Read bassa JOSHUA 22 Bible Online

JOSHUA 22 - bassa bible

JOSHUA 22

¹Nazhɛ go Joshua suyanɛ atwa Rubɛn, na atwa Gad keeni ashashɛ ụlamụ Manasɛ.

²Bɛɛ hiɛŋ aŋ, Hiɛ untanganɛ unu na go Moses yɛu-ugondu ya AGWANGWAMA ihi peni hwɛɛ, ahiɛ hwụjɛ kaa unu mu ni iyi elele nɛ Ngee hi peni-unu ibɛ.

³Hi jineci shi kaa miaụŋ-mo-bino hiŋ te kwuni na aka ata tutu i ci hwayɛ ga o. Ama hio shiyono unu na AGWANGWAMA ihi peni eshe, ahiɛ untanganɛ uŋ kaa tebiye.

⁴Hwuwayɛ go AGWANGWAMA na shɛ Agwatana hiŋ kaa pwonuo miaụŋ-mo-bino hiŋ amɛ-olom, gana na ti bee shileni aŋ la unu. Iwɛ inɛ ɛtɛ gwulo ma ya nu nhwaŋ mi hiŋ na cɛnjɛ ta ata ahiɛ 'yajɛ; tu gata go Moses yɛu-ugondu ya AGWANGWAMA ihi peni hileniye Jodan.

⁵Nda ma tilɛɛ maa hiɛ untangana unu-tupana keeni undwa na go Moses yɛu-ugondu ya AGWANGWAMA ihi peni, maa hi no lubo AGWANGWAMA na shɛ Agwatana hiŋ, maa hi na zha tahaŋnụ ni ihwɛŋnɛ ibwɛ ye elele, maa hi untangana kaa onu ubwa tụpana, maa kaa hi mogwu nu bwa maa hi na zhɛba bụ na shɛmɛ shi hiŋ kpaaŋ keeni shihwulu shi hiŋ kpaaŋ.

⁶Gana go Joshua peni aŋ uwebiye, nazhɛ bee genji aŋ ee ji nu nhwaŋ ma aba ta.

⁷Go Moses peni ashashɛ ụlamụ Manasɛ uko cɛnjɛ na amɛ Bashan. Ama go Joshua peni ashashɛ ụlamụ Manasɛ unya cɛnjɛ to dongonu miaụŋ-mo-bino ma aba na cɛnjɛ tu uwaŋna-twonuo Jodan. Aka na tu go Joshua ba ganga aŋ, maa e hwuri ujiyo nu nhwaŋ ma aba, bee peni aŋ uwebiye.

⁸Bɛɛ hiɛŋ aŋ, Zhaga jiyo ma nu nhwaŋ mi hiŋ nu uduciya ụ'wụtụ, ni iyimabiga ifwugwo, na azụrụfa, na azhɛnarɛya, nɛ ɛtumburɛ, na ashɛmbɛrɛ keeni i'wɛŋnɛ tu'urugono nɛ gembi tebiye. Dwotwogonu ma i'wɛŋnɛ ya atwa i'ime hiŋ nɛ ehi suje nu ujasa na miaụŋ-mo-bino hiŋ.

⁹Gana atwa Rubɛn, na atwa Gad keeni ashashɛ ụlamụ Manasɛ genji atwa Isrɛl nu Shailo na namɛ na cɛnjɛ ti Kenan, ee gwuri na cɛnjɛ ti Giliad tu na tɛ shɛ cɛnjɛ ti ikɛnyi aba tu na ee leshiji tedure nu unu na AGWANGWAMA peni la Moses ta.

¹⁰Aka na ta atwa Rubɛn, na atwa Gad keeni ashashɛ ụlamụ Manasɛ ci Gɛlilot na gwumwongonu nu Jodan na cɛnjɛ ti Kenan, oo mo utukwu-ụrụpɛ uko na gembi tebiye apata, nụ ụpalanụ ata Jodan.

¹¹Aka na atwa Isrɛl hwụjɛ maa, bwonu atwa Rubɛn, na atwa Gad keeni ashashɛ ụlamụ Manasɛ mo ba utukwu-ụrụpɛ no tugwungwu ta cɛnjɛ ti Kenan, nụ ụpalanụ Jodan nụ ụpadụ na ụ shɛ una wa atwa Isrɛl.

¹²Aka na ta atwa Isrɛl hwụjɛ iŋ, ibɛ po oo sotulonu nu Shailo hwɛ hwɛɛ aba, maa a sukakanɛ aŋ nu ujasa.

