Read bassa JOSHUA 1 Bible Online

JOSHUA 1 - bassa bible

JOSHUA 1

¹Na aba tu'wo tu Moses yɛu-ugondu ya AGWANGWAMA, nazhɛ AGWANGWAMA hiɛŋ Joshua yɛu-ye-eyi Nụn, na ga ndana la Moses iyi,

²Go Moses yɛu-ugondu mu 'wi. Mama 'imɛ ya hwuwayɛ go, tụ gabụ, ta miaụŋ mi Isrɛl kpaaŋ, maa hi keshi Urefu Jodan maa hi zhe na cɛnjɛ ta ata Ngɛɛ zhɛ ma pana aŋ, aba shɛ atwa Isrɛl

³Ofwo elele na ɛvwɛvwɛjɛ bụ fwụnjɛ, N zhɛ ma bụ pana aŋ, gana na ti Ngee shileni la Moses unu.

⁴Tugwungwu tụ bụ ti zhɛ te kwune nụ ụshɛka, nụ ụzalụ bu nshama mu Lebanon, te kwune nu Urefu Yufretis na shɛ Urefu ata Ụ'wụtụ na namɛ geri ba cɛnjɛ tɛ Ɛhit, i ci Itekwu ɛtɛ I'wɛtwɛ[1] ụzalụ bu uwaŋna-twonuo.

⁵Za bụtụ zhɛ ma bụ ala tụlasụ tutu tu'wo tụ bụ o. N zhɛ kaa ma nama na bụ gana na Ngaa namɛ la no Moses; N zha shɛ ma bụ ganga o, N zha shɛ kaa mo bu jinoko kwukwuŋ.

⁶Shana ikɛnyi maa 'imɛ-isɛbwɛ; iwɛnɛ po gabụ bi zhɛ ba 'yagaga atwa ga maa a yɛ ogwu cɛnjɛ ta ata Ngee shileni la eshi aba unu maa N zhɛ ma pana aŋ.

⁷Shana ikɛnyi maa 'imɛ-isɛbwɛ gbam, shiyono Undwa na yɛu mi ugondu, go Moses ibi peni eshe maa njɛ gana elele na ebi eri maa hwụjɛ-unu ubwa hwɛɛ. Ta vwụla maa genji uŋ, okwo iyi elele teni o, iwɛ maa ibu zhɛmanɛ no ofwo elele ebi teni.

⁸Ta ganga Undwa utakada ga tɛrɛta nu unu bu aka elele o, na ta aza ubwa tu uwaŋna tụ ụjita, maa shiyeni uŋ eshe maa na nda gana na ee 'nyeci uŋ kpaaŋ. Nazhɛ iyi elele zhɛ ma bụ 'yagana eshe, yɛɛ zhɛ kaa du ma bụ zhɛmana.

⁹Shɛ Gamba suu m bu peni-unu? Shana ikɛnyi maa 'imɛ-isɛbwɛ gbam. Ta nda inyɛsɛ, kede kaa ohwulu ubu horoko, iwɛnɛ ta AGWANGWAMA na shɛ Agwatana bụ, zhɛ a nama na bụ no ofwo elele na ebi teni.

¹⁰Nazhɛ go Joshua peni atwa shihwolu a na untanganɛ atwa ata unu, bɛɛ hiɛŋ,

¹¹Tonongo ma ugba tu'ulwa tu ga, maa hi mbishi atwa ga maa, Imanga ma iyimɛyɛ hiŋ. Iwɛnɛ po te kwuni hwayɛ i ci ijitɛ gɛ itɛtu, hi zhɛ hia kasha Urefu ga Jodan, maa hi zhe hi leshiji cɛnjɛ ta ata AGWANGWAMA na shɛ Agwatana hiŋ ihi peni maa hi 'yaga.

¹²Ama go Joshua mbishi ụlamụ Rubɛn, nụ ụlamụ Gad, keeni ashashɛ ụlamụ Manasɛ, bɛɛ hiɛŋ,

¹³Teyinje ma n-ndumwa ma ata go Moses yɛu-ugondu ya AGWANGWAMA ihi mbishi la, bɛɛ hiɛŋ, AGWANGWAMA na shɛ Agwatana hiŋ zhɛ ma hi pana ofwo na maa hi to ụhinjanụ, bɛɛ zhɛ kaa ma hi pana du cɛnjɛ ta ata.

¹⁴Eyikwo hiŋ, na miaụŋ mi hiŋ keeni iyimabiga hiŋ zhɛ a nama na cɛnjɛ tu ga go Moses ihi peni nụ ụzalụ bu uwaŋna-banụ bu Urefu ga Jodan, ama i shɛ tilɛɛ maa ejeshi hiŋ elele a na 'imɛ i'wɛŋnɛ ujasa, zhɛ a kasha maa e hwuleni miaụŋ-mo-bino ma aba umbe iwɛ maa e mbiyeni aŋ,

¹⁵uuwa i ci aka na AGWANGWAMA na shɛ Agwatana hiŋ peni aŋ ụhinjanụ, gana na du bee hi peni, iwɛ maa e leshiji du cɛnjɛ tu na AGWANGWAMA na shɛ Agwatana hiŋ peni aŋ. Na aba ibɛ nazhɛ ɛhi zhɛ hie jiye na cɛnjɛ tu ga ahiɛ 'yajɛ, tu ga go Moses yɛu-ugondu ya AGWANGWAMA ihi peni-unu nụ ụzalụ bu uwaŋna-banụ bu Jodan.

¹⁶Nazhɛ ɛɛ jishijɛ Joshua, ɛɛ hiɛŋ, Ti zhɛ ta nda iyi elele nɛ ebi ti peni-unu ibɛ, ofwo elele na kaa abụ tu tumwanɛ, ti zhɛ ta zha.

¹⁷Gana na atụ hwụjɛ la unu Moses ni iyi elele, gabata du ɛti zhɛ ta hwuga-unu bu gom. Ama ga AGWANGWAMA na shɛ Agwatana bụ nama na bụ gom gana na tu baa namɛ la no Moses!

¹⁸Bụtụ be elele na to tigezhe nu n-ndumwa mụ bụ, na kaa hwụjɛ shɛ unu n-ndumwa me elele mu na ebi peni aŋ unu muba, ɛ zhɛ a kwụna bụ. Shana ikɛnyi maa 'imɛ-isɛbwɛ gbam.