Read bassa JOSHUA 18 Bible Online

JOSHUA 18 - bassa bible

JOSHUA 18

¹Nazhɛ tu'ulwatagwụ ti Isrɛl hwɛ hwɛɛ tu sotulonu urubwo uko nu Shailo, ee shikicinji udulo tu'ulwatagwụ apata. Cɛnjɛ kaa tu ta vwɛ nu umbe wa aba.

²Alamụ atwa Isrɛl ecenje, a ta namba a na kaa te leshiji shi cɛnjɛ ta aba.

³Ibɛ po go Joshua hiɛŋ atwa Isrɛl, Ụkwụmbwụ umba ɛhi zhɛ hia 'yaka nazhɛ hi teni cɛnjɛ ta ata AGWANGWAMA na shɛ Agwatana eshi hiŋ ihi peni maa hi leshiji tuu?

⁴Tala ma atwa atatatụ nụ ụlamụ ụlamụ, maa ma tumwana aŋ maa e zhe na cɛnjɛ ta ata, maa e 'nyeci tu te teni cɛŋ gana na tu taa namɛ, nazhɛ e gwure pi mi.

⁵Dwotwogonu tu ma orubwo ecenje, ga ga Juda untangana uce ubwa nụ ụzalụ tuta, gɛ ihwɛ Josɛf untangana uce wa aba nụ ụzalụ tuzuba.

⁶Hiɛ shɛ kaa hia 'nyata gana na cɛnjɛ ta ata tɛ shɛ, maa hiɛ shapɛ useyida ti'nyeci ta tuba epe pi mi, maa Ma 'waŋ icɛcɛ iwe hiŋ epe nu umbe AGWANGWAMA na shɛ Agwatana tu.

⁷Alivai zasa urobwo cɛnjɛ na ashashɛ hiŋ o, iwɛnɛ po tunongbo ta AGWANGWAMA tuba tɛ shɛ urobwo wa aba. Ga Gad, nɛ Rubɛn keeni ashashɛ ụlamụ Manasɛ loshigwo kaa cɛnjɛ ta aba geri bu uwaŋna-banụ bu Jodan, tu na go Moses yɛu ɛtɛ ugondu ya AGWANGWAMA peni aŋ.

⁸Gana na te etwenyi ata kwuni ga tahaŋnụ ta aba; ibɛ po go Joshua tɛtaganɛ atwa na zhe maa a 'nyacɛ useyida cɛnjɛ ta ata unu, bɛɛ hiɛŋ, Zhaga 'nyacɛ ma gana na tudwotwogonu ta cɛnjɛ ta ata tɛ shɛ, maa hiɛ shapɛ useyida ti'nyeci ta tuba maa hi gwure sasana pi mi, maa Ma 'waŋ icɛcɛ iwɛ hiŋ epe nu umbe AGWANGWAMA nu Shailon ga.

⁹Nazhɛ etwenyi ata sanɛ ga ee duleji cɛnjɛ ta ata. Ee 'nyeci useyida tuba nu utakada gana na tu taa namɛ na ashɛpwụ tuba apadụ ecenje, nazhɛ ee gwure pu Joshua nu ugba tu'ulwatagwụ nu Shailo.

¹⁰Nazhɛ go Joshua 'wɛŋ icɛcɛ iwɛ aba nu umbe AGWANGWAMA nu Shailo; apata bee hwoŋshi alamụ atwa Isrɛl cɛnjɛ ta aba.

¹¹Tugwungwu tu na ee peni amwamwa ụlamụ Bɛnjamin, tuba tɛ shɛ hiiŋ. Tugwungwu ta aba tu namɛ na ashashɛ ụlamụ Juda nu una Josɛf.

¹²Tugwungwu ta aba tu kwune tuzuba tu Jodan, tee hwuri tee munji taa palanganɛ tuzuba ti Jɛriko. Nazhɛ tee munji tee dure cɛnjɛ ti ishɛmɛ na bụ'aŋbụ bu uwaŋna-twono; nazhɛ tee mwe nụ ụshɛka Bɛt-aven.

