Read bassa 1 TƐSƐLONIKA HIIŊ 2 Bible Online

1 TƐSƐLONIKA HIIŊ 2 - bassa bible

1 TƐSƐLONIKA HIIŊ 2

¹A-miaụŋ-mo-bino mi na amɛ Krast, hi mepi du maa tutono tu na eti teni na ashashɛ hiŋ tɛ shɛ shɛ iyi tɛgadaga o.

²Ama gana na te ehi mepi du tebiye ụbaụta na atɛ njɛ la keeni ụpụrụsa na aa tɛ njɛ ni Filipai, Agwatana iti peni kaa eshe-hwoo maa ta duma Anabarɛ Ebiye Agwatana na tusukakana ta ata aa tu sukakana.

³Tutabwa tu na ata hi tabwa ti beni shi nu uhwaŋna na 'wanjɛ o, ti beni shi kaa ni iyi tiri o, kwo kaa na tuhalakaka o.

⁴Ama gana na ta Agwatana iti menji baa kwụbɛ maa ti teni cɛŋ, ibɛ po bee ti utegeni Anabarɛ Ebiye; iwɛbɛ po ata duma iwɛ. I shɛ shɛ maa ta nda iŋ maa ta kwulana atwa o, semi maa ta kwulana Agwatana na ba yalaga shɛmɛ shi tu.

⁵Hi mepi du tebiye maa tɛ jɛmɛ shɛ unu-ụlatụ kwukwuŋ, n-ndumwa mu tu kaa mɛ shɛ shɛ maa to urogono eshe-iyi elele o. Agwatana ubwa shɛ useyida tu.

⁶Ti jeri shi kaa ụjɛrụma na banɛ no olugwo atwa, kwo kaa no olugwo hiŋ, kwo kaa no olugwo anya atwa, kwo kaa maa ta hi shana i'wɛŋnɛ nɛ i zheneni, iwɛnɛ ta atɛ shɛ atumwa Krast o.

⁷Ama ti hi lemeni shɛmɛ aka na ati namɛ na ashashɛ hiŋ, gana bino[2] na ba ima miaụŋ mu bwa u'ula.

⁸Gana na ta ata hi jala tebiye, itɛ kwụlanɛ shɛ maa ta hi pana Anabarɛ Ebiye Agwatana kiri o, semi to shihwulu shi tu du, iwɛnɛ oto hi lubo tebiye.

⁹A-miaụŋ-mo-bino mi na amɛ Krast, hi teyinje ugondu na atɛ njɛ tụ ụjita tu uwaŋna keeni tire tu tu, iwɛ maa kede ta shana bụtụ be elele i'wɛŋnɛ na ashashɛ hiŋ, iwɛ Anabarɛ Ebiye Agwatana na eti hi enengeni o.

¹⁰Ahiɛba keeni Agwatana hiɛ shɛ eseyida tu, maa masha mu tu mɛ shɛ masha mi tijilo, na masha mu na mu namɛ ririri, na masha mu na mu zasa unu-tusapa iwɛ hiŋ na tɛtanɛ-rishe.

¹¹Gana na te ehi mepi iyi nɛ atɛ ndanɛ bụtụ bụtụ na ashashɛ hiŋ, gana na te bishi ba nda na miaụŋ mu bwa.

¹²Gobwonu du eti hi keeni ikɛnyi, ati hi ingatanjɛ, eti hi le tiseyida, maa ga tunama ti hiŋ tu lanɛ na Agwatana na ma hi suyana maa hi teni Cɛnjɛ-ta-tugwama tu bwa keeni ụjɛrụma ubwa.

¹³Iwɛ inɛ gɛ, ti genji shi ugwoje tɛnda na Agwatana o. Iwɛnɛ po aka na ehi leshiji n-ndumwa ma Agwatana, hi leshiji shi mu gana maa n-ndumwa ma atwa ehi leshiji o, ama hi leshiji mu gana na tu maa shɛ iwɛ-tɛkana ya Agwatana. Mi 'yajɛ ugondu na maa nda na shɛmɛ shi hiŋ, ahiɛba na hiɛ tɛtanɛ-rishe.

¹⁴A-miaụŋ-mo-bino mi na amɛ Krast, ahiɛba hia shata tụ'ụlwatagwụ-tụ-ụhiɛŋshɛ-Agwangwama ta Agwatana tu na tu namɛ nu Judia na amɛ Krast Jisus. Iwɛnɛ po ụbaụta ata uko uko atwa cɛnjɛ ti hiŋ ma hi pana, ubwa du Eju

¹⁵a na kwụnɛ la Agwangwama Jisus keeni egesere aba a pana aŋ. E tu unzhi na tɛshɛka, a kwụlanɛ shɛ kaa Agwatana o, ibɛ po aa sukakana atwa kpaaŋ.

¹⁶E ti kepeni uhwaŋna iwɛ tụdụma no ofwo atwa na shɛ shɛ Eju, iwɛ maa kede Agwatana bicinji aŋ o. Gobwonu du oo shidingo iwɛwɛ ya aba ɛgbɛɛ, iwɛ maa gɛ isɛbwɛ ya Agwatana kezhe no ohiuhiu aba tutu uce.[3]

¹⁷Ama a-miaụŋ-mo-bino mi na amɛ Krast, gana na etu jwe uvwuna no olugwo hiŋ na aka fwalaa, atu mama kwụbanụ sụ ne eshe semi na shihaŋsa kiri, i ma tu dwa eshe tebiye tebiye maa ta kwụba eshe hiŋ.

¹⁸Iwɛnɛ po Gamba go Poul ni ikɛnyi mi, M mekeni uhwuri kpalụ ko maa Ma zhajɛ pi hiŋ, ama ge Setan n njɛ ukwurishi.

¹⁹Imbe kwuŋ shɛ ashɛlatụ tu, kwo kaa unyasa tu, kwo kaa udara tu u tubusa ne eshe Agwangwama tu Jisus na aka na bee gwure hwuuŋ? Shɛ ahiɛba maa?

²⁰Ahiɛba kaa hiɛ shɛ ụjɛrụma tu keeni unyasa tu.