Read bassa KOLOSIA 4 Bible Online

KOLOSIA 4 - bassa bible

KOLOSIA 4

¹Ahiɛba shɛgwuma-shɛ-nhwaŋ, na ndana ma du ajama hiŋ inɛɛ nɛ namɛ shiriri keeni inɛɛ nɛ nangwụ, gana na te ehi mepi du maa hi 'yajɛ agwuma-ihwɛ na azuba.

²Uranga ma adua tɛnda dimi dimi, no shiyono ma eshe nu ugwoje tɛnda.

³Gobwonu du na tu ndana ma adua, maa Agwatana iti kepishingeni odubo iwɛ n-dumwa mu bwa, maa ta duma iyi tusweci Krast. Iwɛ inɛ ɛtɛ ee n shiyeni nu umwono-tishi,

⁴maa Mo mbisono iŋ caakwụ, gana na i shɛ tilɛɛ maa Ma duma iwɛ ibɛ.

⁵Na inta ma ni iyi nɛ ahia nda no ofwo atwa na namɛ no tupohondo,[15] na nda ma uhwara no ohwolu elele na ehi gwushiji.

⁶Ga n-ndumwa mi hiŋ mu na sha no tulubo-ti-biye, na nda mu ma maa mɛ shɛ gana manɛ, iwɛ maa hi mepi ajɛshɛgwa na ɛhi zhɛ hia pana bụtụ bụtụ.

⁷Ga Taikikos na shɛ yɛu-bino tulubo keeni bɛnjɛ-bi-iyi bɛ tɛcara na shɛ du yɛu-ugondu[16] na ba nda ugondu no tu na amɛ Agwangwama, bi zhɛ ba nda maa hi mepi gana na ti iyi elele i n namanɛ epe.

⁸N hi tumwananɛ bụ iwɛ iwe ebe ike ike, iwɛ maa ba mapa gana na ti iyi ihiɛ namanɛ,[17] iwɛ maa ingatanga kaa shɛmɛ shi hiŋ.

⁹N tumwanɛ Onismos, na shɛ yɛu-bino tɛcara keeni yɛu-bino tulubo, na shɛ bụtụ hiŋ bu ko maa zhagaga nu bwa. Aba zhɛ me hi swegeni iyi elele nɛ i njɛ epe.

¹⁰Ga Aristakos na namɛ nu umwono-tishi ne mi, ma hi 'walụ, keeni Makos buhongwu Banabas, (a na shɛ shɛ bishi keeni bino bu ko ama ugwunukwoshi keeni ukaka wa aba ụ shɛ uko). Iwɛ ubwa ehi leshiji unu-tupana. Yaa shɛ baa zhajɛ pi hiŋ, lashɛga bu ma.

¹¹Ge Jisus, na aa suyana go Justus, ma hi 'walụ du, aba namɛ na ashashɛ atwa na jeji teleyi. Atwa ga kiri a shɛ atwa na a nda ugondu ne mi iwɛ Cɛnjɛ-ta-tugwama ta Agwatana, aba njɛ maa amɛ mi gwuriseni suu.

¹²Gɛ Ɛpafras na shɛ bụtụ hiŋ bu ko, na shɛ yɛu-ugondu Krast Jisus, ma hi 'walụ. Bɛ shɛ bụtụ na ba shana ikɛnyi iwɛ hiŋ ɛgbɛɛ, na adua na baa nda, maa hi shikono dimi maa hiɛ shɛ ogborofwu maa hiɛ shɛ kaa atwa na ulwa, nu ukwulana wa Agwatana hwɛɛ.

¹³Iwɛ-tɛkana, Ma la bụ tiseyida maa bi 'yajɛ tɛzhɛgɛdana tụ 'wụtụ iwɛ hiŋ, ti iwɛ ya atwa na du namɛ nu Laodisia, ti iwɛ ya atwa na kaa namɛ ni Hiɛrapolis.

¹⁴Go Luk na shɛ buwa-bi-inibi, na atwa o lubo, keeni Demas, a hi 'walụ.

¹⁵'Walụ ma miaụŋ-mo-bino mu na mu namɛ nu Laodisia, keeni biyikwo ata ɛɛ hiɛŋ go Numefa keeni tụ'ụlwa-tụ-ụhiɛŋshɛ-Agwangwama tu na to sotulonu ni ihwɛ ibwɛ.

¹⁶Aka na ta a rɛcɛ utakada ga, lono ma maa a rɛcɛ uŋ du na tụ'ụlwa-tụ-ụhiɛŋshɛ-Agwangwama tu na tu namɛ nu Laodisia, maa hiɛ rɛcɛ du unaa ata banɛ nu Laodisia.

¹⁷Hiɛŋ ma Akipos, Ga bu na nda pece ni iyi nɛ Agwangwama peni bu, maa ga ụrɛcɛnga iŋ tɛnda.

¹⁸A'walụ mi Gamba go Poul a na Ngee 'nyeci nu u'ala mu ta. Ne teyinje ma shigbo shɛ na oo n to. Go tulubo-ti-biye ta Agwatana tu nama ne hiŋ.