Read bassa JOSHUA 17 Bible Online

JOSHUA 17 - bassa bible

JOSHUA 17

¹Cɛnjɛ tu na ee peni ụlamụ Manasɛ, iwɛnɛ tu baa shɛ yɛu Josɛf ihiiŋ na. Ga Maki, ubwa shɛ yɛu Manasɛ ihiiŋ, ubwa kaa du meci Giliad, ibɛ po ee peni bu Giliad keeni Bashan, iwɛnɛ tu baa shɛ bijeshi bụ 'wụtụ.

²Nazhɛ ee peni amwamwa ụlamụ Manasɛ a na vwɛ cɛnjɛ ta aba, aba shɛ: ge Ebiɛzɛ, ne Hilɛk, na Asriɛl, nɛ Shɛkɛm, nɛ Hɛfɛ keeni Shɛmida. Atwa ata aba shɛ miaụŋ mu umwamwa Manasɛ yɛu Josɛf.

³Hwuwayɛ go, gɛ Zɛlofɛhad yɛu-ye-eyi Hɛfɛ, ni yɛu-ye-eyi Giliad, ni yɛu-ye-eyi Maki, ni yɛu-ye-eyi Manasɛ, a zasa miaụŋ-me-eyi o, semi miaụŋ-mo-o kiri aa 'yajɛ. Nzeci ma aba na: ga Mala, na Noa, no Hogla, ne Milka keeni Tiza.

⁴Nazhɛ miaụŋ ma ata mo o mi zhajɛ no ofwo Ɛleaza bunongbo keeni Joshua yɛu Nụn keeni ehwurembe, ɛɛ hiɛŋ, AGWANGWAMA peni la Moses unu maa ge ti peni cɛnjɛ tu na maa ta 'yaga na ashashɛ miaụŋ-mo-bino tu. Ibɛ po bee peni aŋ cɛnjɛ ta aba na ashashɛ miaụŋ-mo-bino me eshi aba, gana na ta AGWANGWAMA peni la unu iwɛ ibɛ.

⁵Ga Manasɛ 'yajɛ urobwo umpwa, na ta namɛ swooŋ na cɛnjɛ ti Giliad keeni Bashan na namɛ geri bu uwaŋna-banụ bu Jodan,

⁶iwɛnɛ ta miaụŋ-mo-o mụ ụlamụ Manasɛ mi leshiji cɛnjɛ ta aba na ashashɛ miaụŋ mu bwa me eyi. Cɛnjɛ ti Giliad tɛ shɛ ya ma tu tu miaụŋ mu Manasɛ mu na mụ vwɛ.

⁷Tugwungwu tu Manasɛ tu kwune na Ashɛ tutu i ci Mikmɛtat na namɛ geri bu uwaŋna-banụ bi Shɛkɛm. Nazhɛ tugwungwu ta ata ti zhe geri bu tuta tɛɛ imɛ atwa na jɛjɛ ni Ɛn-tapua.

⁸(Ga Manasɛ ubwa 'yajɛ cɛnjɛ ta ata tu Tapua, ama miaụŋ mi Ifrem muba tuba mi 'yajɛ ụshɛpwụ ata Tapua na shɛ ogwungwu Manasɛ.)

⁹Nazhɛ tugwungwu ta aba ti zhe tee zwi ni isese Kena. Ge Ifrem tuba ubwa 'yajɛ ashɛpwụ ata a'wụtụ a na namɛ tuta ti isese ɛtɛ, okwo tu taa namɛ na ashashɛ ashɛpwụ Manasɛ. Nazhɛ tugwungwu tu Manasɛ ti zhe tuzuba ti isese, taa kwunanjɛ ni itekwu.

¹⁰Cɛnjɛ tu na tu namɛ tuta, tɛ shɛ ma ti Ifrem, ma tu na tu namɛ tuzuba tɛ shɛ ma tu Manasɛ, itekwu ɛtɛ ibɛ shɛ ogwungwu aba. Ibɛ tee zhe tee ce Ashɛ geri bu tuzuba, keeni Isaka geri bu uwaŋna-banụ.

¹¹Ga Manasɛ 'yajɛ sasana Bɛt-shan, na amɛ na amɛ tugwungwu ti Isaka keeni Ashɛ, medenji ekpekpe ubwa keeni Ibli-am medenji ekpekpe ubwa keeni atwa na jɛjɛ nu Do medenji ekpekpe ubwa, keeni atwa na jɛjɛ ni Ɛn-do, medenji ekpekpe ubwa, keeni atwa na jɛjɛ ni Teanak medenji ekpekpe ubwa, keeni atwa na jɛjɛ ni Mɛgido medenji ekpekpe ubwa; ta cɛnjɛ ta ata tụ tatụ.

¹²Okwo ti yaa shɛ gana ata wa atwa Manasɛ eri shi o unzo atwa na jɛjɛ na ashɛpwụ ata a'wụtụ o, iwɛbɛ po atwa Kenan ta jɛjɛ na cɛnjɛ ta ata.

¹³Okwo tu ukpahiŋ wa atwa Isrɛl keeni ugombo, ama e unzhi shi kaa atwa Kenan hwɛɛ o, ama e zweni aŋ nu ugondu wa aba u tijama tɛnda.

¹⁴Nazhɛ ụlamụ Josɛf hiɛŋ Joshua, Iwembe po ebi ti peni ụpadụ cɛnjɛ tu ko gba maa ta 'yagaa? Atuba kaa ti gembi ufwugwo tebiye, iwɛnɛ ta AGWANGWAMA iti peni uwebiye duwa.

¹⁵Ibɛ po go Joshua jishijɛ aŋ, bɛɛ hiɛŋ, Yaa shɛ cɛnjɛ ti ishɛmɛ Ifrem ti hi twa sụ iwɛnɛ ehi gembi ufwugwo, asha zhaga tono ma nu uwapa maa hi meme gwubegeni cɛnjɛ ti ikɛnyi hiŋ na cɛnjɛ tɛ Ɛpɛrɛz keeni Arefaim.

¹⁶Nazhɛ ụlamụ Josɛf jishijɛ bụ, ɛɛ hiɛŋ, Cɛnjɛ ti ishɛmɛ tu twa sụ o, atwa Kenan a na jɛjɛ nu udadarɛ kaa a 'yajɛ ihɛŋtu ujasa ya ashɛmbɛrɛ, ta atwa na jɛjɛ na amɛ Bɛt-shan medenji ashɛpwụ na rungwutwonu uŋ keeni atwa na namɛ nu Ulomu Jɛzrɛl.

¹⁷Go Joshua hiɛŋ atwa ihwɛ Josɛf, ni ihwɛ Ifrem keeni ihwɛ Manasɛ, Hi gembi ga ufwugwo, ahiɛ 'yajɛ kaa ukpahiŋ tebiye; hiɛ shɛ shɛ hia 'yaga cɛnjɛ tu uzajɛ uko gbalụ o.

¹⁸Ama cɛnjɛ ta ata ti ishɛmɛ ti zhɛ ta sha me ti hiŋ, okwo tu ta a shɛ cɛnjɛ tu uwapa, hiɛ shɛ hia dwa uŋ maa hi 'yaga tụ tutu uce tuba. Iwɛnɛ po ahiɛba hi zhɛ hio unzo atwa Kenan, okwo ta a 'yajɛ ihɛŋtu ujasa ya ashɛmbɛrɛ keeni ikɛnyi.