Read bassa JOSHUA 6 Bible Online

JOSHUA 6 - bassa bible

JOSHUA 6

¹E kepi uba Jɛriko dimi dimi iwɛ atwa Isrɛl; i zasa bụtụ eri ba bana kwo kaa na eri bo tono nụ ụshɛpwụ ata ya o.

²Nazhɛ AGWANGWAMA hiɛŋ Joshua, Kwụba, M bu lasagwụ Jɛriko, ta agwuma ubwa, ta atwa ubwa ikɛnyi a na beni urishi hwɛɛ.

³Rungo ma ụshɛpwụ ata hi rungwutwonu, na atwa bụ ujasa hwɛɛ; iyi heri kpalụ ko. Nda ma gana ata tutu ijitɛ icihiŋ.

⁴Go onongbo ecenje a na 'waŋnɛ akakacɛ mahiuaŋ ma adagba mi cenje e hwuri umbe ni Ikpɛtɛ ɛtɛ Unu-tutwa. Nụ ụjita ata ucenje, rungo ma ụshɛpwụ ata hi rungwutwonu kpalụ cenje, go onongbo no hwulo akakacɛ.

⁵Aka na te e hwuri mahiuaŋ ma ata duwa duwa, gunu ata ta hiɛ hwụjɛ rụhwụŋ ru ukakacɛ ata, nazhɛ ga atwa ata hwɛɛ uganɛ duwa. Nazhɛ uba ụshɛpwụ ata zhɛ wo hwuŋzwo gbudugbudu, bụtụ bụtụ go mungo ne eririri agba ubwa maa tono na amɛ ubwa.

⁶Go Joshua yɛu Nụn suyanɛ ga onongbo, bɛɛ hiɛŋ aŋ, Shapa ma Ikpɛtɛ Unu-tutwa, go onongbo ecenje suji akakacɛ mahiuaŋ ma adagba mi cenje maa e hwuri umbe ni Ikpɛtɛ ɛtɛ ya AGWANGWAMA.

⁷Nazhɛ bɛɛ hiɛŋ atwa ata, Mizha ta ma tuhwulo hi rinji ụshɛpwụ ata, ge ejeshi hwuleni Ikpɛtɛ ya AGWANGWAMA umbe.

⁸Gana na tu go Joshua peni atwa ata unu, nazhɛ onongbo ata ecenje suji ga akakacɛ ecenje, oo to tuhwulo nu umbe AGWANGWAMA, oo hwulo akakacɛ aba, nazhɛ onongbo ata 'waŋnɛ Ikpɛtɛ Unu-tutwa ya AGWANGWAMA 'wa aŋ tuba ne ekwunyi.

⁹Ibɛ ejeshi hwuleni onongbo ata o hwulo akakacɛ umbe, atwa vwɛ tuba lɛ ekwunyi ni Ikpɛtɛ ɛtɛ. Ibɛ onongbo uranjɛ akakacɛ aba tuhwulo na aka ata tutu.

¹⁰Ama go Joshua peni atwa ata unu, bɛɛ hiɛŋ, Ta ugana ma o, kede a hwụjɛ kaa rụhwụŋ ri hiŋ o, kede n-ndumwa me elele kaa mu banɛ nu unu hiŋ uuwa i ci ụjita na Ngɛɛ zhɛ ma hi pana-unu maa ugana ma. Nazhɛ ugana ma ya.

¹¹Nazhɛ bee leni ga maa Ikpɛtɛ ɛtɛ ya AGWANGWAMA rinji ụshɛpwụ ata, yee rinji karu ko; ee gwure ee weci nu ugba tu'ulwa nụ ụrụmɛ ata.

¹²Nazhɛ go Joshua gbatụ ti'ishijɛ nu uvwungwa dididi, ti iyi heri, nazhɛ onongbo shepi Ikpɛtɛ ya AGWANGWAMA.

¹³Onongbo ata ecenje suji akakacɛ ecenje ee keshici, ee hwuleni Ikpɛtɛ ya AGWANGWAMA umbe, oo hwulo akakacɛ aba. Atwa na shɛ ejeshi tuba hwuleni aŋ umbe, nazhɛ atwa vwɛ lɛ ekwunyi, aa 'wa Ikpɛtɛ ɛtɛ ya AGWANGWAMA, onongbo uranjɛ akakacɛ aba tuhwulo tutu.

¹⁴Gabata ee ringeneni ụshɛpwụ ata nụ ụjita uyebi oo rungwutwonu karu ko, ee gwure nu ugba tu'ulwa. A njɛ gana ata ijitɛ icihiŋ.

¹⁵Tụ ụjita ucenje ci, aa gbatụ ti'ishijɛ aka na ti iyi kwuni tusuje, ee rinji ụshɛpwụ ata karɛ cenje gana na aa shana a nda, ama semi jita ata kiri ee rinji ụshɛpwụ ata karɛ cenje.

