Read bassa JOSHUA 10 Bible Online

JOSHUA 10 - bassa bible

JOSHUA 10

¹Aka na tu ga Adoni-zɛdɛk agwuma Jɛrusalɛm hwụjɛ maa go Joshua leshiji Ai, bee iricinji uŋ kaa hwɛɛ, gana na tu baa njɛ la Jɛriko keeni agwuma ubwa. Gobwonu du baa njɛ Ai keeni agwuma ubwa, keeni gana na atwa na jɛjɛ ni Gibion njɛ unu-tutwa wa amɛ-olom na atwa Isrɛl, aa namɛ ya na ashashɛ aba.

²Ibɛ po atwa Jɛrusalɛm kwuni inyɛsɛ tɛnda tebiye iwɛnɛ ti Gibion shɛ ụshɛpwụ ụ'wụtụ gana ashɛpwụ tugwama a na vwɛ, keeni iwɛnɛ tu wee gembi tebiye uhwuri Ai, atwa na namɛ nu bwa kaa hwɛɛ a shɛ atwa na 'yajɛ ikɛnyi tebiye.

³Iwɛbɛ po ga Adoni-zɛdɛk agwuma Jɛrusalɛm tumwanɛ butumwa pu Hoham agwuma Hibron, keeni Piram agwuma Jamut, keeni Jafia agwuma Lakish, keeni Dɛbi agwuma Iglon, bɛɛ hiɛŋ aŋ,

⁴Munje ma pi mi, maa hi m mbiyeni, maa tu sukakanɛ ma atwa Gibion. Iwɛnɛ po a nduwa amɛ-olom no Joshua keeni atwa ubwa Isrɛl.

⁵Nazhɛ agwuma sha ata shɛ ta sha A'amo, aba shɛ shɛgwuma Jɛrusalɛm, na agwuma Hibron, na agwuma Jamut, na agwuma Lakish, keeni agwuma Iglon, oo momo togotogwu ee munji, te ejeshi aba hwɛɛ, ee hweri Gibion, aa sukakanɛ uŋ nu ujasa.

⁶Ibɛ po etwenyi Gibion tumwanɛ butumwa no ofwo Joshua ni Gilgal no ofwo na ee jwe ugba wa aba, ɛɛ hiɛŋ bụ, To jinoko miaụŋ mu ga bụ mu ugondu o, munje pu tu kakayɛ maa iti bicinji! Iti mbiyeni. Iwɛnɛ po shɛgwuma sha A'amo shɛ na shɛ namɛ na cɛnjɛ ti ishɛmɛ, o momo togotogwu hwɛɛ aba maa a tu sukakanɛ.

⁷Go Joshua beni ga ni Gilgal, ta atwa ujasa, te etwenyi na 'yajɛ ikɛnyi tebiye ee munji nu bwa hwɛɛ aba.

⁸Nazhɛ AGWANGWAMA hiɛŋ Joshua, Ta nda inyɛsɛ ya aba o, iwɛnɛ po M bu utwogwonuo aŋ; i zasa bụtụ okwo bu ko na namba na amɛ aba zhɛ ba ala tishikono na agba bụ o.

⁹Ibɛ po go Joshua keeni ejeshi ubwa beni ni Gilgal uuwa gi iyi yo holo, ee pushiteni aŋ eshigiri.

¹⁰Nazhɛ AGWANGWAMA bweji aŋ ne eshe ejeshi atwa Isrɛl, atwa Isrɛl kwụnɛ aŋ tụkwụna tụ 'wụtụ ni Gibion. Bee unzhi aŋ, oo to uhwaŋna ata zhɛ Bɛt-horon, aa uranjɛ aŋ tụkwụna tutu i ci Azika tutu Makida.

¹¹Gana na to o gozhigono atwa Isrɛl nu uhwaŋna ata beni ni Bɛt-horon u zwi Azika, ibɛ AGWANGWAMA 'wɛŋ atayɛ-eshilo a'wụtụ na azuba ee jiteni aŋ. Atwa na atayɛ ata eshilo kwụnɛ e hwuri atwa na miaụŋ mi Isrɛl mu kwụnɛ no otokwobi.

¹²Nazhɛ go Joshua mbishi AGWANGWAMA nụ ụjita ata na ta AGWANGWAMA suji A'amo bee utegeni atwa Isrɛl, baa jɛmɛ ne eshe atwa Isrɛl, bɛɛ hiɛŋ, Oo gabụ uwaŋna, shikono ni Gibion, Oo gabụ upiana, shikono nu ulomu Aijalon.