¹³Iwɛbɛ po atwa Isrɛl tumwanɛ Finihas yɛu-ye-eyi Ɛleaza bunongbo, no ofwo atwa Rubɛn, na atwa Gad keeni ashashɛ ụlamụ Manasɛ na cɛnjɛ ti Giliad.

¹⁴A tumwanɛ du ehwurembe umpwa; bu ko nụ ụlamụ ụlamụ na amwamwa atwa Isrɛl maa e zhe nu bwa. Bụtụ bụtụ ba aba kaa shɛ buhwuri-bu-umbe nu umwamwa ubwa ne edenji atwa Isrɛl hwɛɛ.

¹⁵Aka na ee zhe ee ci atwa Rubɛn, na atwa Gad keeni ashashɛ ụlamụ Manasɛ, na cɛnjɛ ti Giliad, ɛɛ hiɛŋ aŋ,

¹⁶Tụ'ụlwatagwụ ta AGWANGWAMA hwɛɛ tɛ jɛmɛ, tɛ ɛ hiɛŋ, Iwɛwɛ imbe nɛ ahiɛ njɛ Agwatana Isrɛl, na tụvwụla tu na ahiɛ vwụrɛ ehi genji AGWANGWAMA tu'wa tedure nu utukwu-ụrụpɛ na ehi meme meni ni ikɛnyi hiŋ epe hwayɛ ga, ne tigezhe tutana AGWANGWAMAA?

¹⁷Iwɛwɛ nɛ atɛ njɛ ni pio, inɛɛ nɛ atu ta nyashɛngwa sụ kaa ni ibɛ, i ta tu gwumwa sụ waa suu? Igɛtɛ shapɛrɛganɛ la tu'ulwatagwụ ta AGWANGWAMA hwɛɛ tishikpe.

¹⁸Hi zhɛ suu hia laka maa hi 'wa AGWANGWAMA hwuwayɛ ya? Yaa shɛ ehi teni AGWANGWAMA tigezhe hwayɛ ga, asha bi zhɛ du ba nda isɛbwɛ na tu'ulwatagwụ ta atwa Isrɛl hwɛ hwɛɛ beyi ga.

¹⁹Ama yaa shɛ cɛnjɛ ti hiŋ tu hashɛganụ, asha kɛshicɛ ma maa hi zhajɛ na cɛnjɛ ta AGWANGWAMA no ofwo na udulo ubwa shikeni, maa hi 'yaga cɛnjɛ na ashashɛ tu. Ama tuba ta tana ma AGWANGWAMA tigezhe, kwo kaa atuba, ta tu tana ma tigezhe tedure nu utukwu-ụrụpɛ unya tuma, namɛ swooŋ nu unaa na ụ shɛ una wa AGWANGWAMA na shɛ Agwatana tu o.

²⁰Ne teyinje ma iwɛ Akan yɛu Zera na hwụjɛ shɛ la unu ni iyi nɛ ee ge shileni la Agwatana. Isɛbwɛ ya Agwatana zhe shi yee ubi tu'ulwatagwụ ta atwa Isrɛl hwɛ hwɛɛ hŋ? Shɛ bwooko kiri kaa 'wi iwɛ iwɛwɛ ɛtɛ ibwɛ o.

²¹Nazhɛ atwa Rubɛn, na atwa Gad keeni ashashɛ ụlamụ Manasɛ, jishijɛ ehiu amwamwa atwa Isrɛl, ɛɛ hiɛŋ,

²²Agwatana mokondo ukpahiŋ ụ'wụtụ, ubwa shɛ AGWANGWAMA! Agwatana mokondo ukpahiŋ ụ'wụtụ, ubwa shɛ AGWANGWAMA! Bi mepi kaa ecilo no po atɛ njɛ ijɛ. Ga atwa Isrɛl ni ikɛnyi aba du mepi! Yaa shɛ tigezhe ata ta kwo kaa undwa wa AGWANGWAMA ata bwada, asha to lono ma maa ta ya ya uraiŋ o.

²³Yaa shɛ kaa eti meme meni utukwu-ụrụpɛ maa ta ganga AGWANGWAMA tu'wa; kwo kaa maa tu na pana arụpɛ tuhwoŋzhingo, na arụpɛ tiya, keeni arụpɛ amɛ-olom[21] nu bwa, asha ga AGWANGWAMA ni ikɛnyi ibwɛ iti peni ulwapɛ iwɛ ibɛ.

²⁴Awo! Ama tɛ njɛ iŋ ni inyɛsɛ, iwɛ aka na miaụŋ mi hiŋ mi zhɛ mɛ hiɛŋ hwuŋ miaụŋ mu tu geri-be-eshe maa, Imbe kwuŋ shɛ inee hiŋ na AGWANGWAMA na shɛ Agwatana Isrɛlii?

