shɛ Bishi tu tutu unyizo-nom. Ami.

²¹'Walụ ma bụtụ bụtụ na shɛ bụtụ bi tijilo na amɛ Krast Jisus. Miaụŋ-mo-bino na amɛ Krast mu na mu namɛ ne mi epe ma hi 'walụ.

²²Atwa tijilo Agwatana hwɛɛ a hi 'walụ, a na atwa ihwɛ ya Agwuma Sisa e hwuri a na atwa vwɛ hwɛɛ.

²³Go tulubo-ti-biye ta Agwangwama tu Jisus Krast tu nama na mpiala mi hiŋ.[14] Ami![15]