¹⁶Nu ucenje ata, aka na onongbo hwuri akakacɛ aba duwa duwa, go Joshua peni atwa ata unu, bɛɛ hiɛŋ, Ugana ma! Iwɛnɛ po AGWANGWAMA ihi pwonuo ụshɛpwụ ga!

¹⁷Ge iricinji atwa elele, ti iyi elele nɛ zweni nụ ụshɛpwụ ga, ge tileneni iŋ AGWANGWAMA hwɛɛ; semi ga Rahab buwɛle ata keeni atwa elele na namɛ nu umwono ubwa kiri zhɛ o bino, iwɛnɛ tu baa intanɛ la atumwa ata atu tumwanɛ.

¹⁸Ama momo mbo ma maa kede hi suji iyi nɛ aa ga shɛ a nda ufwu o, iwɛ maa kede hi ileni iwɛ tɛshapa ti iyi elele na amɛ ubwa o. Yaa shɛ ahiɛ njɛ gana ata, asha hi zhɛ hio iricingo tu'ulwa ti Isrɛl, asha hi zhɛ hia shapɛrɛganɛ tụ ufwu tɛnda.

¹⁹Ama azụrụfa, na azhɛnarɛya, ni i'wɛŋnɛ nɛ aa njɛ nɛ ɛtumburɛ keeni ashɛmbɛrɛ, hwɛɛ ibɛ i shɛ iyi tijilo ya AGWANGWAMA. I shɛ tilɛɛ maa gɛ inɛ ɛtɛ zhe nu umwono ukwuribi wa AGWANGWAMA.

²⁰Gabata onongbo hwuri akakacɛ ata. Gunu na ta atwa ata hwụjɛ rụhwụŋ ra akakacɛ ata, nazhɛ ee zweni nu n'ungwa duwa, nazhɛ uba ata hwuŋzwo na cɛnjɛ gbudugbudu. Nazhɛ atwa ata teni nụ ụshɛpwụ ata, bụtụ bụtụ bo tono ne eririri agba ubwa, ibɛ ee leshiji ụshɛpwụ ata.

²¹Aa kwụnɛ iyi elele nɛ namɛ nụ ụshɛpwụ ata nu utokwobi, te etwenyi, te eyikwo, ta miaụŋ, ta atwa na inganjɛ, ti inɛ, ta agwụdụ keeni nzhinyacɛ.

²²Nazhɛ go Joshua hiɛŋ etwenyi ata eyebi a na yalajɛ la cɛnjɛ ta ata, Zhaga ma nu umwono buwɛle ata bo o, maa hi bɛcinjɛ bụ keeni iyi elele nɛ namba nu bwa, nu gana na te ehi shileni bu la unu.

²³Ibɛ po esemberi ata a na yalajɛ la cɛnjɛ ta ata zhe ga ee teni, ɛɛ bɛcinjɛ Rahab, te bishi bwa, to bino bwa, tu nkwonyi mu bwa, ti iyi elele nɛ baa 'yajɛ; keeni atwa na baa 'yajɛ ụmatụ na aba, ee tileni aŋ no tupohondo tu ugba tu'ulwa tu miaụŋ mi Isrɛl.

²⁴Nazhɛ ee hwoŋzhinji ụshɛpwụ ata nu ulwa, keeni iyi elele nɛ zweni na amɛ ubwa, semi azụrụfa, na azhɛnarɛya, ni iyi nɛ aa njɛ nɛ ɛtumburɛ keeni ashɛmbɛrɛ, ibɛ kiri ee zweni nu umwono ukwuribi wa AGWANGWAMA.

²⁵Ama go Joshua bicinji Rahab buwɛle ata, ta atwa ihwɛ bishi bwa keeni iyi elele nɛ baa 'yajɛ, ibɛ po baa namɛ ya na ashashɛ atwa Isrɛl taa hwayɛ, iwɛnɛ tu baa intanɛ la atwa na go Joshua tumwanɛ maa a yalajɛ Jɛriko.

²⁶Nazhɛ go Joshua keleni uŋ unu na 'yajɛ ikɛnyi na aka ata, bɛɛ hiɛŋ, Go unu-tukalana wa AGWANGWAMA 'imɛ bụtụ be elele na ishijɛ maa maanana ụshɛpwụ ga Jɛriko. Ukoshilo ubwa tishilo zhɛ wa sha ti'ina ti yɛu ibwɛ ye eyi ihiiŋ, akpa ubwa tuzwono zhɛ a sha ti'ina ti yɛu ibwɛ ye eyi imɛwɛɛ.

²⁷Gana AGWANGWAMA namɛ no Joshua ta; ibɛ po urishi ubwa ubiye botogwu cɛnjɛ ta ata hwɛɛ.