Read bassa 1 TIMOTI HIIŊ 1 Bible Online

1 TIMOTI HIIŊ 1 - bassa bible

1 TIMOTI HIIŊ 1

¹Go Poul na shɛ butumwa Krast Jisus, gana na tu unu-tupana wa Agwatana na shɛ Bibicinji tu, keeni una wa Agwangwama tu ge Jisus Krast na shɛ ashɛlatụ tu namɛ.

²No ofwo Timoti yɛu mi tɛkana ne rishe-tɛtɛtana. Go tulubo-ti-biye keeni inyɛmɛnyɛmɛ, keeni amɛ-olom na banɛ no olugwo Agwatana na shɛ Bishi keeni Krast Jisus Agwangwama tu, tu nama na bụ.

³Gana na tu Ngaa bu tabwa maa gɛga nɛ Ɛfɛsɛs, aka na ti Ngɛɛ zhɛ Masɛdonia, maa peni atwa oko unu maa kede o no mbisogono imbisegeni tukata o.

⁴Tɛtagana aŋ unu maa kede o no shiyono shihaŋsa sha aba na ashwa kwo kaa n-ndumwa ma shɛrụkwụkwụ, keeni mu na ma alamụ mu na mu zasa uce o. Ijɛ ɛtɛ ya zhajɛ na ashamanjɛ, tụlụkpashɛ ti iyi nɛ namɛ na amɛ Agwatana keeni ugondu tɛnda tedure ne rishe-tɛtɛtana.

⁵Ama uce unu-tupana ụ shɛ tulubo tu na tu banɛ na amɛ na namɛ rụmbɛɛ, ne bimbisegeni-ba-amɛ bi biye, ne rishe-tɛtɛtana, uzawa tɛnda-te-eshe.

⁶Atwa oko jɛshɛrɛjɛ, e genji ijɛ, ee zhe no ofwo n-ndumwa mo ohondo.

⁷I kwụlanɛ aŋ maa a shɛ embisegeni Undwa, okwo te e eshiciji shi iyi nɛ aa duma kwo kaa iyi nɛ aa la tiseyida ti ibɛ no ohwulu oko ti'yaga.

⁸Ama ti mepi maa undwa zhɛmɛ ti yaa shɛ bụtụ be elele ba nda iyi nɛ waa jɛmɛ.

⁹Ti mepi inɛ gɛ maa, e shiri shi undwa iwɛ atwa tiririri o, semi iwɛ atwa na a bwada-undwa, na atwa na hwụjɛ shɛ unu, na atwa na a nda iyi iwɛ, na atwa iwɛwɛ, ti iwɛ atwa na zasa shɛshɛshɛ, ti iwɛ atwa na zasa tijilo, ti iwɛ atwa na a kwụna eshi aba keeni ono aba keeni iwɛ akwụnɛ-atwa,

¹⁰ti iwɛ anjɛ-tuwɛle, ti iwɛ etwenyi na o woto ne etwenyi, ti iwɛ atwa na a ima atwa a sanga, ti iwɛ ejwe-cibɛ, ti iwɛ atwa na a ta-tuwa tu tukata, yaa shɛ inyɛ iyi elele ta namba nɛ ya sukakana imbisegeni gɛ i tụrụmbɛɛ,

¹¹gana na ta Anabarɛ Ebiye ụjɛrụma wa Agwatana na oo zhemonjino namɛ, a na bee n untegeni maa Ma ngbaraka.

¹²Ma nda ugwoje Krast Jisus Agwangwama tu, na m peni ukpahiŋ, iwɛnɛ tu baa n rɛcɛ maa N shɛ bụtụ bɛ tɛcara, bee n teri iwɛ maa Mu na ndana bụ iyi.

¹³Okwo tu Ngaa dumwangwanua bu la n-ndumwa mụ wɛ, Ngaa shɛkwa bu la, Ngaa 'wangwanua bu la. Ama bi hieci inyɛmɛnyɛmɛ mi, iwɛnɛ tu Ngaa njɛ iŋ la no tugbodu, na aka na kaa Ngaa ta tɛtanɛ shɛ la rishe.

¹⁴Ama tulubo-ti-biye ta Agwangwama tu ti gembi duwa tedure ne rishe-tɛtɛtana ru na bee m peni keeni tulubo tu na tu namɛ na amɛ Krast Jisus.

¹⁵N-ndumwa mu ga mɛ shɛ n-ndumwa mu tɛkana, i lanɛ kaa maa bụtụ be elele leshiji mu, maa ga Krast Jisus zhajɛ nu unyizo ga maa bicingo atwa-iwɛwɛ; Gamba kaa N wumanjɛ na ashashɛ aba.

¹⁶Ama iwɛ ecilo ga kaa, Agwatana kwụbɛ inyɛmɛnyɛmɛ mi, iwɛ maa ge Jisus Krast eri maa mo mbisono isɛbwɛ ibwɛ ti'ima caakwụ na amɛ mi hiiŋ, gana bimenji ba atwa na tɛ zhɛ a tɛtana bụ rishe iwɛ maa a 'yaga uraiŋ unyizo-nom.

¹⁷Ga tumuna keeni ụjɛrụma nama na Agwuma ata unyizo-nom aka elele. Ubwa na 'wi shi kwukwuŋ, ubwa na kaa eshe kwụbɛ shɛ, ubwa shɛ Agwatana bwooko gba tutu unyizo-nom! Ami.

¹⁸Ɛ-yɛu mi ge Timoti, Ma bu pana-unu ga, te teni cɛŋ ne tigesere ta ata aa jɛmɛ la iwɛ bụ,[1] iwɛ maa ga shɛ tedure ne tigesere ta ata aba twa ifelu ibiye.

¹⁹Na untangana rishe-tɛtɛtana dimi keeni bimbisegeni-ba-amɛ bi biye. Ibɛ i shɛ inɛɛ nɛ atwa oko 'wɛŋ, ee genji rishe ra aba tɛtɛtana.

²⁰Go Humɛnios na Alɛkisanda namɛ na ashashɛ aba, a na Ngee utegeni Setan iwɛ maa mbisogono aŋ, iwɛ maa e genji ya Agwatana n-ndumwa mụ wɛ tụdụmangana.