Read bassa 1 TƐSƐLONIKA HIIŊ 4 Bible Online

1 TƐSƐLONIKA HIIŊ 4 - bassa bible

1 TƐSƐLONIKA HIIŊ 4

¹Iwɛ ecilo ata, a-miaụŋ-mo-bino mi na amɛ Krast, inɛɛ nɛ vwɛ ya, i shɛ, ta hi lụpa, ata hi kaana ikɛnyi na amɛ Agwangwama Jisus, maa gana na te ehi leshiji uhwaŋna ata na ụ shɛ tilɛɛ maa hi na nda iyi nu bwa maa hi na kwulana Agwatana no olugwo tu, maa gana na ta ahia nda iyi, maa hi na kaana gana ata duwa duwa.

²Hi mepi du tebiye unu na eti hi peni nu ukpahiŋ wa Agwangwama tu Jisus.

³Iyi nɛ i shɛ ukwulana wa Agwatana na, ibɛ shɛ maa ma hi nda atwa tijilo, maa kede hi timengeni tuwɛle tɛnda o.

⁴Bụtụ bụtụ ga mapa gana na baa shɛ ba untangana tu'waba tu bwa[6] ne tijilo tɛnda keeni nụ ụjɛrụma.

⁵Kede i shɛ nu ukwedeyi ụwɛ gana na ta atwa na shɛ shɛ Eju a na mepi shi Agwatana[7] a nda o.

⁶Kede bụtụ be elele njɛ yɛu-bino bwa iyi iwɛ, kwo kaa 'wanganɛ bụ ni iyi gɛnɛ gɛ o. Agwangwama ubwa zhɛ ba tụpana hwuŋ tụlụkpashɛ ti ijɛ hwɛɛ, gana na eti hi mbiswo la, ati hiɛ tɛtaganɛ la kaa du unu iwɛ ibɛ tebiye.

⁷Agwatana utu suyanɛ shɛ iwɛ iyi tiri o, semi iwɛ tijilo.

⁸Ibɛ po bụtụ be elele na lacɛ n-ndumwa mu ga, shɛ bụtụ baa lacɛ o, semi Agwatana na ma hi pana Mpiala mu bwa mi Tijilo.

⁹Ama iwɛ tulubo tu na ohio lubo miaụŋ-mo-bino hiŋ na amɛ Krast, ukekeshi ihi te shi ya maa ta hi 'nyatanɛ iwɛ ibɛ o, iwɛnɛ ta Agwatana ihi mbiswogwonuo maa hi no momo lubonu.

¹⁰Ahiɛba hi ga na nda gana ata, ohio lubo miaụŋ-mo-bino me elele mu na mu namɛ na cɛnjɛ tu Masɛdonia kpaaŋ. A-miaụŋ-mo-bino mi na amɛ Krast, iwɛbɛ po ata hi kaana ikɛnyi maa hi na kaana tɛnda gana ata duwa duwa.

¹¹Na makana ma tebiye maa hi na nama saiiŋ, maa kaa hi na ima iyi nɛ i shɛ inee hiŋ u'ala, maa hi na nda iyi ni i'ɛlɛ hiŋ, gana na eti hi peni la unu.

¹²Na nda ma iyi na tunama ti hiŋ te teni cɛŋ, iwɛ atwa na namɛ no tupohondo,[8] iwɛ maa kede hi na ngbaraka bụtụ be elele nu ukekeshi na ma hi nda o.

¹³A-miaụŋ-mo-bino mi na amɛ Krast, ti jeri shi maa hiɛ shɛ ogbodu iwɛ atwa na loyo malabụ o, iwɛ maa kede shɛmɛ shi hiŋ shɛ na hashɛganụ gana na shɛmɛ sha atwa na zasa ashɛlatụ sha hashɛganụ o.

¹⁴Gana na atɛ tɛtanɛ-rishe maa ge Jisus 'wi, bɛɛ hiɛ, asha gobwonu du Agwatana zhɛ be suje atwa na loyo malabụ ne Jisus.

¹⁵To hi mbiso inɛ gɛ nu n-ndumwa ma Agwangwama, maa atuba na tu ta vwɛ tɛ shɛ buumwa uuwa i ci tizhajɛ ta Agwangwama, ti zha shɛ to hwulono ya atwa na loyo malabụ umbe o.

¹⁶Iwɛnɛ ta Agwangwama ni ikɛnyi ibwɛ zhɛ baa banɛ na azuba, be zwe nụ ụhiɛŋshɛ unu-tupana, na rụhwụŋ ru uhiu wa atumwa-azuba, nu ukakacɛ wa Agwatana, nazhɛ atwa na go uwo la na amɛ Krast zhɛ ɛ hiɛ hiiŋ.

¹⁷Nazhɛ ɛɛ zhɛ mo tu sugo atuba na tu ta shɛ buumwa tu ta vwɛ o togwu na aba no odomu, maa ta twa na Agwangwama na mpiala. Ti zhɛ ta nama ya na Agwangwama gana ata tutuu.

¹⁸Iwɛ ecilo ata, no momo koononu ma ikɛnyi nu n-ndumwa mu ga.