¹³Gabata uwaŋna shikeni ga zhirimi, ibɛ upiana shikeni urubwo uko uuwa i ci aka na tu udenji ata njɛ itɛpwɛ uhiuhiu wa aba no ofwo atwa i'ime ya aba. Ijɛ 'nyeci ba nu Utakada Jesha.[14] Maa uwaŋna shikeni urubwo uko na ashashɛ tụla, ụ njɛ shɛ izɛlɛgwu tutono, uuwa i ci gana uwaŋna mudu.

¹⁴Ụjita gana ata kaa u ta zasaba la kwukwuŋ, u zasaba ya kaa te kwuni na aka ata o, na aka na ta AGWANGWAMA hwụjɛ iwɛ bụtụ i ci gana ata o. Iwɛ-tɛkana, AGWANGWAMA twagwụ atwa Isrɛl ifelu.

¹⁵Nazhɛ go Joshua keeni atwa Isrɛl hwɛɛ jiye ni Gilgal na shɛ ugba na oo go sotulonu.

¹⁶Na aka ata shɛgwuma sha ata sha A'amo shɛ ta shi gezhiji shaa swacɛ nụ ụpangwụ uko na namɛ ni Makida.

¹⁷Aka na te e mbishi Joshua maa shɛgwuma sha ata shɛ ta shɛ swacɛ ba nụ ụpangwụ ni Makida.

¹⁸Bɛɛ hiɛŋ, Jirenji ma atayɛ oko a'wụtụ a'wụtụ maa hi kepi unu ụpangwụ ata, maa hi tileni apata atwa na zhɛ na ngbaraka uŋ.

¹⁹Ama tuba ta ganga ma atwa i'ime hiŋ tu'urugono. Sukakana aŋ ma te kwuni na atwa na lɛ ekwunyi, to lonono aŋ ma maa e teni na ashɛpwụ aba o, iwɛnɛ po AGWANGWAMA ihi utwogwonuo aŋ.

²⁰Gana go Joshua na atwa Isrɛl iricinji aŋ ta hwɛɛ, i vwɛ cwɛŋ maa i shɛ gana bụtụ bu ko gba vwɛ, ama atwa ticwɛŋ bana a na vwɛ teni nụ ụshɛpwụ ata ee ge kepi.

²¹Ama ejeshi ata wa atwa Isrɛl hwɛɛ jiye no ofwo Joshua lapiya, ee ci ugba wa aba na namɛ ni Makida. I zasa bụtụ be elele na eri ba kara maa dumangana atwa Isrɛl n-ndumwa mụ wɛ na cɛnjɛ ta ata o.

²²Nazhɛ go Joshua hiɛŋ, Kapɛshɛnga ma ya unu ụpangwụ ata, maa hi m bacɛnganɛ shɛgwuma sha ata shɛ ta.

²³Nazhɛ aa bacɛnganɛ bụ shụ ga, nụ ụpangwụ ata, aba shɛ agwuma Jɛrusalɛm, na agwuma Hibron, na agwuma Jamut, na agwuma Lakish, keeni agwuma Iglon.

²⁴Aka na tɛ ɛ bɛcinjɛ agwuma sha ata, ee suje shu no ofwo Joshua, go Joshua suyanɛ atwa Isrɛl hwɛɛ, bɛɛ hiɛŋ ehiu ejeshi a na ge zhe nu ubwa, Zhajɛ ma epe maa hi tegeni shɛgwuma shɛ ga ivwunɛ nu n'ilu ma aba. Ee zhe ga ee tegeni aŋ ivwunɛ nu n'ilu ma aba.

²⁵Go Joshua hiɛŋ aŋ, Ta nda ma inyɛsɛ o, kede kaa ohwulu ihi herikeni o; shana ma ikɛnyi maa hi 'imɛ-isɛbwɛ. Iwɛnɛ po gana AGWANGWAMA zhɛ a nda atwa i'ime hiŋ elele a na ɛhi zhɛ hia twa ifelu na aba ta.

²⁶Nazhɛ go Joshua kwuci aŋ, baa kwụnɛ, bee sweteji aŋ ni i'wɛ'wɛ nɛ namɛ itɛ du, ee genji aŋ aa swatajɛ ni i'wɛ'wɛ ɛtɛ tutu ụrụmɛ.

²⁷Aka na tu uwaŋna zhɛ utwonuo, go Joshua peni-unu maa ge kezhicinje aŋ ni i'wɛ'wɛ ɛtɛ, maa a 'wɛŋ aŋ nụ ụpangwụ we ebe aa ga mama intanɛ. Nazhɛ aa 'wɛŋ aŋ ga nu bwa, nazhɛ ee kepi unu ụpangwụ ata na atayɛ tubala a'wụtụ, a ta namba apata taa hwayɛ.

