Read bassa JOSHUA 4 Bible Online

JOSHUA 4 - bassa bible

JOSHUA 4

¹Aka na tu udenji ata hwuwi Jodan tɛkasha hwɛɛ, nazhɛ AGWANGWAMA hiɛŋ Joshua,

²Tala atwa umpwa-na-ba-eyebi na ashashɛ atwa ga, atwa oko oko nụ ụlamụ we elele,

³maa peni aŋ unu maa ge suji atayɛ umpwa-na-ba-eyebi na ashashɛ Jodan, no ofwo ata onongbo shikekeni gom, maa hi 'waŋna aŋ hi keshi maa hi tileni aŋ nu urubwo ata ɛhi zhɛ hio woto nụ ụrụmɛ go.

⁴Go Joshua suyanɛ ga atwa ata umpwa-na-ba-eyebi a na bee teri na ashashɛ miaụŋ mi Isrɛl, atwa oko oko nụ ụlamụ ụlamụ,

⁵bɛɛ hiɛŋ aŋ, Zhaga hwulono ma Ikpɛtɛ ya AGWANGWAMA na shɛ Agwatana hiŋ umbe na ashashɛ Jodan. Bụtụ bụtụ ga shapa utayɛ uko maa patana nu ututu ubwa, nu gana na tu ufwugwo wa alamụ Isrɛl namɛ,

⁶iwɛ maa i shɛ useyida na ashashɛ hiŋ, na aka na miaụŋ mi hiŋ mi zhɛ mo hi hoŋtono hwuŋ nụ ụjita ti beyi, maa, Imbe kwuŋ shɛ la ecilo atayɛ ga ehi suteni epee?

⁷Nazhɛ ɛhi zhɛ hio mbiso aŋ, hiɛ hiɛŋ, Meni mu Jodan mu jajụ la nu umbe Ikpɛtɛ Unu-tutwa ya AGWANGWAMA; na aka na ti yee keshi uŋ. Atayɛ ga aba zhɛ a shana atwa Isrɛl titeyinje ti ibɛ tu unyizo-nom.

⁸Ibɛ po atwa Isrɛl njɛ gana na go Joshua peni aŋ unu. Ee suje ga atayɛ ata umpwa-na-ba-eyebi na ashashɛ Jodan, nu gana na tu ufwugwo wa alamụ atwa Isrɛl namɛ. Gana na ta AGWANGWAMA mbishi Joshua; ibɛ aa 'waŋnɛ aŋ ɛɛ kɛshɛ, ee tileni aŋ no ofwo na oo zokwu.

⁹Ibɛ po go Joshua shikicinji atayɛ ata umpwa-na-ba-eyebi na ashashɛ Jodan no ofwo na shivwɛvwɛjɛ sho onongbo ata 'waŋnɛ Ikpɛtɛ Unu-tutwa shi shikeni; e te tileni ba apata taa hwayɛ.

¹⁰Iwɛnɛ po onongbo na 'waŋnɛ Ikpɛtɛ ɛtɛ shikeni la na ashashɛ Jodan, uuwa i ci aka na atwa ata hwuwi iyi elele nɛ AGWANGWAMA peni Joshua unu ibɛ tɛnda, nu gana na ti iyi elele nɛ go Moses peni Joshua unu ibɛ namɛ. Ibɛ po atwa ata keshi ni izɛlɛgwu.

¹¹Aka na ta atwa ata hwuwowu tɛkasha hwɛɛ, nazhɛ Ikpɛtɛ ya AGWANGWAMA keshi, medenji onongbo ne eshe atwa ata.

¹²Etwenyi ụlamụ Rubɛn, na Gad keeni ashashɛ ụlamụ Manasɛ a na shɛ ejeshi, aba keshi hiiŋ na atwa Isrɛl, gana na tu go Moses mbishi aŋ la.

¹³Atwa na shɛ ejeshi, a na keshi ne eshe AGWANGWAMA, namɛ igbɛɛ-woshi (40,000), a mama 'imɛ iwɛ ujasa, aa namɛ nu udadarɛ Jɛriko.

¹⁴AGWANGWAMA gembicinji Joshua jita ata ne eshe miaụŋ mi Isrɛl hwɛɛ. Ibɛ po aa mụnɛ bụ ụjɛrụma gana na ta a mụnɛ la Moses ụjɛrụma, tutu tu'wo tu bwa.

¹⁵Nazhɛ AGWANGWAMA hiɛŋ Joshua,

¹⁶Pana onongbo ata 'waŋnɛ Ikpɛtɛ Tiseyida unu maa ga banɛ ya nu Jodan.

¹⁷Ibɛ po go Joshua peni onongbo ata unu, bɛɛ hiɛŋ, Banɛ ma ya nu Jodan.

¹⁸Aka na to onongbo ata 'waŋnɛ Ikpɛtɛ Unu-tutwa ya AGWANGWAMA munje aa banɛ na ashashɛ Jodan, gunu na tɛ shivwɛvwɛjɛ sho onongbo ata shɛ fwụnjɛ uhaŋsa, nazhɛ meni mu Jodan mu gwure nu urubwo muba, mee shineneni ukwoswo muba hwɛɛ gana na tu maa ga namɛ cebe.

¹⁹Tu upiana uhiiŋ namɛ ijitɛ umpwa, ibɛ atwa ata banɛ nu Jodan ata. Oo sotulonu ni Gilgal no tugwungwu tu Jɛriko nụ ụzalụ bu uwaŋna-banụ.

²⁰Nazhɛ go Joshua suji atayɛ ebe umpwa-na-ba-eyebi, a gata ɛɛ gɛ bɛcinjɛ nu Jodan, bee shikicinji aŋ ni Gilgal.

²¹Bɛɛ hiɛŋ atwa Isrɛl, Aka na miaụŋ mi hiŋ mi hi heŋteni hwuŋ, ɛɛ hiɛŋ, Imbe kwuŋ shɛ ecilo atayɛ gaa?

²²Mbiso aŋ ma maa, Na cɛnjɛ tuhwoo la atwa Isrɛl kɛshɛ Jodan ga.

²³AGWANGWAMA na shɛ Agwatana hiŋ, hwụŋcɛnjɛ la meni mu Jodan iwɛ hiŋ uuwa i ci aka na ehi keshi, gana na ta AGWANGWAMA na shɛ Agwatana hiŋ njɛ la ni Itekwu ɛtɛ Ishenje na baa hwụŋcɛnjɛ la uuwa i ci aka na ɛti kɛshɛ.

²⁴Bɛ njɛ ijɛ iwɛ maa atwa unyizo kpaaŋ mepi maa ukpahiŋ wa AGWANGWAMA gembi tebiye; iwɛ maa hiɛ sụmɛ du AGWANGWAMA hiŋ inyɛsɛ unyizo-nom.