Read bassa 2 TƐSƐLONIKA YEBI 2 Bible Online

2 TƐSƐLONIKA YEBI 2 - bassa bible

2 TƐSƐLONIKA YEBI 2

¹A-miaụŋ-mo-bino mi na mɛ Krast, ta hi tabwa iwɛ tugwure tu na Agwangwama tu Jisus Krast zhɛ be gwure, keeni iwɛ tu'ulwatagwụ tu tu na agba ubwa,

²maa kede shihaŋsa shi hiŋ shɛ gbatụ tɛzhɛgɛda o, okwo maa shihwulu shi hi horukono, tedure na atwa oko na zhɛ ɛ hiɛŋ maa mpiala mi mbishi aŋ, kwo kaa nu n-ndumwa, kwo kaa nu utakada na ee 'nyeci gana maa u banɛ ni i'ɛlɛ tu; maa ɛ hiɛŋ Ụjita u tugwure ta Agwangwama[4] tuwo ya.

³To lono ma maa bụtụ be elele ihi helekeci nu uhwaŋna we elele o. Ụjita ata ta zha shɛ wa zhajɛ o, semi aka na ta tuganga te rishe-tɛtɛtana ti zhajɛ tugwo hiiŋ. Ibɛ shɛ aka na ɛɛ zhɛ a kapɛshɛnga bụtụ ata bi iwɛwɛ,[5] na shɛ yɛu ufwu tɛnda.

⁴Ubwa shɛ busukakanɛ ata momo mungicingo uhwuri iyi elele nɛ aa suyana maa uzhɛba kwo kaa iyi nɛ aa zhɛba. Iwɛbɛ po baa jɛjɛ na amɛ Umwono wa Agwatana, bɛɛ hiɛŋ maa ubwa ni ikɛnyi ibwɛ i shɛ Agwatana.

⁵Hi teyinji shi suu maa N hi mbiswo la iwɛ gɛ na aka na tu Ngaa ta namɛ ne hiŋ?

⁶Hi mepi tebiye iyi nɛ ya nda bu ukwurishi uuwa i ci hwuwayɛ, iwɛ maa e kepishinji bụtụ ata bi iwɛwɛ na aka ubwa u tugom.

⁷Iwɛnɛ po iyi tusweci nɛ zasa undwa ya nda ba ugondu cebe; ama bụtụ ata ba nda iŋ ukwurishi bu ta namba, uuwa i ci aka na ti bee beni na ashashɛ baa ishɛjɛ.

⁸Nazhɛ ɛɛ zhɛ a kapɛshɛnga bụtụ ata zasa undwa, ubwa shɛ bụtụ ata Agwangwama Jisus zhɛ bo hwoŋzhingo ni ihwungwɛ unu ubwa, na kaa bɛɛ zhɛ ba nda bu iyi tɛgadaga no tumbisono ta tɛcaakwụ te tugwure tu bwa.

⁹Bụtụ ata zasa undwa zhɛ ba 'waŋnɛ ukpahiŋ Setan maa bu na ndangana iyi tudama keeni arụhwajɛ tukata,

¹⁰na tuhalakaka hwɛɛ, ti iyi nɛ zasa ririri nɛ ya halakaka atwa na a nda ufwu, iwɛnɛ ee leshiji shi tulubo maa o no lubo iwɛ-tɛkana ata zhɛ yo bicingo aŋ.

¹¹Iwɛbɛ po Agwatana ba tumwananɛ aŋ ti'ina iwɛ maa a tɛtana ụzagwụ rishe,

¹²iwɛ maa a jɛmɛ ụshɛrɛya wa atwa elele na tɛtanɛ shɛ iwɛ-tɛkana rishe, a na orugwusu kiri kwụlanɛ.

¹³A-miaụŋ-mo-bino mu na Agwangwama o lubo, ta nda ugwoje na Agwatana ɛgbɛɛ iwɛ hiŋ, iwɛnɛ ta Agwatana ihi tolwo taa nu umozhigo iwɛ maa e hi bicinji,[6] ne tijilo tu na Mpiala ma hi nda atwa tijilo,[7] keeni iwɛ iwɛ-tɛkana na ahiɛ tɛtanɛ-rishe du.

¹⁴Iwɛ ecilo ga Agwatana ihi suyanɛ tedure na Anabarɛ Ebiye tu, iwɛ maa hi 'yaga ụjɛrụma wa Agwangwama tu Jisus Krast.

¹⁵Ibɛ po a-miaụŋ-mo-bino mi na amɛ Krast, shikono ma dimi, untangana ma iwɛ-tɛkana ata eti hi mbisegeni dimi, okwo tedure nu n-ndumwa mu tu, kwo kaa tedure nu utakada tu.

¹⁶Ga Agwangwama tu Jisus Krast ni ikɛnyi ibwɛ, keeni Agwatana na shɛ Bishi tu, na tu lubi na kaa ma ti ingatanga unyizo-nom, na kaa iti peni ashɛlatụ ebiye a na dure tulubo-ti-biye,

¹⁷ingatanjɛ shɛmɛ shi hiŋ, maa mo hi shikicingo dimi nu ugondu ubiye we elele keeni n-ndumwa mi biye me elele hwɛɛ.