²⁵Iwɛnɛ po AGWANGWAMA ubwa njɛ Jodan ga maa ụ shɛ ogwungwu na shiri na ashashɛ tu ne hiŋ, ahiɛba atwa Rubɛn na atwa Gad, i'ɛlɛ hiŋ kaa zasaba na amɛ AGWANGWAMA. Nekeshi miaụŋ mi hiŋ mi zhɛ ma lakana hwuŋ miaụŋ mu tu AGWANGWAMA tɛzhɛba.

²⁶Iwɛbɛ po ɛti hiɛŋ, Mizha tu mo ma utukwu-ụrụpɛ ga, ama shɛ iwɛ ụrụpɛ tuhwoŋzhingo, shɛ iwɛ ụrụpɛ we elele tuta du kaa o,

²⁷ama maa ụ shɛ useyida na namɛ na ashashɛ tu ne hiŋ keeni useyida na namɛ na ashashɛ uwaŋnɛ na we ci ne ekwunyi tu maa AGWANGWAMA ubwa ata ndana iyi, ata pana bụ kaa arụpɛ tu tuhwoŋzhingo, na arụpɛ tu amɛ-olom, keeni arụpɛ tu vwɛ nu umwono ubwa Tijilo, iwɛ maa kede miaụŋ mi hiŋ mi hiɛŋ hwuŋ mu noo tu nụ ụjita ti beyi maa, I'ɛlɛ hiŋ zasaba na AGWANGWAMA o.

²⁸Ibɛ po eti heŋshi, ɛti hiɛŋ, Yaa shɛ ɛɛ zhɛ mɛ ti hiɛŋ hwuŋ ijɛ kwo kaa miaụŋ mu tu me ekwunyi, asha ti zhɛ tɛ hiɛŋ aŋ hwuŋ, Hioko ma bimenji bu utukwu-ụrụpɛ wa AGWANGWAMA na eshi tu mo la. Ụ shɛ shɛ iwɛ arụpɛ tuhwoŋzhingo, kwo kaa iwɛ arụpɛ vwɛ tuta o, ama maa ụ shɛ useyida na namɛ na ashashɛ tu ne hiŋ.

²⁹Kede iti shanɛ gana ata o, maa ta tana AGWANGWAMA tigezhe, maa ta ganga bụ tu'wa; maa ta ma utukwu-ụrụpɛ unya iwɛ arụpɛ tuhwoŋzhingo, kwo kaa iwɛ arụpɛ tiya, kwo kaa iwɛ arụpɛ vwɛ tuta, namɛ swooŋ nu utukwu-ụrụpɛ wa AGWANGWAMA na shɛ Agwatana tu na shikeni nu umbe udulo na namɛ na agba ubwa o!

³⁰Aka na ge Finihas bunongbo keeni ehiu tu'ulwatagwụ hwɛɛ, keeni ehwurembe amwamwa atwa Isrɛl a na zhe nu bwa, hwụjɛ n-ndumwa mu na atwa Rubɛn, na atwa Gad keeni ashashɛ ụlamụ Manasɛ jɛmɛ, mee lemicinji aŋ shɛmɛ tebiye.

³¹Ibɛ po ge Finihas yɛu Ɛleaza bunongbo hiɛŋ atwa Rubɛn, na atwa Gad keeni ashashɛ ụlamụ Manasɛ, Ti mepi maa AGWANGWAMA namɛ na ashashɛ tu hwayɛ ga, iwɛnɛ ehi teni shi AGWANGWAMA tigezhe ni ijɛ. Hwuwayɛ go ahiɛba hi bicinji atwa Isrɛl nu ulwapɛ wa AGWANGWAMA.

³²Nazhɛ ge Finihas yɛu Ɛleaza bunongbo keeni ehwurembe, banɛ no olugwo atwa Rubɛn, na atwa Gad na cɛnjɛ ti Giliad ee jiye na cɛnjɛ ti Kenan no ofwo atwa Isrɛl vwɛ, ee mbishi aŋ n-ndumwa ma ata.

³³Nazhɛ unabarɛ ata lemicinji atwa Isrɛl shɛmɛ, oo zhemonjino Agwatana. A jɛmɛ shɛ ya maa ɛ tɛ zhɛ o sugo ujasa maa e iricinji cɛnjɛ ta ata atwa Rubɛn, na atwa Gad jɛjɛ o.

³⁴Ibɛ po atwa Rubɛn, na atwa Gad po utukwu ata ụrụpɛ izeci, ɛɛ hiɛŋ, Useyida na namɛ na ashashɛ tu maa AGWANGWAMA ubwa shɛ Agwatana.