¹³Nazhɛ tee beni apata tee keshici tee zhe tuta tu uzwoozwo Luz, (ibɛ gɛtɛtɛ i shɛ Bɛtɛl), tee hwuri tee zwi Atarot-ada ni ihiŋhiŋ ishɛmɛ nɛ namɛ tuta to tuzwo ta bụ'aŋbụ bu Bɛt-horon.

¹⁴Nazhɛ tugwungwu ta aba ti beni apata, tee hwuri tee ringeni nụ ụzalụ bu uwaŋna-twonuo nụ ụzalụ tuta, te kwuni ni ishɛmɛ nɛ shikeni nụ ụzalụ tuta nɛ ngbaracɛ Bɛt-horon ni Kiriat-beal (ibɛ gɛtɛtɛ shɛ Kiriat-jiarim). Ụlamụ Juda, ubwa 'yajɛ ụshɛpwụ ata ụ'wụtụ. Inɛ ɛtɛ ibɛ shɛ uce ubwa nụ ụzalụ bu uwaŋna-twonuo.

¹⁵Nazhɛ tugwungwu tụ ụzalụ tuta tu kwune nu ukwunanga Kiriat-jiarim, tee beni apata tee zhe Ifron i ci umɛzhinjɛ meni mi Nɛftoa.

¹⁶Nazhɛ tugwungwu ta aba ti zhe tee zwi nu ukwunanga ishɛmɛ ɛtɛ namɛ nu umbe Ulomu Bɛn-hinom, tuzuba tu Ulomu Refaim. Nazhɛ too to tuhwulo tee zwi Ulomu Hinom, taa palanganɛ uzwoozwo tuta tụ ụshɛpwụ wɛ Ɛjɛbus, tee ci In-rogɛl.

¹⁷Nazhɛ tee ringeni tuzuba tee zhe Ɛn-shɛmɛsh, too to tuhwulo tee zhe Gɛlilot, na mama ngbarakanụ no tumungo ta Adumim, nazhɛ tee hwuri tee zwi nu utayɛ Bohan yɛu-ye-eyi Rubɛn.

¹⁸Nazhɛ taa palanganɛ tee keshici tee zhe tuzuba te bikpekwu bi Bɛt-araba, tee zwi tee ci Araba.

¹⁹Nazhɛ tugwungwu ta aba ti keshici tee zhe tuzuba te bikpekwu bi Bɛt-hogla; tee mwe tuzuba tu uhwacɛ Itekwu Manɛ nu ukwunanga bụ'aŋbụ bụ tuta tu Jodan; apata i shɛ uce bụ'aŋbụ bụ ụzalụ tuta.

²⁰Urefu Jodan ubwa shɛ uce tugwungwu ta aba tụ ụzalụ bu uwaŋna-banụ. Ma tu ta tuba tɛ shɛ cɛnjɛ ta amwamwa ụlamụ Bɛnjamin tu na aa njɛ tugwungwu ta aba useyida tutu rungwutwonu ụpadụ we elele.

²¹Ashɛpwụ amwamwa ụlamụ Bɛnjamin na: Jɛriko, ni Bɛt-hogla, ni Imɛk-keziz,

²²ni Bɛt-araba, ni Zɛmaraba, ni Bɛtɛl,

²³ne Evim, ni Pera, nu Ofra,

²⁴ni Kifa-amoni, nu Ofni, ni Giba: a na ata shɛ ashɛpwụ umpwa-na-ba-eyebi medenji ekpekpe aba.

²⁵Gibion, nu Rama, ni Biɛrot,

²⁶ni Mizpa, ni Kɛfira, nu Moza,

²⁷ni Rɛkɛm, ni Ipiɛl, nu Tarala,

²⁸ni Zila, ni Hilɛf, ni Jɛbus (ibɛ gɛtɛtɛ i shɛ Jɛrusalɛm), ni Gibia, keeni Kiriat-jiarim: a na ata shɛ ashɛpwụ umpwa-na-ba-eneshi medenji ekpekpe aba. Cɛnjɛ ta amwamwa ụlamụ Bɛnjamin ta.