²⁸Nụ ụjita ata ibɛ go Joshua leshiji ụshɛpwụ Makida, bee kebi atwa ubwa nu utokwobi hwɛɛ ta agwuma ubwa, bee iricinji atwa elele na namɛ nu bwa. Bi genji shi okwo bụtụ bu ko maa vwa o. Baa njɛ agwuma Makida gana na baa njɛ la agwuma Jɛriko.

²⁹Nazhɛ go Joshua keeni atwa elele na namɛ nu bwa beni nu Makida ee zhe Lɛbna, aa sukakanɛ atwa Lɛbna nu ujasa.

³⁰Ibɛ AGWANGWAMA peneneni uŋ du atwa Isrɛl ta agwuma ubwa. Ibɛ po go Joshua kebi atwa elele na namɛ na amɛ ubwa nu utokwobi, bi genji shi bụtụ okwo bu ko maa vwa na amɛ ubwa o. Baa njɛ agwuma ubwa gana na baa njɛ la agwuma Jɛriko.

³¹Nazhɛ go Joshua, na atwa Isrɛl a na namɛ nu bwa hwɛɛ beni ni Lɛbna ee zhe Lakish, bee dweji uŋ tu'ulwa, nazhɛ aa sukakanɛ uŋ nu ujasa.

³²Ibɛ AGWANGWAMA utegeni atwa Isrɛl Lakish, ee leshiji uŋ nụ ụjita uyebi. Bee kebi atwa elele na namɛ nu bwa nu utokwobi, gana na tu baa njɛ la Lɛbna.

³³Nazhɛ go Horam agwuma Gɛzɛ munji maa mbiyono Lakish; ibɛ po go Joshua kwụnɛ bụ, ta atwa ubwa, uuwa i ci aka na yaa zasa bụtụ be elele na bee weŋpeni maa vwa.

³⁴Nazhɛ go Joshua beni ni Lakish na atwa Isrɛl elele na namɛ nu bwa hwɛɛ, ee zhe Iglon; ee dweji uŋ tu'ulwa, nazhɛ aa sukakanɛ uŋ nu ujasa.

³⁵Ee leshiji uŋ gu nụ ụjita ata, ee kebi bụtụ be elele na namɛ nu bwa nu utokwobi. Bee iricinji aŋ jita ata hwɛɛ aba, gana na tu baa njɛ la atwa Lakish.

³⁶Nazhɛ go Joshua na twa Isrɛl hwɛɛ beni ni Iglon ee zhe Hibron; aa sukakanɛ uŋ nu ujasa.

³⁷Ee leshiji uŋ, ee kebi uŋ nu utokwobi, hwɛɛ ta agwuma aba, ta atwa elele na namɛ nụ ụshɛpwụ ata. Bu weŋpeni shi okwo bụtụ bu ko maa vwa o, ee iricinji uŋ hwɛɛ, gana na baa njɛ la Iglon.

³⁸Nazhɛ go Joshua na atwa Isrɛl hwɛɛ bitirije ne ekwunyi aa sukakanɛ Dɛbi.

³⁹Ee leshiji uŋ, ta agwuma ubwa, ta ashɛpwụ ubwa ticwɛŋ cwɛŋ, ee kebi aŋ nu utokwobi. Ee iricinji atwa elele na namɛ nu bwa hwɛɛ, e weŋpeni shi okwo bụtụ bu ko maa vwa o. A njɛ Dɛbi keeni agwuma ubwa gana na aa njɛ la Hibron, keeni Lɛbna keeni agwuma ubwa.

⁴⁰Gana go Joshua kwụnɛ atwa cɛnjɛ ta ata kpaaŋ ta, ta cɛnjɛ tụ ụzalụ tuta, ta cɛnjɛ tu ulomu we embi ishɛmɛ, ta shɛgwuma shɛ bwa hwɛɛ. Bu weŋpeni shi okwo bụtụ bu ko maa vwa o, ama bi iricinji iyi elele nɛ ya hwungwa hwɛɛ, gana na ta AGWANGWAMA na shɛ Agwatana Isrɛl peni bu unu.

⁴¹Go Joshua lasatagwụ aŋ te kwune ni Kadɛsh-bania i ci Gaza, keeni cɛnjɛ tu Goshɛn[15] hwɛɛ, tutu Gibion.

⁴²Go Joshua leshiji shɛgwuma sha ata hwɛɛ keeni cɛnjɛ ta aba kpalụ ko gba, iwɛnɛ ta AGWANGWAMA na shɛ Agwatana Isrɛl twagwụ atwa Isrɛl ifelu.

⁴³Nazhɛ go Joshua na atwa Isrɛl elele a na namɛ nu bwa gwure nu ugba wa aba na oo go sotulonu ni Gilgal.