Read bassa 1 TƐSƐLONIKA HIIŊ 3 Bible Online

1 TƐSƐLONIKA HIIŊ 3 - bassa bible

1 TƐSƐLONIKA HIIŊ 3

¹Gana na eti eri shi ta nda ya ashɛlatụ, ibɛ po shɛmɛ shi tu shi lemi maa e ti genji maa ta nama nɛ Atɛns atuba tuba.

²Ibɛ po atu tumwanɛ yɛu-bino tu[4] go Timoti, na shɛ yɛu-ugondu ya Agwatana na Anabarɛ Ebiye Krast, maa me hi shikicingo dimi, maa kaana rishe-tɛtɛtana ri hiŋ ikɛnyi,

³iwɛ maa kede ụbaụta ga zhingiteni bụtụ be elele na ashashɛ hiŋ o. Ahiɛba ni ikɛnyi hiŋ, hi mepi tebiye maa iwɛ ecilo ata ee tu suje ee tileni epe.

⁴Ti hi mbiswo la taa na aka na atu ta namɛ ne hiŋ, maa ti zhɛ tu mo hioko ụbaụta, ubwa ganana ihi vwuteni, gana na du te ehi go mwopwo tebiye.

⁵Iwɛ ecilo ata, gana na ti Ngee eri shi ma ima ya isɛbwɛ, ibɛ po Ngaa tumwanɛ bụtụ iwɛ maa Ma mapa gana na te rishe ri hiŋ tɛtɛtana rɛ shɛ, kwo kaa nekeshi bimenji ata ihi mwongwo, maa ugondu na atɛ njɛ la ụ shɛ ya iyi tɛgadaga.

⁶Ama aka na go Timoti banɛ no olugwo hiŋ baa zhajɛ pu tu, baa tu 'waŋnanɛ anabarɛ ebiye iwɛ rishe ri hiŋ tɛtɛtana keeni tulubo ti hiŋ, maa hi te ti teyinje ɛgbɛɛ, yaa ma hi dwa kaa du eshe tebiye tebiye maa hiɛ tụ kwụbɛ, gana na du yaa ma tu dwa eshe maa ta hiɛ kwụba.

⁷Iwɛ inɛ gɛ a-miaụŋ-mo-bino tu na amɛ Krast, rishe-tɛtɛtana ri hiŋ rɛ tɛ ingatanjɛ nụ ụbaụta tu keeni shɛmɛ-shɛ-tụhaŋtụ shi tu hwɛɛ.

⁸Iwɛnɛ po hwuwayɛ nazhɛ ata hwungwa ya, ti yaa shɛ ohio shikono dimi na amɛ Agwangwama.

⁹Shibwonu imbe ga shɛ ugwoje na eti eri ta nda na Agwatana iwɛ hiŋ, iwɛ unyasa we elele na atɛ njɛ la na agba Agwatana tuu?

¹⁰Ta nda adua tebiye tu uwaŋna tụ ụjita, maa ta kwụba eshe hiŋ, maa ta ụrɛcɛnga kaa du iyi nɛ ga hi 'nyananɛ ne rishe-tɛtɛtana.

¹¹Ama ga Agwatana na shɛ Bishi tu keeni Agwangwama tu Jisus Krast utu ndanɛ uhwaŋna ni ikɛnyi ibwɛ maa ta zhajɛ pi hiŋ.

¹²Ga Agwangwama ihiɛ njɛ maa hi na kaana ugombo no tumomo lubonu keeni no ofwo atwa kpaaŋ, gana na ata nda du no ofwo hiŋ gbaa.

¹³Go shikicingo shɛmɛ shi hiŋ dimi ne tijilo uzawa unu-tusapa ne eshe Agwatana na shɛ Bishi tu, na aka tugwure tu na Agwangwama tu Jisus Krast zhɛ be gwure na atwa ubwa tijilo hwɛɛ.[5]